2 Peetelo 2
2
Bayikisi bampya
(Yud 4-13)
1Kwaba babikiri bampya kunsa baatu, bunubwo se, sa kwaba bayikisi bampya ha kakati dya beenu. Bo sa bakotoso mu madyeele nyikusulu dza nzimbusulu, na sa batuna Mfumu yabakuula. Bo sa basakisa mfukusulu ya bo-meene nasisuu. 2Baatu balaka sa babanama kunsa buyala bwaaku ; na mu ntoono bo, nzila yangwanwa sa yaba yasaanu, 3na mu ntiki-mboongo, mu nzoonsulu dzalupyelu bo sa babadiila manene. Kuri bo kuholosono na kidzika, mutsuundu wuri mu kwesala, na mfukusulu yaaku yahele kubwa tolo.
4Mukwongo, Nzaambi kasii wuungula bambasi basumukini ko, ngo wabakaangiri mu bikonyi, na wabatubiri ku lubila lwa mampimbisi, ku kari kabawuunguka mu ntoono mutsuundu. 5Nsi yayikulu se nde kasii kuyiwuungula ko, ngo wabvuukisiri Nowa muutu wampoomo, muyaabisi nsungumunu, ha katweesi mbuukulu maampa mu nsi ya baatu bahele na kinzaambi. 6Nde wakese mukanu wa mfukusulu kuri mabvula ma Sodomo na Ngomoro, bu kamakitula lufuta, mu kusoongo kuri baatu bahele na kinzaambi, kifwaani kya mamo makwiisa ku mankula. 7Nde wabvuukisiri Loti ngaa-kusuunguma, waba kwebamaana mu ntoono ndyaatulu dza buyala, dza baatu bahele na mangisi. 8Mukwongo, nde ngaa-kusuunguma, bu kaba kwedzakalaana ha kakati dya bo, mu kiluumbu ngo kiluumbu, nde waba kwebamaana mu muheebulu waandi wasuunguma, bu kaba kwemonaana na kweyukaana mamabi ma babakweyirikaana. 9Mamo masoongo ti, Mfumu yaari kukuula bangaa-kinzaambi mu mpasi, na kukebe bahele kusuunguma mpisi baba baseembu, mu kiluumbu kya mutsuundu, 10mbiki ti babo batiiri kweyukutisa muswiinyi, mu nyiimunu dzasumuka, na bakwenyaafuna bumfumu.
Babo ngo bangaa-nzala-kubila, bangaa-masiiku bahele na boomo mu kwesaana biluunsi bya nkeembu, 11koomosoko na bambasi, babvuri makwa na mpinu, bahele kuteesele biluunsi bya nkeembu bibyo, nzoonsulu dza nsaanunu, ha busu bwa Mfumu. 12Baatu babo bakwesaana bi badziimbiri, ngo bo se sabafwa bunu bibulu byahele na madyeele, bi bayirikiri mu ntoono yiri ti, byekaangama mu myeete kuri babidzusa . 13Bo sa bataambula mamabi bunu mufutu wa mamabi. Bo bakwemono kiminu, mu kweyukitisa manzala ma muswiinyi nkati mwiini. Bo ngo mviindu na nsoni, bakwemono luwu mu mpya dzaaku, mu kweyirika minkeembu mya ndiilu kintwaari na beenu. 14Miisu mya bo myaluula mu kimpala, na banamitina mu kweyirika masumu. Bakwekoondo baatu bahele kukwiikama, mitima mya bo myayuku mu ntiki-mboongo, bo ngo baala ba mpopi. 15Bu bamana kusiisa nzila yasuunguma, bayeki bawumuka mu kwenama nzila ya Balahami; mwaana Bosora watiiri mufutu wa mamabi. 16Nde wataamburi biŋaŋunu, mu ntoono kusinina kwa mangisi kwa nde-meene : Mpuunda ya baba bu yapalisa mbeembu ya muutu, yahotoso bulawuku bwa mubikiri.
17Baatu babo ngo manto mahele maampa, mibuungi mikweyende mu kiteembu. Bo bari babawungukila mampimbisi mabubokoro. 18Mukwongo, bakwedzoonso misamu myaminene myahele mufunu, bari mu kwekoondo mu nyiimunu dza muswiinyi, mu buyala, babo babvuukila ha wuri dya mukuungi dya baatu bawumuka. 19Bo bakwetaasila baatu bunsaalisi, buni bo-meene bankutu ba bifu byabibi. Bukuri, mpisi muutu wuri nkutu kuri bibyo bikari katumuma. 20Mukwongo, mbuti babaanaa bamwaabvuuka mu nsumukunu dza nsi, mu ntoono nyaabulu ya Mfumu, na Mubvuukisi weetu Yisu Kiristo, babweesiri kuba bakaangama lukimi mu nsumukunu dzidzo, na beki batumuma, lo kiteesu kya bo kisyeeriri, kyeki kibvuriri bubi ti na kyatete. 21Mukwongo, bwaketi kubvulila bubwe kuri bo, mu kuhele kuyaaba nzila yansungumunu, ti na kuri bamanaa kuyiyaaba, bayekiri lutumu lwangisi, lubari babatubukila. 22Maleele nkuma yangwanwa mamwaa kubatubukila : « Mbwa yibweesiri kubvutukila biluku byaandi », na : « Ngulu yibayoosiri yibvutukiri ku tamba. »
Alliance Biblique du Congo 2024