Danyeele 2
2
Ndosi yatete ya Nabukodonosori
1Mu mubvu wamyoolo wa kimfumu kya Nabukodonosori, nde walooto mandosi, mutima waandi wabwiila kinkuuku, na tolo twamuwa. 2Mbyaasi waleele ti, bateele bakweteese masuku, bangaa-mimaku, bangaa-mpaanu, Bakalede mpisi biisa bambaangula mandosi mamo. Bo bayende na bateleme ha busu bwa mbyaasi. 3Mbyaasi waleele kuri bo ti : « Me ndootirye ndosi, na mutima waami wabwiila kinkuuku mu nzala kuyaaba yo. » 4Ba Kalede baleele kuri mbyaasi mu ndiinga yaba Arame ti : « Oh Mbyaasi ba na kidziingu kyakila ! Leele ndosi kuri bisari byaaku, na beetu sa twaha mambangukulu ma yo. » 5Mbyaasi wabweese kubvutula kuri Bakalede ti : Kitsimi kya me kiri bu : « Mbuti beenu lwahele kuyaabisa me ndosi, na kumpa mambangukulu ma yo, lo kupaaka balupaaka, na manzo meenu sa bamaba buumbu. 6Ngo mbuti luyaabisiri ndosi na lumperi mambangukulu ma yo, lo sa lwataambula kuri me bimbwanga, na lukiinsu lwangwana kuri me. Mu didyo, leelee me ndosi na mambangukulu ma yo. »
7Bo babvutula lwadzoolo kuri mbyaasi ti : « Hemese mbyaasi kaleele ndosi kuri Bisari byaandi, tumi bisari byaandi bamuha mambangukulu. » 8Mbyaasi wabvutula na waleele ti : Mu ngwanwa, me nyaari ti beenu ntaangu luri mu kulutisa, bukuri beenu luri mu kumono ti, yiyo nzeengulu me nyahoriri. 9Ngo bukuri Beenu lwahele kuyaabisa me ndosi, na kumpa mambangukulu ma yo, lo nzeengulu yoyimosi kuri beenu bobanso. Beenu luyukisinyee mpisi lundeele musamu wampya, na wamawunu, mu kukiingila ti ntaangu yiyiinga. Hango nkuumbu, ndeele ndosi, na me sa nyaaba, kari beenu lwakuka mu kumpa mambangukulu. 10Bakalede babvutula kuri mbyaasi ti : « Kuri muutu ti mosi ko ha butoto wakuka mu kuyirika mari mu kuloombo mbyaasi. Mu bubwo kuri mbyaasi ti mosi ko, bwooso kabeele wadzaangama na mpinu wumwaaloombo musamu wabumabu kuri bangaa-mpaani, bakweteese masuku bunu pe bari Kalede. 11Ntoono yiri mu kuloombo mbyaasi ya mpasi. Kuri muutu mukimi ko, wuri lo yaabisiri mbyaasi, ha yulu banzaambi bari na kibeendu ko ha kakati dya baatu. » 12Mu ntoono yiyo, mbyaasi wabaka nkesi dzamakwa, na waleele badzusa bangaa-madyeele bobanso bari mu nsi ya Babiloni. 13Nzeengulu dzayabukina, ti bari mu kudzusa bangaa-madyeele. Basaka se Danyeele na banduku baandi mu kubadzusa.
Nzaambi wayaabisa mambangukulu ma Ndosi mbyaasi kuri Danyeele
14Danyeele wafuula mu madyeele kuri Aryoke, mukuutu bakebi ba mbyaasi, wunde wubasooriri mu kweedzusa bangaa-madyeele bari ku Babiloni. 15Danyeele wafuula kuri Aryoke ti, mu nki ntoono, mbyaasi kari kaholo nzeengulu dza bu dzi. Aryoke wayaabisa ntoono kuri Danyeele. 16Danyeele wayende na waloombo kuri mbyaasi mu kumuha ntaangu, na nde sa kamuyaabisa mambangukulu ma ndosi.
17Danyeele wabvutuka ku nzo yaandi na wayaabisa ntoono yiyo kuri banduku baandi, Hananya, Misahele na Adzarya, 18mpisi bayingikila ngebe dza Nzaambi ya ku mayulu, mu ntoono mansweeki mamo, mpisi bahele kudzusa Danyeele na banduku baandi, ha kimosi na bangaa-madyeele basiiri kusaala ku Babiloni. 19Nsweeki ya yakana kuri Danyeele mu butsuku mu mamono-miisu. Tumi Danyeele wakeembese Nzaambi ya mayulu. 20Danyeele waleele ti :
Hemese nkuumbu Nzaambi yiba yasakumunu, kuholosono mantaangu mahele kuwa, natee kwakinkulu,
bukuri madyeele na bunkanyi biri bya nde.
21Nde wukitulaa na mantaangu na bilookolo,
nde wudzakisaa na wubwiisaa bambyaasi,
na wuhaa madyeele kuri bangaa-madyeele,
nyaabulu kuri bangaa-nyaabulu.
22Nde wukweyaabisa biri ku musundu, na byasweeke,
nde yaari mari kunsa mampimbisi,
na kusalila kuri kintwaari na nde.
23Ye wuri Nzaambi ya bataayi ba me,
nyikubvutulaa matoondo na nyikudumusaa :
Bukuri ye wampeheeri madyeele na makwa.
Na mu lumalu ye nyabisiiri mamo ma twaloombiri,
mu kutuyaabisa mu musamu mbyaasi.
24Ha mambisa haho, Danyeele wayende kuri Aryoke, wasooriri mbyaasi mu kudzusa bangaa-madyeele ba ku Babiloni. Bu katuula waleele bumabu : « Yaa dzusa bangaa-madyeele bari Babiloni ko. Nata me kuri mbyaasi, mpisi nyimuha mambangukulu ma ndosi yaandi. » 25Aryoke mu mawasu, wanata Danyeele kuri mbyaasi. Na nde waleele ti : « Me nzuukiri muutu mosi mu bankutu babatweesi ku Yuuda, wuha mbyaasi mambangukulu ma ndosi kuri mbyaasi. »
Kiteki kya miilu myadzuka
26Mbyaasi waleele kuri Danyeele, wuri wutelaa se Beletesatsari ti : « Buri ye wakuka mu kuyaabisa me ndosi, yi nyalootiri me na kumpa mambangukulu ma yo ? » 27Danyeele wabvutula ha miisu mya mbyaasi, waleele ti : 28Kuri Nzaambi mosi ku mayulu, yikooyaabisaa mansweeki. Nde yaabisiri kuri mbyaasi Nabukodonosori mimyo mikwiisa, ku manunu biluumbu. Ndosi yaaku na mamono-miisu ma wasiiri ha wabeeri tolo ngo ma : 29Ha yulu mbuka yaaku, oh Mbyaasi, kunsa tolo twaaku, ye tsiminye mu mikwiisa ku mankula ; heki wunde wusoongaa myansweeki, wukuyaabisirye mari mu kwiisa. 30Na me kari mu madyeele manyiri na mo me mvuri na bobanso bamwooyo ko, ngo banyaabisa nsweeki yi kuri ti baha mambangukulu kuri mbyaasi, mpisi ye yaaba bitsimi bya mutima waaku. 31Oh Mbyaasi, ye wabaka kimoni-miisu kya kiteki kyadzaangama. Kiteki kikyo kyakinene, na kusaalila kwaandi kwankimukunu. Kyo kyateleme ha busu bwa ye, na nzelu yaandi yiha boomo. 32Mutu kiteki kikyo waba wawoolo dyatsyeemese, ntulu yaandi na myooko myaandi byaba byamboongo, mwooyo waandi na bito byaba bya nsoongo. 33Miilu myaandi myaba mya kiseengu, ndaambu bitaambi byaandi byaba mu kiseengu na mu tubuumbu. 34Ye mwiini, tari dimosi dihasikiri kwahele kooko kwa muutu, dikumbutiri miilu mya kiteki mya kitari na mya tubuumbu, na mikosikiri. 35Ha kimosi, kitari, tubuumbu, nsoongo, palata na woolo biwiiri kutsyamikina, byeki bunu ndiimbu yinaangukini ku yulu mu ntaangu ya kikala ; kiteembu kyabinata kwahele kusiisa mpoonono. Nkani kuri tari dyabwiirikiri kiteki dyakituka mulaandu wamunene, na dyaluulusa butoto.
36« Yiyo ngo ndosi. Beetu tuha mambangukulu ha busu bwa mbyaasi. 37Oh Mbyaasi, ye mbyaasi ya bambyaasi, bukuri Nzaambi ya mayulu wakuheeri kimfumu, mpinu, makwa na nkeembu. 38Kwokunso kwadzakala baala ba baatu, bibulu bya musitu, banoni ba mayulu, wayakisa byo mu myooko mya ye. Wakusuusa mutumi ha yulu byobinso. Ye ngo mutu wawoolo. 39Ha mambisa ma ye, sa kwateleme kimfumu kikimi, kiri makwa mantele na kya ye. Tumi kimfumu kyabitatu, kiri mu kifwaani kyansoongo sa kituma butoto bwobunso. 40Kimfumu kyabina sa kyaba na makwa bunu kiseengu. Bunu buri kiseengu kibulaa na kitsamunaa byobinso. Kimfumu kikyo sa kyakosono na sa kyanyifuna bimfumu byobinso bibyo. 41Ye mwiinyee bitaambi na mileembu mya mu miilu miri myakaka mu tubuumbu, na myakimi mu kiseengu : Kimfumu kikyo sa kiba kya kabu. Sa kyaba na mpinu dza kiseengu, bunu bu mwiinye kiseengu kyasaanga na tubuumbu. 42Ngo mileembu mya mu miilu myaba kibari kyakiseengu na kibari kyatubuumbu ; ndaambu kimfumu sa yaba na makwa, na yakaka yadeke. 43Mu bukuri ye mwiinyee kiseengu kyasaanga na tubuumbu, bo sa babvuutuna mu nyukusunu ya baatu. Ngo wunde na wumawu bayukusina ko, bunu buri kiseengu na tubuumbu basangisinaa ko. 44Mu biluumbu bya bambyaasi babo, Nzaambi ya mayulu sa katelemese kimfumu kya mibvu ngo mibvu, kyahele nsyamukunu. Kimfumu kikyo kiba kunsa lutumu lwa baatu bakimi ko ; kyo sa kyakosono, sa kutsyaamina bimfumu byobinso bibyo, ngo kyo-meene sa kyateleme kwakinkulu. 45Bunu bu wamwiini ye, bwa patikiri tari ku yulu mulaandu, kwahele kooko kwa muutu, dyatsyamikisi kiseengu, kitari, tubuumbu, nsoongo na woolo. Nzaambi yadzaangama wuri mu kuyaabisa kuri mbyaasi mamo mayirima. Ndosi yangwanwa yiri, na mambangukulu mayelemene mu kusiila nsiitu. »
46Hanaho, mbyaasi Nabukodonosori wabwa dya busu, watsukuma ha mankula ma Danyeele. Mbyaasi watuma baha kuri Danyeele bikabu na byamfuku yayibwete. 47Mbyaasi waleele kuri Danyeele ti : Mu ngwanwa Nzaambi yeenu ngo Nzaambi ya banzaambi, Muyikisi bambyaasi, wuyaabisaa mansweeki, bukuri ye bangisini kubaangila mansweeki mamama. 48Mbyaasi wadzaangisa Danyeele, wamuha bimbwanga na busina bwalaka, na lutumu lwa nkoonsi yoyinso ya Babiloni : Wamusuusa mukuutu bamfumu, na mukuutu bangaa-madyeele bobanso ba Babiloni. 49Danyeele waloombo kuri mbyaasi kaha lutumu lwa nkoonsi ya Babiloni kuri Sadaraki, Mesaki na Abede-Nengo. Nde-meene Danyeele waba weki kisari kya mbyaasi.
Alliance Biblique du Congo 2024