1CO 8
8
प्रेषितलाद मोकळीकता — 8:1—11:1
मुर्तीलाक यक्पीचीनेद आन्नाम
1'इप्पुड मुर्तीलाक यक्पीचीने नंजुर बद्दल, दिन बद्दल मनाक आंदारकी यरका उंडाद की इदी आनीनेद माटा उंडाद; पण आदी ज्ञान मनशीन घमंडी बनाय मतताद, तर प्रेम मंदीन विश्वासला प्रोत्साहित शेस्ताद. 2मनाक वगा माटा यरका उंडाद, यवानकी इल्ला वाटास्ताद की, वानकी येमाना यरका उंडाद पण वानकी आल्ला यरका लेद यल्ला वानकी यरका बेक. 3पण यवाडाना परमेश्वर मिंदा प्रेम शेस्ताड तर आ मनशीन परमेश्वर गुरतु फटताड. 4दिनिचांग, मुर्तींला मुंदार यक्पीचीने माटलु तिने बद्दल मनाक यरका उंडाद की, “खरेम आंटे दुन्यामला मुर्तीद येमीच अस्तित्व लेद” इंगा “वगान इडशी इंगा यवाडुच परमेश्वर लेड,” 5काही मंदी इल्ला आंटार स्वर्गला इंगा पृथ्वी मिंदा शेंगेम द्यावारलु उंडाय, येनटीक की काही मंदी शेंगेम द्यावारलाद इंगा शेंगेम प्रभुलाद पुजा शेस्तार,
6पण मना इचांग फक्त वक्काडे परमेश्वर उंडाड, यवाड मना आब्बाड उंडाड.
वान इचांगे मनाम जगास्ताम इंगा
वाडे आंता बनाय मतनाड
इंगा वक्काडे प्रभु येशु ख्रिस्त उंडाड.
वाननोट आन्नी माटलु अस्तित्वला वच्चीनाय इंगा वाननोटे मनाद जीवन उंडाद.
7पण इदी ज्ञान प्रत्येक मनशी देगार लेद येनटीक की काही मंदी इप्पुड पण मुर्तीला जताक इंता जुळाशी उंडार, तर वार यप्पुड मुर्तीलाक यक्पीचीनेद आन्नाम तिंटार वारकी वाटास्ताद की इदी मुर्तीलाक यक्पीचीनेद उंडाद इंगा वारदी विवेक निर्बल उंडीने इचांग अशुद्ध आय फोयताद. 8पण आन्नाम मनालनी परमेश्वर देगार येकाफोद, मनाम आदी तिनाक उंटे तरी येमीच नुकसान लेद इंगा तिंटे येमीच फायदा लेद. 9पण मिद इदी स्वातंत्र्य विश्वासला कमजोर उंडीने मंदी इचांग, यादुच प्रकारे, अडखळन कावाराद आंका काळजी तिस्कोंडा. 10जर यवारदी आना विवेक कमजोर उंडाद इंगा वाड नी लेकोन ज्ञानी मनशीन मुर्ती उंडीने भवनला तिनेताप्पुड सुस्ते, तर वाड मुर्तीलाक यक्पीचीनेद आन्नाम तिनेदेंक उत्साहीत काक फोई येम? 11इंगा नी इल्लोन ज्ञान इचांग विश्वासला कमजोर उंडीने नी तम्मुळ्ळाद इंगा शेल्यांलाद आत्मिक रुपता नाश आय फोई यवार इचांग ख्रिस्तड जेम इडशा. 12पण मीर यप्पुड इल्ला मी विश्वासी आक्का तम्मुळ्ळा विरुद्ध पाप शेशी वार कमजोर विवेककी तकलीफ इस्तार, आप्पुड मीर ख्रिस्तन विरुद्धला पाप शेस्तार. 13दिनिचांग, जर नाद तिनेद आन्नाम ना विश्वासी तम्मुन इंगा शेल्याल इचांग पापदी कारण आयताद तर निन वार इचांग पाप शेशेद कारण कावाराद दिनिचांग निन वापस यप्पुडुच नंजुर तिनाक फोयान.
Valgt i Øjeblikket:
1CO 8: WNT
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind