Judas 1
1
Judas icaite yacuti lrinitacarru cacucan
1Njua Judas, Jesucristo irsudalrica njua, Santiago iwerrica njua, nudana ljiaji paperra irsuwalre pjiumi sha sheepacaperri Cristo, lriniwanaji njite lripeyunipe ljiaji Dios Fanirri, njaji Jesucristo iwapanpe. 2Nutatja caiwirricutsa Dios iinai kjenacarru lricapaca irsu, lricadacarrupjautsa imawadacaca lriinai mashirri yuya, njite lricadacarrupjautsa irsu ipeyukjeti.
Icanantacaperri ishati
3Sha nukitsiñape nupeyunipe, nunaitjapia jiidati nudanacarrutja irsu lrinacu ljiaji cuanca Dios imatsietaca faa lriinaiwa lriuya njerrapjitalriutsa namashicana ima; mitsa panaya nuwada canacaica nudanaca irsu nutjatacarru inai caiwirricutsa yemacarru taimi lrinacu ljiaji feepalri, ljiaji yacuti Dios icadanda narsu njaji lrirsuperri lriniwananipe. 4Nudana irsu ljiaji, ima aimacakena njeewacau njaji imañetacaperri matinatsa, uupi, ljiaji Dios yacu lricaite nanacu njeñaacautsao naji cayuperri. Atsianai maashiperricana, nanaitjaca pjiumi macadatsa caiji naumacapishu ima nacaiteca matsiadalrica ljiaji Dios njite curricautsa lritatjacarru lricuada nainai, njite currin nauma njeepaca ljiaji Jesucristo apadedatsa Waminalri-ca.
Dios jirrapjitetautsa njaji mashiperrim
5Ninitsa yajikena pjiumi, numatsenakja nuwadaca isrun, iwaopia cuampiaca Waminalri jitaca njaji irraelistanai Egiptolrikjuite njitedalri ljiapudam lriwayaketa njaji curriperri icadaa icaulreo lrinacu.#Ex 12:51; Nm 14:29-30,35 6Iwaopiatsakja cuanca lrinaitjaca narsu njaji angelenai curriperri yufaaca caiji lricadacapishu, mitsa namutucao lriuya ljiaji naufaalri nini eenulriculje; niini Dios ipresotacana cadaucawerricu caidalriwetsa atee ljiadautsa jalredauca lricaitecadanacuatsa naacuna pjiumi. 7Iwaupiatsaca nanacu njaji yacalre Sodoma, Gomorra-lricuperri njite njaatsakja njaji yufacaperriu yacalre nacudapiperri. Nanaitjapia pjiumi cuandalricatsa macadadalri nadakishu, caishupapia Dios iwayaketacana tiyeeshu curridalritsa iwayacau. Niini warsutsa wacapa wauyao wadee wanaitjaca caiji nanaitjacapishupia wadawatsa ferrapitjaca.
8Caitsakja njaji icanantacaperri cashaperrim, icaitecape njetapumca Dios inakjuite, namashicacao lishu ljiaji mashidalri nanaitjaca, Currin nauma Wanimalri yaajica nanacu njite nacaite maashi nanacu njaji kjaidaperri yuufacape enulriculje. 9Ljiatsa ljiaji Miguel naminalri njaji angelenai currim lrinaita cayu. Currim lritaitamitsa lrimutuetaca yacuti ljirrapjitetacarru ljiaji ñacaim cacupecadanacuna Moisés idakim ikjaote. Ljiaji naminalri njaji angelenai icamitsa lricaiteca: —"¡Waminalriwatsa jirrapjiteta pjia!". 10Mitsa njaji cashaperri, namacadawalretaca ljiaji curridalri naji cuanshupaca, njite lrinacu ljiaji nanjinda tiki caicananji maficalri mawaupiakeperri mista nanaitaca macadatsa cainji nadaki yuma capishu njite icatsa iwayaketalricana.
11¡Kjenaperricautsana! Ima naufacawa caiji Cain yuufacapishupiawa. Njite naumacapua nagana palrata, naacau lrirricuda ljiaji inipu mashikjaitsa lrialripia nini ljiaji Balaam uupipia, nini mayamicautsana caiji Coré-shu lripundatacapua Dios yacu. 12Njaji caiperri cafainaperricana aji iwaketacacadanacuwa ijñacarru icañatacarru ipeyucacao ima naiñaca, nairratsakja maajikjaa ipeculricu, curritsa cuca iwanaa nafiucao. Icamitsa nawadaca nanacuwaca. Iyadaucashucana curriperri irsu uuni, nini caulri ideecana kjerrecatsa. Caitsakjanaji jaicu mainacaperrishutsa njenanalricu. Ñamperrimtsa cuadauca. 13Caicanaji liñukjashu kjaidaaperri ljiaji uuni, ima ljiaji nanaitjanda maashi lrimutucao caiji uuni-icalrishu. Caicanaji jiwirrida manalreperrishu napuwa yuya, nini naufacautsao caidalriwetsa cadaucawerriculje.
14Upipia ljiaji Enoc, ljiaji septimo Adan shapudam, lrinuparrutapiatsakja nanacu Dios yajikjeshu, lriacu: —"Nucapa Waminalri inuca napiya njaji lrisruperri aimaperri currim paniwetajica, 15lricaitecarruatsa nacuna pjiumi njite ljirrapjitetacarru njaji inaitjacaperri maashi curricapua narsu Dios nawaopiakjerricu njite nanaitja caiji nawaopiakje nayada yumacapishu. Njitetsakja ljirrapjiteta-tsakjautana nacaitecapua aima yaacuti matsidalri lrinacu". 16Njaji nucaiterri inacu, icuitetacapecana, nacaitepeca maashi nakitsiñape inacu, currim nirse najiacacau lishu ljiaji narsunda icamitsa naumaca nanaitjaca caiji nadada yuumacapishu. Nacaite matsiacana apetsida yuya, papiape cacuna matsia apada inacu naumacapuatsa nauketaca cucacatsa lriinai.
Judas icaite narsu njaji jiepacaperri
17Mitsa shaa, nukitsiñape nupeyunipe, iwaopia lrinacu ljiaji nacaiterripia naji Waminalri Jesucristo imenacanipen, 18ima nacaitepia irsu: —"Apapiawatsa lriwayacaca ipjeya ljiaji jalredauca, apepena necacautsa Dios iicau, lriacu iicao tsakja, yufacapeutsawa caiji nawaopiakje caupitjadalri yumacapishu". 19Icatsa njaji yuumacapeca imashicaca nawaopiakje njaji iglesia irsuperri njenitacacarrua nauyawaca; nanaitjaca caiji naumacapishu njite currim narsuca nacaulrerricu ljiaji Dios i-Espíritun.
20Mitsa shaa, nukitsiñape nupeyunipe, yuma itawiñacarrua lrinacu ljiaji yacuti ajadalri shepalri. Itatja Dios iinai Espíritu Santo yajikjeshu. 21Icadaa lriufaa icaulrerricu ljiaji Dios ipeyucaita faa njite iwapa icapa ljiadautsa jalredauca Waminalri Jesucristo icadalriutsa warsu jalredauca mawayacacadalri kjenacapua lricapa warsu.
22Kjenaa icapaca narsu njaji irsucape yamada iwaopiakje lrinacu ljiaji nacadalri nacaulreo inacu. 23Imanacutana njaji apana, caiji pjetacapishuna tiyeerrucjuite, kjenaa icapaca njaji apetsida. Mitsa icapa yuyao ljiaji napecadoni wade inaitaca cayu.
Waaca lrirsu matsiadalri ljiaji yaajicada wanacu
24-25Ljaiji Dios apadadalritsa, Iyumjetacaita faa, lritaita lrimatsietaca shaa wadee idiaca lriuya lricañatacarru sha maupitjatsa, catimadalri-tsakja lricananialre melremelredalri ipjeyalje. Waaca lrishu matsiadalri ljiaji kjaidadalri pjiumi yuya. Ljiatsa yaajicada wanacu pjiumi jalredauca iinitaca ipjeyatua, panaya tsakja, caidalriwetsa. Amén.
© 2025 CLAN
© 2025 Seed Company