Ose 13
13
Lufwa lwa kaanda diri na tungu kuri Nzaambi
1Mu ntaangu yabadzoonsaa Efarayimi,
nde wabahaanaa boomo mu Iselili.
Nde wamonoko ngaa-mikanu,
mu kusaambila Baali na wafwa.
2Mu lu, bari mu kunamitina mu kwetobolo masumu :
Bayirikiryee mu bo-meene,
kifwaani kya kitari kyasulumusu,
mu palata dya bo,
bo bayirikiri biteki bunu buri bitsimi bya bo, byobinso bybyo biyiriki bya myooko mya baatu.
Mibari mu kuleele mu ntoono bo ti :
« Babo bayoko muutu mu kikabu,
sa babuumba baala ba bangoombo ! »
3Mu didyo, bo sa baba bunu tuti dya kipari,
bunu kinoko kikwiisa mu mawasu,
na kikweyende bunu nsyeri dzatsamikisa mu nseke,
bunu mwiisi wubafiitisaa mu nzo,
wupalaa mu mweelu wantele.
4« Me ngo Yaave Nzaambi yaaku.
Kuholosono nsi ya Ngipiti,
kwahele Nzaambi ha yulu me,
yiyaari ye yibvuukisaa,
kuri yikimi ko, wunu me.
5Me nyakuyaari#13.5 Nyaba waaku wakutya bunu pele nyakuyaabiri. ku nsi yankatu,
mu nsi ya nzunuku yalaka.
6Bunu bitiiti bi badiisilaa bibulu,
bo bayukutusu, bayukuta
na mutima waaku wakeembe#13.6 Bit. 5-6 : Kumono Ngi 8.11-18.,
mu didyo bo banzimukinyee.
7Me sa mba bunu nkosi
mu bo,
sa nyabakete,
bunu ngo mu nzila.
8Sa nyababwaana bunu ngo-mbulu,
yibadzikiri baala,
sa nyakaakila ntulu bo.
Sa nyabadya ha kibeendu kikyo bunu nkosi,
bibulu bya kibiti,
sa byabakaakila. »
9« Iselili, diri mu kufuukisa ye,
ye wabele me,
wunde wukubakisa.
10Mbyaasi ye kuri yiri ?
Mu lu, kiisa kakubvuukisa,
mu mabvula maaku momanso !
Kuri kuri balarimi ba ye,
kuri bawaleeriri ti :
“Ha kuri me mbyaasi na bamfumu#13.10 Ha me mbyaasi : 1 Sa 8.5-6..”
11Me sa nyaha kuri ye mbyaasi,
kunsa nkesi dzaami,
na me sa nyamuyusila kunsa nangukunu#13.11 Kumono 1 Sa 10.17-24 ; 15.26 ; kumono se Ose 10.15 ; 1 Ba 16.12, 18-19 ; 22.37-38 ; 2 Ba 9.24-26. yaami. »
12Lumvuki lwa Efarayimi lwakebe,
sumu dyaandi dyasweeku.
13Misoongo mya mukyeetu
wubuta sa myamubaka,
ngo mwaana wakiwulu.
Bukuri mu ntaangu ya kubuta,
nde kapala mu mwooyo nguri yaandi ko.
14Me sa nyabakuula
mu nsi ya bafwa,
sa nyababvuukisa mu lufwa.
Lufwa ! Biyoolo bya ye kuri biri ?
Nsi ya bafwa, mfuukulu yaaku kuri yiri ?
Mboondolo ye yasweeku ha miisu mya me.
15Ti bukuri nde sa kabaanguka
ha kakati dya bampaangi baandi,
kiteembu kya ku esete sa kiisa ;
muwuumunu Yaave wufumuna
kuholosono ku nsi yankatu.
Sa kakanisa kitekulu,
na kusikisa nto ya maampa.
Sa bawoolo bitotolo byobinso byantalu bya mu kisweekulu.
Alliance Biblique du Congo 2024