1CO 12
12
आत्मिक वरदानलु — 12:1—14:40
पवित्र आत्माय दानलु
1हे आक्का तम्मुळ्ळालाला आत्मिक दानला बद्दल, मिक यरका लेवाराद इल्ला नाक वाटायाद. 2यप्पुड मीर यहुदी लेनोर उंटीर, आप्पुड यल्ला नडवा मतदुर आल्ला मीर आ मुकी मुर्तीला यंका नडदुर. इदी मिक यरका उंडाद. 3दिनिचांग निन मिक शपतान की, परमेश्वर आत्माता माटालाडेतोड यादुच मनशी इल्ला आनाड की, “येशुड शापित उंडाड.” इंगा पवित्र आत्मा शिवाय यवारुच “येशुड प्रभुड उंडाड,” इल्ला आनी शकायार. 4इप्पुड दानलु तर अलग-अलग प्रकारी उंडाय, पण आत्मा वक्काटे उंडाद. 5आल्ले सेवा पण अलग-अलग प्रकारदी उंडाद, पण प्रभुड वक्काडे उंडाड. 6इंगा फनुल पण अलग-अलग प्रकारी उंडाय पण आन्नी फनुल शेशेतोड वाड परमेश्वर वक्काडे उंडाड. 7पण आत्माद प्रकटीकरण इदी आंदार फायदा इचांग प्रत्येक मनशीक इच्चेदेंक वच्चीनाद. 8येनटीक की वगानकी आत्मा तीकेल बुद्धी माटलु शिकताय, इंगा वगानकी आद्दे आत्मा इच्छाता ज्ञानता निंडी माटलाडेद योग्यता शिकताद. 9इंगोगोनकी आद्दे आत्माता विश्वास, इंगा वगानकी आद्दे आत्माता बिमारील बागा शेशेद दान, 10इंगा वगानकी चमत्कार शेशेद शक्ती इंगा इंगोगोनकी भविष्य शप्पेद शक्ती, तर यवारकी आत्माल ओळखाशेद, इंगा वगानकी अलग-अलग प्रकारी भाषाल माटलाडेद, इंगा वगानकी भाषालदी भाषांतर शेशी अर्थ शप्पेद शक्ती इच्चीनेद उंडाद. 11पण इ आन्नी माटलाला वक्काटे आत्मा फनी शेस्ताद. आदी दान इच्छा लेका प्रत्येक मनशीक कृपादान फंची इस्ताद.
फय वगाट अवयवलु अलग-अलग
12येनटीक की यल्ला फय वगाट उंडाद इंगा दानी अवयवलु शेंगेम उंडाय इंगा वगा फयीक आन्नी अवयवलु कुडी शेंगेम उंडी पण वगा फय उंडाद आल्ले ख्रिस्त उंडाड. 13येनटीक की मनाम यहुदी इंगा युनानी उंटे, दास इंगा स्वतंत्र उंटे तरी वगा आत्माताने मना आंदारदी वगा फयलाने बाप्तिस्मा आयनाद इंगा मना आंदारकी वक्काटे पवित्र आत्माता शक्ती शिक्कीनाद. 14येनटीक की फय इदी वगाटे लेद तर शेंगेम अवयवलु कुडीगास वगाट उंडाद. 15जर काल आन्या, 'निन शेय लेन आंका निन फयीद भाग लेन', तर दान मिंदकेल आदी फयीद भाग लेद इल्ला लेद. 16इंगा गुम्मा आन्या, 'निन कन्नु लेन आंकेन फयीद भाग लेन', तर दान मिंदकेल आदी फयीद भाग लेद इल्ला लेद. 17आंता फय जर कंडले उंटे तर इना यंदुकेल वस्तुन्या? इंगा आन्नी गुम्माले उंटे तर घउल यंदुकेल तिस्कुना वस्तुन्या? 18पण, फयीद प्रत्येक अवयव परमेश्वर वान इच्छाता वगाट-वगाट शेशी फेट्टीनाड. 19जर आंता फय कुडी वक्काटे अवयव उंटे, तर फय उंटुन्या येम? 20पण, इप्पुड शेंगेम अवयवलु तर उंडाय पण फय वक्काटे उंडाद, 21इंगा कन्नु शेईन आनी शकायाद की, 'नाक नीद गरज लेद', आल्ले नत्ती कालनी आनी शकायाद की, 'नाक नीद गरज लेद', 22तर उलट, फयलोनी आय अवयवलु याय शेंगेम अशक्त कमस्ताय आय आवश्यक उंडाय. 23इंगा फयलोन या अवयवकी मनाम सन्मान इस्ताम, आटलाद मनाम जास्त काळजी तिस्कुंटाम. दिनिचांग मनाम आ अवयवलान यटलान सुपियाराद आटलाक बट्टाल फेटताम. 24येनटीक की मनाक शोभाशी कमशे अवयवलाक बट्टालदी गरज लेद पण या भागकी गरज उंड्या दानके जास्त मान इच्ची परमेश्वर फय जोडशीनेड उंडाद. 25दिनिचांग की फयला यादुच मतभेद कावाराद तर अवयवलु वगामेगारदी सारखा काळजी तिस्कुनाला. 26इंगा वगाट अवयवकी दुख आयते तर दान जताक आन्नी अवयवलाक दुख आयताद इंगा वगा अवयवदी गौरव आयते तर दान जताक आन्नी अवयवलु आनंद शेस्ताय. 27इप्पुड, मीर ख्रिस्तद फय उंडी अलग-अलग अवयवलु उंडार. 28इंगा परमेश्वर मंडळीला इल्ला मंदीन नेमाशीनाड पहिला प्रेषित, दुसरा संदेष्टे, तिसरा शिक्षक; दान नंतर चमत्कार शेशेतोर, दान बाद रोगलु शिंगार शेशेतोर, सहाय्यक सेवा, व्यवस्था इंगा विविध प्रकारी भाषाल माटलाडेतोर. 29आंदारुच प्रेषित उंडार येम? आंदारुच शिक्षक उंडार येम? आंदार चमत्कार शेशेतोर उंडार येम? 30आंदारकीच रोगलु शिंगार शेशेद दान शिक्कीनाद येम? आंदार अन्य भाषाल माटलाडतार येम? आंदारुच भाषालदी भाषांतर शेशी अर्थ शपतार येम? 31पण मीर शेंगेम फेद्दा-फेद्दा कृपादानलु शिक्केद इच्छा फेटना इंगा दिन शिवाय, निन मिक वगाट शेंगेम शिंगार दावा सुपतान.
Valgt i Øjeblikket:
1CO 12: WNT
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind