2 Samweele 7
7
Lusiilulu lwa Nzaambi kuri Daavidi na bilesi byaandi
(1 Mp 17.1-15)
1Mbyaasi Daavidi bu kadzakila mu nzo yaandi, Yaave wamuha kidzuunu, ha kakati dya bataatu baba bamudyengekele, 2mbyaasi waleele kuri Natani mubikiri ti : « Mono, me nyiri mu nzo ya mabaya ma mbuyu#7.2 Manzo ma miti mya mambuyu., ngo nkobo Nzaambi yiri munsa nzo yangooto. » 3Natani waleele kuri mbyaasi ti : « Yende, yirika myominso mi wuri mu kutsima, bukuri Yaave wuri na ye. »
4Butsuku bunubwo mbeembu Yaave yayukuna kuri Natani mu kumuleele ti : 5Yende weleele kuri kisari kyaami, Daavidi ti : Bumabu Yaave kari mu kuleele : Buri ye wuntuungila me nzo, kuri heki me nzakala mu yo ? 6Me nyadzakiri mu nzo ko kuholosono kiluumbu ki nyapalisiri baala ba Iselili ku Ngipiti natee mu kiluumbu kimaki, ngo mu nzo yangooto me nyabeeri kweyeende. 7Kwokunso ku nyabeeri kweyendaana na Iselili dyodinso, buri me nyaleele ntoono kuri kaanda ti dimosi mu makaanda ma Iselili ma nyatumisini me mu kudiisila Iselili, kaanda dyaami ? Buri me nyaleele ti : « Bukuri nki beenu lwahele kutuungila me nzo ya mbuyu ? » 8Mu lumalu, yende weleele kuri kisari kya me Daavidi ti : "Bumabu Yaave ngaa-mikaangu kari mu kuleele, me nyakuhoriri ku waba kwediisila bibulu, ha mambisa ma mpuumbu bibulu, mu kuba mfumu kaanda#7.8 Kuholo ku kibeendu ki bakoo disiila bibulu : Kumono 1 Sa 16.11 ; mfumu Iselili ; kumono 5.2. dyaami Iselili 9Me nyabee na ye kwokunso ku wabee kweyendaana ; me nyadzusiri bataatu ba ye bobanso ha busu bwaaku. Me sa nyasa nkuumbu ye mvuumfu bunu ya baatu ba babanene ha butoto. 10Me sa mpa kibeendu kuri Iselili, kaanda dyaami, me sa nyimusuusa haho, mpisi kadzakala ha kibeendu kyaandi. Nde kabweese kweyiima ko, na bangaa-bubayi babweese kumukwaamisa ko bunu mu ntaangu yantama, 11Kuholosono kiluumbu ki nyasuusiri me babvuukisi mu Iselili, kaanda dyaami. Me nyakuheeri mpuumunu ha busu bwa bataatu baaku bobanso na Yaave wakuyaabisa ti Yaave sa kakuyirikila nzo. 12Ntaangu yikuka biluumbu bya ye, na ha wuba ye waneŋene ha kakati dya bataayi baaku, me sa ntelemese bilesi byaaku ha mambisa ma ye, na wunde wunangukina mu mwooyo ye me sa nsyaamisa bumbyaasi bwaandi. 13Nde mbasi tsuku wutuunga nzo mu nkuumbu me na me sa nyasyaamisa mboloko ya bumbyaasi bwaandi kwakinkulu. 14Me sa nyaba mu nde taayi, na nde, sa kaba kuri me mwaana. Mbuti nde siiri bubi, me sa nyimuseembe mu luboto lwa babakala na mu ndatulu ya baatu. 15Ngo nkwikumunu me yiba yayusula kuri nde ko, bu nyasiiri mu Sawuli, wu nyayekiri ha busu bwa ye. 16Nzo ye na nsi ye ya bumbyaasi sa biba byatswiikusu kwakinkulu ha busu bwa ye ; mboloko yaaku sa yaba yasyaamusu natee kwakinkulu." 17Natani watubula maampu momanso mamo na kimono-miisu kyokinso kikyo kuri Daavidi.
Lusaambulu lwa Daavidi
(1 Mp 17.16-27)
18Haho mbyaasi Daavidi wayende na wadzakala ha mankula ma Yaave, na waleele ti : « Me na nyiri, Mfumu Yaave, na nzo me nki yiri, mu kuri ti ye nata me natee hamaha ? » 19Ngo mimyo myakiri myantele ha miisu mya ye, Yaave Mfumu. Ye wadzoonsolo se mu nzo kisari kya ye mu ntaangu yantama. Lulwo ngo lutumu lwa kidziingu kya muutu, Mfumu Yaave. 20Nkya dyo Daavidi kabweese kudzoonso kuri ye, Mfumu Yaave, ye yaari kisari kyaaku, 21Mu ntoono mbeembu yaaku na bunu buri mutima ye, ye wayirika bitotolo byobinso byabinene bimabi, mu kubiyaabisa kuri kisari kyaaku. 22Ngo nkuumbu ye wuri wamunene, Mfumu Yaave, bukuri kwahele muutu wuri bunu ye, na kwahele Nzaambi yikimi ha yulu wuni ye, mu kuholo myominso mituyukiri. 23Kuri kaanda diri bunu Iselili ha butoto, kaanda dyaaku, diri banzaambi badikuula mu kudiisa kaanda dyaaku, na kudiha nkuumbu ? Ye wasa mamanene mu bo, ye wasa biyiriki byansisi mu nsi yaaku, ha busu bwa kaanda di wakuuriri ku Ngipiti, mu mansi maaku na banzaambi baaku, mpisi yiba ya ye. 24Ye wasyaamisa mu ye-meene kaanda dyaaku Iselili mpisi diba kaanda dya ye kwakinkulu, na ye Yaave weki mu bo, Nzaambi yaaku. 25Mu lumalu Yaave Nzaambi, kebe kwakinkulu maampu ma waleele mu ntoono kisari kyaaku na nzo yaandi, wumatelemese kwakinkulu na yirika bunu bu wabeeri waleele. 26Nkuumbu ye yiba yayinene kwakinkulu, na kuri baleele ti : « Yaave ngaa-mikaangu ngo Nzaambi mu Iselili ! » Hemese nzo me, Daavidi, kisari kyaaku, yiba yasyaamusu ha busu bwa ye ! 27Bukuri ye-meene Yaave ngaa-mikaangu, Nzaambi Iselili, ye wayaabisiri me : « Me sa nyakutuungila nzo ! » Ngo nkuumbu me nziburyeenu mutima mu kusa lusaambulu lumalu kuri ye. 28Mu lumalu, Mfumu Yaave, ye wuri Nzaambi, maampu ma ye mari ngwanwa na ye wayaabisiri me dyadibwe. 29Mu lumalu, hemese sakumuna nzo yaami, mpisi heki yidziingila kwakinkulu ha busu bwaaku ! Bukuri ye, Yaave Nzaambi, dzoonsiri, na mu lusakumunu lwaaku nzo yaami yiba yasakumunu kwakinkulu.
Alliance Biblique du Congo 2024