Eseteere 10
10
Maredoki babweese kumudzaangisa
1Mbyaasi Dzerekese wadzeenge mpaku#10.1 Mpaku mambangukulu makaka maleele ti bisalu bya kukwiikisa. mu nsi yaandi, na mu bibuma byobinso biri mu mubu. 2Biyiriki byobinso byamakwa na bya mpinu bya mbyaasi, na kiteesu ki kadzaangisini Maredoki ; misamu myominso mimyo, myatina mu mukaanda wa mampolo ma bambyaasi ba Medese na ba Perese. 3Maredoki, Muyudayo waba weki mfumu yaboolo ha mambisa ma mbyaasi Dzerekese. Kuri Bayudayo, nde waba weki muutu wadzaangama, wuri bampaangi baandi bobanso bamutiiri. Nde waba salaana mu kusaka bubwe bwa baatu baandi, na kwedzoonsolo mu kiyeengi kya kaanda dyaandi dyodinso.
Alliance Biblique du Congo 2024