Biyiriki bya Bantumu 21
21
Poolo weensi ku Yerusalemi
1Tumanaa kuhaambuka na bo, beetu twayende mu bwaatu, na twasuunguma mu mawasu, na twatubuka ku bula buri nkuumbu Kosi. Tumi mu kiluumbu kyanama twatubuka ku Lodesi, na tuyisikaa haho tweensi ku Patara. 2Bu twabaka bwaatu haho, dyaba kweende ku Fenisi, tukotiri na twayende mu mubu. 3Bu twatubuka bebele na Sipere, tusiisiri bula bubwo ku mpele yalumoso, na twayende mu bwaatu ku Siri na twasunduka ha Tire, bukuri bwaatu bwaba na bitotolo bya kusundula haho. 4Bu twabaka bayiki haho, twalutisa biluumbu nsaamu kintwaari na bo. Mpeeve ya batwaalisa mu kuleele kuri Poolo, ti yaa keende ku Yerusalemi ko. 5Biluumbu bya kulutisa haho bu byawa, beetu twayende. Bo batufila mu kintwaari, na bakasi na baala, natee ku mbisa bvula, na bu twatsukuma ha simu dya mubu ha twasaambila. 6Tumi bu twahelesene mamboto ma kuhambikisa, ha twanwaata mu bwaatu, na bo babvutuka kunsa bvula. 7Beetu twasukisa nyendukulu ya mu bwaatu mu kuyisika ku Tire na kwesunduka ku Petolemayisi. Bu twahelesene mamboto na bampaangi, ha twalutisa kiluumbu kyakitsiina na bo. 8Kiluumbu kyanama beetu twayende na twatubuka ku Sedzare, na twakoto mu nzo dingisi diri nkuumbu Filipo, nde waba mosi mu bo nsaamu ; tumi ha twadzakala ha nzo nde. 9Nde waba na baala babakyeetu banswaasa bana baba bikulaana. 10Bu twaba tweki haho mwaabiluumbu byalaka, mubikiri mosi nkuumbu Angabo, wanangukini ku Yuuda, wakulumuka, 11na wayisa kuri beetu. Bu kaholo musweele Poolo, wakaanga miilu na myooko mya nde-meene, na waleele ti : Mpeeve wuleele bumabu ti : Muutu ngaa musweele wu, Bayudayo sa bamukaanga bikonyi bumabu ku Yerusalemi, na kumuyekele mu myooko mya bangooyi. 12Tumanaa kuyuka bubwo, beetu na baatu baba ha kibeendu kikyo, twayingukila Poolo, ti yaa katoomboko ku Yerusalemi ko. 13Haho, Poolo wabvutula ti : "Nki ludila na kutabula me mutima ? Me nyayirima, kari mu kunu kuri ti bankaanga bikonyi ko, ngo na mu kufwa ku Yerusalemi mu nkuumbu ya Mfumu Yisu." 14Ngo bukuri nde waba wahele kutaambula mamo, beetu twawuriri kweetu, na twaleele ti : "Hemese kutya kwa Mfumu kuyirima !" 15Tumanaa kulutisa biluumbu bibyo haho, ha twatoomboko ku Yerusalemi. 16Bayiki ba ku Sedzare bayende kintwaari se na beetu, na batunata ku nzo muutu waba tutaambula, muutu wunde nkuumbu Naasoni, wa ku Sipere, waba wayeki muyiki na kidzika.
Poolo wayende kwemono Yaakobo
17Tumanaa kutubuka ku Yerusalemi, bampaangi batutaambula mu kiminu. 18Mu kiluumbu kyanama, Poolo na beetu, twakoto mu nzo Yaakobo, kwaba se bakulu bababakala bobanso. 19Bu kabaha mamboto, wabeke kubayaabisa musamu mosi mosi, mu myayirikiri Nzaambi, mu kisalu kya nde, ha kakati dya bangooyi. 20Bo bamana kuyuka mamo, bakeembese Nzaambi, na bamuleele ti : "Mpaangi, moneeti, mburi mafuunda ma bamwaasa kanyi ha kakati dya Bayudayo, na bakaangama kunsa mangisi. 21Ngo bo bari mu kweyuka mu ntoono ya ye ti : Ye wukweyikisa kuri Bayudayo, bari ha kakati dya makaanda ti, yaa bayirika baala bubakala ko, na yaa banama bifu bya Bayudayo ko. 22Ngo kusiila buri ? Bo bee bayukiri ti ye mwaakwiisa. 23Yirika ma tukuleele beetu. Beetu turi na baatu bana hamaha bamwaasa nsiilulu mu bo-meene. 24Baholo na sa nsyemusunu kintwaari na bo, na baha mboongo mpisi batebe makungulu mu mitu, na baatu bobanso sa bayaaba ti myominso mi bayukiri mu ntoono ye myabuunu, ngo ye-meene wukwedyaatila kunsa mangisi. 25Ngo kuri bangooyi babo bamwaasa kanyi, beetu twatinini kuri bo ma twakaangiri ti : Bo yaa beedya toongo twa bibulu byadzusu mu kikabu kuri biteki ko, makila se kudya pe, toongo twa bibulu byadzusa mu nsukusulu muwuumunu se kudya pe, kimpala se kuta pe. 26Haho, mu kiluumbu kyanama, Poolo waholo babakala babo, wabaandika kusa nsyemusunu kintwaari na bo, tumi wakoto mu Nzo-Nzaambi, mu kuyaabisa nsukulu biluumbu bya nsyemusunu, natee kiluumbu kibaha kikabu, mu mosi mosi mu bo.
Poolo bamukaanga mu Nzo-Nzaambi
27Biluumbu byo nsaamu bibaanaa byeki suka, Bayudayo ba ku Adzya, bamono Poolo mu Nzo-Nzaambi, na bakotoso kisaangala mu mpuumbu yoyinso, na bamukaanga. 28Bo babeke kubikisa ti : "Babakala ba Iselili, wasee lutubakisa ! Muutu wumawu wukweha nyikusulu kuri bobanso, na mwomunso, dzahele bubwe mu kaanda, mu mangisi na mu kibeendu ki ; ha yulu haho se nde mwaakotoso Bangereke mu Nzo-Nzaambi, na mwaasumuna kibeendu kyangisi ki. 29Bo baba bamwaatekesele kumono Terofime wa ku Efeso, kunsa bvula, kintwaari na nde, na bo baba kutsima ti Poolo mwaamukotoso mu nzo-Nzaambi. 30Kisaangala kyabwa mu bvula dyodinso, na baatu bobanso bakutukuna. Bu bakaanga Poolo, bamukoko ku mbasi Nzo-Nzaambi, na hanaho, bo bakaanga myeelu. 31Bu baba beki saka kumudzusa, musamu watubuka kuri Kumanda, ti kisaangala kimwaakoto mu Yerusalemi dyodinso. 32Mu mawasu-mawasu, nde waholo bayongolo, na bakuutu ba mikaangu mya nkama bayongolo, na badzumuna kwaba baatu babo. Bo bu bamono Kumanda, na bayongolo, ha bahoto kulata Poolo. 33Haho, Kumanda, bu kakokosolo wakaanga Poolo, na watuma ti bamukaanga mu masyeene moolo. Tumi nde wasaka kuyaaba, muutu wu na kari, na nki kayirikirye. 34Ngo kunsa mpuumbu, bamaba kuleele mi, bakaka kuleele mikimi ; na nde kasii yirika kuyaaba lumvuki ko, mu ntoono kisaangala. Nde watuma bamunata ku lupaangu lwadzakala bayongolo. 35Poolo kabaanaa weki ha kikaari, bayongolo bamunata bukuri mpuumbu yaba na kabala dyalaka. 36Baatu ba bu fundu-fundu babakwenamaana na bakwebikisa ti : "Mudzusa !"
Poolo wakalila nyutu
37Babaanaa beki baandika kukoto ku lupaangu ludzakalaa bayongolo, Poolo waleele kuri mukuutu fuunda dya bayongolo ti : "Buri me nyiri na miswa mu kuleele ntoono kuri ye ? Nde wamuleele ti : "Ye yaari Kingereke ? 38Buri ye wuri muutu wa ku Ngipiti, wabee kotoso kisaangala, mu biluumbu bi, na kunata bangaa-tungu 4 000 ku nsi yankatu ko ?" 39Poolo waleele ti : "Me Muyudayo, nyabutuka ku Taresi, mu nkoonsi ya Silisi, nyiri muutu wa bvula dyayabakana kwalaka. Me nyikuyingukiri ti , ha me miswa, me nzoonso kuri baatu ba." 40Bu bamuha miswa, Poolo wateleme ha yulu kikaari, na wanaanguna kooko mu kusa kidiimbu mpisi baatu bawura. Baatu bobanso bu bawura na pwooro, nde wabadzoonsolo mu ndiinga ya Kihebereho.
Alliance Biblique du Congo 2024