MRK 16
16
पुनरुत्थान इंगा येशुनदी स्वरुप — 16:1-20
येशुनदी पुनरुत्थान
1शब्बाथदी दिनमु संपाशा आप्पुड मग्दालीया नगरलोनदी मरीयाद, याकोब आम्मा मरीयाद इंगा सलोमीद इर वानकी तीक्केदेंक सुगंधित नुन्या कोंका वच्चीर. 2इंगा हफ्ताद पहिला दिनमुनाड, फद्दु फुट्टीन नग्रेम वार कबर तीकुड फोईर. 3वार वगामेगारनी आंदुर की, कबर मुती मिंदुडदी मना इचांग राय यवार बाजुक दोब्यार? 4मंग वार फैनिक सुशीर इंगा वारकी राय दोबीनेद कमशा. आदी शेंगेम फेद्दाद उंड्या. 5वार कबरला लोनीक फोईर आप्पुड वारकी नवल वाटाशा. वारकी वगा जवान मनशी मंची शेय तीकुड कुसनीनोड कमशा. वाड तेल्लांग झगा फेटकुनीन्या. 6वाड वारनी आन्या, यरस्कुनाकुंडा, मीर नासरेथकर येशुन यवान क्रुस मिंदा लटका मतीनीर वान फुडकुतुनार. पण वाड लेशीनाड, इंदु लेड. वार वान फेटनीर आदी जागा सुडना. 7फोंडा इंगा वान शिष्यलकी इंगा पेत्रक पण शपना की, वाड मिकाना मुंची गालील प्रांतकी फोयतुनाड, वाड मिक शप्पीनेलेका आंदु वाड मिक कमशी. 8मंग वार बैटीक फोईर, इंगा येरपु इचांग कबर लोन्केल फारीर. वारकी आश्चर्य आय्या. वार यवारकीच येमीच शप्पालेद येनटीक की वार येरस्कुनीर.
मरीया मग्दालीनीक येशुनदी दर्शन
9हफ्ता पहिला दिनमु नाबद येशुड लेशीनेंका वाड पहिला मग्दालीया नगरलोन मरीयादान, यादान देगार केल वाड योड दैयाल तिशीन्या, दानकी पहिला दर्शन इच्या. 10आदी फोया इंगा येडशेतोर वान शिष्यलकी इदी बातमी शप्या. 11वार इनीर की वाड जिवंत उंडाड इंगा आदी वान सुशीनाद. आप्पुड वार दान माटा मिंदा विश्वास फेट्टालेद.
इद्दार शिष्यलकी येशुनदी दर्शन
12दिन नंतर वार लोन्केल इद्दार शिष्यल यरुशलेम दावाता उर तीकुड फोयेताप्पुड येशुड वारकी इंगोगो रुपता प्रकट आय्या. 13वार वापस वच्चीर इंगा इंगोगोरकी शप्पीर, पण वार-वार मिंदा पण विश्वास फेट्टालेद.
अकरा शिष्यलकी येशुनदी दर्शन
14मंग अकरा शिष्यल तिनेताप्पुड येशुड वारकी कमशा. वाड शिष्यला अविश्वास इचांग इंगा वार अंतकरण कठोरपणा इचांग वारनी बेद्रीच्या, येनटीक की यवार वान लेशीनेंका सुशीनीर वार मिंदा वार विश्वास फेट्टालेद.
15वाड वारनी आन्या, “आंता दुन्यामलोंग फोंडा इंगा आंता पृथ्वीक सुवार्ताद घोषणा शेयना. 16यवाड पण विश्वास फेट्टी इंगा बाप्तिस्मा तिस्कुनी वानदी तारण आय्यी, पण यवाड विश्वास फेट्टाड वानकी शिक्षा आय्यी. 17पण यवार विश्वास फेट्ट्यार वार जताक इ चिन्हल आय्यी, वार ना फेरता दैयाल तिशार, वार कोत्ता-कोत्ताय भाषाला माटलाड्यार. 18वार स्वता शेयता फामुल येत्यार इंगा वार याद पण जेम फोयेद पदार्थ तागते तरी वार सय्याक फोयार. वार बिमार मंदी मिंदा शेय फेट्ट्यार इंगा बिमारोर शिंगार आय्यार.”
प्रभु येशुनदी स्वर्गला फोकाम
19मंग प्रभु येशुड वार जताक माटलाडीनेंका वान स्वर्गला तिस्कुनेदेंक वच्या इंगा परमेश्वर मंची शेय तीकुड फोई कुसन्या. 20शिष्याल बैटीक फोईर इंगा वार प्रत्येक जागाला सुवार्ताद घोषणा शेशीर. प्रभुड वार जताक फनी शेस्का उंड्या इंगा वाड वचन जताक उंडीने चिन्हलनी मजबुत शेस्का उंड्या. आमेन.
Valgt i Øjeblikket:
MRK 16: WNT
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
