2 Tesalonika 3
3
Nsyamusunu mu lusaambulu
1Mu misiiri, bampaangi, saambileenu mu beetu, mpisi heki maampu ma Mfumu maba mayabakana na maba makeembele bunu bu mari kuri beenu. 2Saambileenu se mpisi heki beetu, tukuuluka mu myooko mya baatu bangaa-kibakala, na bari na mutima bubi ; bukuri bobanso bahele na kanyi. 3Ngo Mfumu wakwiikama, nde sa kalukumisa na kulukala mu Ngaa-bubi. 4Beetu turi na kanyi mu Mfumu mu ntoono beenu, bukuri mamo maturi mu kulutumaa, beenu luri mu kumayirakaana, na sa lwanamitina kumayirika.
5Hemese Mfumu katwaalisa mitima myeenu, mu ntiilu ya Nzaambi, na mu kifiki kya Kiristo.
Mufunu kisalu
6Bampaangi, beetu tululoombiri mu nkuumbu ya Mfumu yeetu Yisu Kiristo, mu kutatuka la na mpisi mpaangi, yi kwedyaatila kunsa kisaangala, kwahele kuyelemene na kikulu ki lwataambula kuri beetu. 7Beenu-meene luyaari bunu bwa kusombosolo beetu. Bukuri beetu twasii natina kidziingu kunsa kisaangala, ha kakati dya beenu ko. 8Beetu twasii kudya byandya bya muutu kwabuunu ko ; ngo kunsa kisalu kyamakwa na kunsa mpasi, butsuku na mwiini, beetu twasala mpisi heki mu beenu, muutu kahele kutubuungula. 9Kari bukuri ti beetu twaba twahele na miswa ko, ngo beetu twaba tutiiri kulusoongo mu beetu-meene, kifwaani kyayelemene kunama. 10Mukwongo, mu ntaangu yitwaba kuri beenu, beetu twaba luleelaana ti : Mbuti muutu katiiri kusala ko, lo yaa kadya se ko.
11Ngo beetu turi mu kweyuka ti bakaka mu beenu, bari mu kwedyaatila kunsa kisaangala, bahele kwesala, kasi bakwenama misamu myahele mufunu. 12Beetu tuloombo na tusyaamisa baatu ba bubwo, mu nkuumbu ya Mfumu Yisu Kiristo ti : Basala mu kidzuunu, mu kubaka bya kudya bya bo-meene.
13Beenu ngo bari, bampaangi, yaa luholo bito ko mu kuyirika mamabwe. 14Mbuti kuri muutu wahele kutambikila, maturi mu kuleele beetu mu mukaanda wu, lo kebee dyo, mu kuhele kubweese kuba kintwaari na wabubwo, mpisi kamono nsoni. 15Yaa lumuhololo bunu mutaatu ko, ngo museembeenu bunu mpaangi.
Lusakumunu na mboto
16Hemese Mfumu ya kiyeengi, nde-meene kaluha kiyeengi, mu mantaangu momanso na mu myominso. Mfumu kaba na beenu bobanso.
17Mboto yi ya mu kooko kwa Me-meene Poolo, kidiimbu mu mpisi mukaanda, wunkootinaa kiri bumabu.
18Hemese bweese bwa Mfumu yeetu Yisu Kiristo, buba na beenu bobanso.
Alliance Biblique du Congo 2024