2 Pedro 3
3
Lrinucadanacuvatsa ljipieta ljiaji waminari
1Icatsa ljiaji, nuquichiñape nupeyunipe, ljiaji paperra nupietanda nudanaca. Nerricuda njaji yamada nuuma nucada irsu nucaiteshupa shaa, irsucarru iwaopiakje mayacandali. 2Ivaupia cuajica ljiaji nacaiterripia njaji inuparrutacape ljienitanpepia lirsuwawa; ljiatsakja liaji lrinanda wanaitjaca ljiaji Waminalri Iyumjetacaita, ljiaji nacanantalri tsakja irsu njaji lrimenacanipe.
3Pjiumi lrinacu ljiaji ivaupiavatsani: piquetendalrirricuvatsa jalredauca njenicuetacautsau njaji yufacape caiji navaupiakje machidalri yumacapishu, njite nacaawatsa iicao, 4natatavatsa caiji: —"¿Cuada curritua Cristo inu caiji lricaitecapishu uupi? Upina mayami njaji fanirrinaipe, njite caicarruntsa pjiumi ljiaji jalredauca lrinitacapishuva". 5Nja inaiquica njaji currin nauma nanjica niniperriquena ljiaji jalredauca njite jipaitsakja, Dios lrinumalrikjuite lricaite lrimutocarrua unirrikjuite lricadarru lriufau uni iicao. 6Njite unia macadalrishupia lrivayaqueta ljiaji jalredauca ljiavaljepia ljiaji.#Gn 7:11-22 7Mitsa pjiumi njaji pacapalri panaya enu yecuanacu njite jipainacutsakja lricadacana lrivayaquetacarruvatsana tiyeshu ljiadawatsa lricaiteca naacuna pjiumi cayuji Dios icaitecapishupiena. Ljiadatsakjautsa lrivayaketautsa njaji machiperrin.
8Njitepjatsakja, nuquichiñape nupeyunipe, macadatsa lriñaa yuya ljiaji, Waminalri icapaca mil camui ljiaji padaa jelredaucashu, njite padaa jalredauca lricapacani caiji mil camui shu.#Sal 90:4 9Currin lrinaitjena kjeya caiji lricaitecapishu ljiaji waminlri cayuji navaupiacapishu njaji apadapena, mitsa lritarravata viaa yapiya, curricapua lriuma apada iñacau, mitsa lriuma ipadametaca iwaopiakje Dios-nacu.#Ez 18:23; 33:11
10Mitsa ljiadavatsa jalredauca lrinucatsenakja ljiaji waminalri lrinuvatsa kjeyanadatsa caiji cañaitedalri inucapishu. Njitevatsa njaji jalredauca neñaacautsau lrimaulre cafainadalrishu, njite lrimacautsao pjiumi ljiaji jalredauca, njite ljiaji jipai, pjiumi tsakja njaji pacalri jipainacu nemautsau Dios ipjeyalre lricaiterru nacuna.#Is 34:4
11Cayuvatsa lrivayaquetaca pjiumi njaji pacapalri, ¡nini shenitacao lriuya ljiaji mashidalri njite ideji Dios irsu! 12Ivapena lriucau ljiada jalredauca Dios icaitecawautsa nacuna pjiumi, njite inaitja pjiumi ljiaji jidati lriucacarruenau kjeyau ljiaji ljinana. Ljiadavatsa, njaji jalredauca navayacacautsau tiyeshu, njite pjiumi njaji pacapalri lrirricuda nacuducaotsao tiye irrashu. 13Mitsa fa wavapa wacapa eeno walridalri njite jipai walridalri caiji lricaitecapishu, ninicavautsa pjiumi ljiaji machiadalri.#Is 65:17
14Nini, nuquichiñape nupeyunipe, ivapacadanacutua njenana yucao nja nucaiterri, inaitja Dios iuketacarruatsa shaa maupitjaperrishutsa, mamashicanatsa njite imaudacatsakja mashirri yuya. 15Irsutsa yanjica cuadaca lritarravata viaa ljiaji waminalri, lrinaitja cayu varsu lriyumjetacarru faa. Ljiatsakja lridana inacu irsu ljiaji vaquichinda wapeyunda Pablo, cayuji Dios icadacapishu lrirsu lrianjikjeu. 16Pjiumi njaji paperra lridananji irricuda cacucani irsu nanacu njaji, ninitsakja pauqueta padapena jirrapitinaperri panjica, icatsa njaji nateculjetalri njaji manjicaperri njitetsakja njaji mjaidaperri shepaca, cayutsakja nacanantaca teculjetsa njaji pana paperra nadananji, cayu nanaitjaca narsuvau njerrapjitashudau.
Yacuti piquetendalri Pedro icadanda
17Nini, nuquichiñape nupeyunipe, upina yanji lrinacu ljiaji, ivapaquenau, manaitjatsa caiji nacaitecapishu njaji icanantacape teculjetsa, ima inaitjacadautsa caiji nacaitacapishu, initautsa irsuca yamada ivaupiakje lrinacu ljiaji initandapia shepaca machia. 18Mitsa yuuma yaajicarru machia ljiaji Waminalri Iyumjetacaita faa Jesucristo njite itaviñena lrinacu ljiaji ipeyukjeti. ¡Icaite cacunadalrican caidalrivetsa! Amén.
© 2025 CLAN
© 2025 Seed Company