1 Timoteo 2
2
Pablo idana patatjacarru Dios nanacu pjiumi njaji inaiki jalredaucalricuperri
1Lripeyatua, nuinita nucaite shaa itatjacarru nanacu pjiumi njaji inaiki jalredaucalricuperri, cacu shaa Dios yapiya, itatja nanacu caiwirricutsa, njite yaa matsiadalri Dios irsu lrinaitjacapua matsia narsu. 2Itatjatsakja nanacu njaji talricalricanatinai, njite pjiumi njaji caacunaperri, wataitacarruatsa waca matsiadalri Dios isru njite wanaitjacarru caiji lriumacapishu. 3Ima matsiadalrica ljiaji paufacadawa cayu njite ljiaji Dios Iyumjetacaita lripeyu lricapaca ljiaji panaitjaca cayu, 4lriuma yuumjeca pjiumina njite lriuma naajica ljiaji ajadalri. 5Ima apadetsa ljiaji Dios njite apadatsakja ljiaji atsia icadalri matsiacarru Dios napiya njaji inaiki, ljiaji atsia: icatsa Jesucristo-ca, 6ljiaji icadacalriu ljifacatsa mayamicarrun naikjaote pjiumi njaji jaledaucalricuperri, lriyumjetacarru faa, ljia nacaitelripiena inacu ljinanalricu. 7Nutaitacarru nucadaca naaji ljiaji yaacuti, Dios iniwana njua lrimenacaoda njite icaitecaoda lriacu nucanantacarru lrinacu ljiaji pacadaca pacaulreo lrinacu ljiaji yacuti ajadalri nasru njaji curriperritsa judionaica. Ljiaji nucaiterri ajadalricani; currim nucashataca.
Cuajica narsutsa nanaitjaca njaji atsianai inaitjepe-tsakja
8Niini caishupa, nunaa pjiumi shaa atsianai sheepacaperri itatjacarru Dios iinai kjerrecawacatsa, jirreta icapi lrirsu icaulre maupitjadalri yaapiya njite meerruatsa, wadee icuitacaca ikitsiñape yaapiya. #2:8 Ljiawalepia caipiamana natatja Dios iinai, neemawa njite njerreta nacapi. 9Caitsakja njaji inaitjepe, numa njeetacarru natsayaniu matsiadalri lricuatsa, nadanatacarru pjiumi nadada. Namatsietacacarrua lricuatsa wadee nanaitjacani inaiki icapau, currimtsakja namachietacacawa narruetaca nanacua uwirru u jipada cacuadaperri njite natsayan cacuadaperrishu. 10Matsiapja namatsietacacao lrirsu ljiaji matsiadalri nanaitjalri apaana irsu, caiji paumacapishu nanaitjaca njaji inaitjepe icaitecape nadejica Dios isru. 11Pjiumi njaji inaitjepe narsutsa nawapaca njemiu maacucha ljiaji nacanantalri najicarru cuanshupaca ljiaji lricanantalri-nacuna. 12Njite curritsakja nuuma aapama icanantacana o rsuapjacantja yuuma yaajica nanacu njaji astianai, matsiami naufaaca njemi maacutsa apada icanantacadanacu. 13Ima Adanpia ljiaji Dios iinita inaitjaca njitepia rsuaji Eva#Gn 2:7,21-22 . 14Njite currimpia ñacaim icashata ljiaji Adan mitsa lricashatapia rsuaji Eva, njite lripuamnaa rsunaitja rumashicanao. 15Mitsa njaji inaitjepe narsuatsa yumjecai natawiñacapuawatsa yempeti, neemacadautsa taimi lrinacu ljiaji njeepalri, napeyucapua nakitsiñape njite njeenitacacapuawa mashidalri yuya.
© 2025 CLAN
© 2025 Seed Company