1CO 3
3
मनसुलाद अनुकरण शिंगार लेद
1हे आक्का तम्मुळ्ळालाला, यल्ला निन आत्मिक मंदी जताक माटलाडतान आल्ला मी जताक माटलाडी शकायालेद. पण नाक मी जताक दुन्यामलेका नडशेतोर मंदी लेका इंगा ख्रिस्तला बिळ्ळालेका माटलाडा बेक आय्या. 2निन मिक परमेश्वर संदेशता फक्त सोपा माटलु नेरपुतीन, यल्ला वगा आम्मा दान बिळ्ळाक तागेदेंक फक्त फाल इस्ताद, निन मिक दिन काना कठीन माटलु नेरपालेद याय फक्त पक्का विश्वासी मंदी समजाशी शकास्तार, येनटीक की मीर इप्पुड नंताक इल्लोनदी शिक्षा समजाशेदेंक तैयार लेकुंटीर इंगा इप्पुड पण समजाशेदेंक तैयार लेर. 3मीर इप्पुड पण शारीरिक उंडार येनटीक की मी लोना कोफाम इंगा जगडाल उंडाय, तर मीर शारीरिक लेर येम इंगा दुन्यामलोन मंदी लेका नडवार येम? 4येनटीक की यप्पुड वगाड आंटाड, “निन पौलनी मानास्तान,” इंगा इंगोगोड आंटाड, “निन अपुल्लोन मानास्तान,” तर येम मीर साधारण मन्सुल लेर?
परमेश्वर सेवकलाद भुमिका
5तर मंग अपुल्लोड यवाड उंडाड? इंगा पौल यवाड उंडाड? वार फक्त सेवकलु उंडार यवार तीकेल मीर विश्वास फेटतीर. मा दिंटल्योन्टोड प्रत्येक मनशी फक्त आदी फनी शेशा याद प्रभुड माक इच्चीन्या. 6निन परमेश्वरदी वचन मी हृदयला पेरास्तीन, इंगा अपुल्लोड वान शिक्षाता दानकी नेळ येशा, पण इड परमेश्वरे उंड्या यवाड दान वाढायमत्या. 7दिनिचांग आंचेतोड येमीच लेड इंगा नेळ येशेतोड येमीच लेड, पण परमेश्वरे आंता उंडाड यवाड वाढाय मतेतोड उंडाड. 8यवाड बी पेरास्ताड इंगा नेळ येस्ताड वार इद्दार वगा उद्देश इचांग फनी शेस्तार इंगा प्रत्येक मनशीक वान मेहनत लेका पगार शिक्की. 9येनटीक की अपुल्लोड इंगा निन परमेश्वर इचांग इद्दार कुडी फनी शेस्ताम. मीर परमेश्वरदी शेन इंगा परमेश्वरदी इमारत उंडार.
10परमेश्वर कृपाता याद नाक इच्चीनेद उंडाद दान लेका निन सुज्ञ, कुशल कट्टेतोन लेका जोता येस्तीन इंगा इंगोगोड दान मिंदा कटताड तर दान मिंदुडदी बांधकाम मनाम यल्ला शेस्ताम, दिन बद्दल प्रत्येक मनशी काळजी तिस्कुनाला. 11येनटीक की येशु ख्रिस्त इड याद येशीनेद जोता उंडाद, दान इडशी इंगा यवारुच इंगोगोट जोता येशी शकायार. 12जर यवाडाना आ जोता मिंदा बंगार, यंडी, मौल्यवान राळ, कट्ट्या, गड्डी इंगा पेंड्यालदी उपयोग शेशी कटतार, 13तर कट्टेतोन प्रत्येक मनशीद फनी स्पष्ट कमशी येनटीक की आ दिनमु आदी यलगुला यकोची, आदी दिनमु आग्गी जताक प्रकट आय्यी, इंगा आद्दे आग्गी प्रत्येक मनशी फनीद परीक्षा शेशी की यल्ला उंडाद. 14यवारदी आना फनी आ जोता मिंदा कट्टीनेद टीकाशी, वानकी प्रतिफळ शिक्की. 15जर यवारदी आना फनी काली फोई इंगा वानदी नुकसान आय्यी पण वानदी तारण आय्यी. तरी पण यल्ला यवाडाना आग्गी आंटीने भवन लोन्केल फारी वाचाशी.
16मीर परमेश्वरदी भवन उंडार इंगा परमेश्वर आत्मा मी लोना निलस्ताद इदी मिक यरका लेद येम? 17जर यवाडाना परमेश्वर भवनदी नाश शेस्ताड तर परमेश्वर आ व्यक्तीद नाश शेशी; येनटीक की परमेश्वरदी भवन पवित्र उंडाद इंगा आदी मीर उंडार.
दुन्याम ज्ञानता सावध उंडना
18यवारुच स्वतान फसाय मताराद, जर मी दिंटल्योन्टोड यवाडाना इ दुन्याम दृष्टीता स्वतान ज्ञानी समजास्ताड, तर वाड खरेमे ज्ञानी आय्ये इचांग “मुर्ख” कावाला. 19येनटीक की इ दुन्यामदी ज्ञान परमेश्वर दृष्टीता मुर्खपणा उंडाद; येनटीक की पवित्र शास्त्रला इल्ला राशीनेद उंडाद की,
“परमेश्वर ज्ञानीन वान धुर्तपणाला फसाय मतताड.”
20इंगा
“परमेश्वरकी यरका उंडाद की ज्ञानीयोरी विचारलु व्यर्थ उंडाय.”
21तर मंग यादुच मनशी मिंदा घमंड शेयाराद, येनटीक की आन्नी माटलु मीये उंडाय. 22मंग वाड पौल उंटे, अपुल्लोड उंटे पेत्र उंटे, दुन्याम उंटे, जीवन उंटे का साव उंटे, वर्तमान उंटे लेकाते भविष्य उंटे, इ आन्नी माटलु मी उंडाय. 23मीर ख्रिस्तन उंडार इंगा ख्रिस्त परमेश्वरान उंडाड.
Valgt i Øjeblikket:
1CO 3: WNT
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind