Zakaliya 5
5
Malola ga shitabu shashiguluka
1Pandoliti kayi moniti shitabu yashiguluka. 2Malaika kankosiya, “Guwona shishi? Na neni nimwankula, Mona shitabu shankuguluka, utali wakuyi ndo mita tisa na upana wakuyi ndo mita za msheshi na nusu.”
3Viraa kang'ambira, “Mngati mwa shitabu ashi kulembwa mpangira yenu hayiweri muisi yoseri. Uwega wumu ulembwa handa woseri yawiwa hawawingwi muisi na uwega umonga ulembwa gambira woseri yawalirapa mpayu viraa hawatenderwi ntambu iraa. 4Mtuwa Mlungu yakana makakala goseri katakula kuwera mweni hakayijegi pangira ayi. Hayipeni kila numba ya mwivi na kila numba ya muntu yakalirapa mpayu kwa litawu lyakuyi. Hayilikali amu na kuyihalibisiya numba yoseri na mbawu na mabuhi.”
Malola ga mdala mulijamanda
5Ntumintumi gwa kumpindi ulii yakayoweriti na neni kaniziliti na kung'ambira, “Guloli! Pampindi ndo shintu gaa yashilawira.”
6Nimkosiyiti, “Ndo shintu gaa ashi?”
Yomberi kanankula, “Ali ndo lijamanda yaliwera na vidoda vya isi yoseri.”
7Lijamanda lyeni liweriti na shigibikilu shashinyawitwi kwa lisasi, shigubutulitwi na neni moniti mdala kalivaga mkati amu.
8Malaika ayu kalonga, “Mana ya mdala ayu ukontola.” Shakapanu ntumintumi gwa kumpindi kamkumbira mngati mushikapu mdala ayu na kugibikira. 9Pandoliti kumpindi, moniti wadala wawili wankunizira, waweriti pawagulusiwa na lyega, weni waweriti na mpapatiru yazyana makakala handa ga kolongo. Wadala awa washinyasula shikapu shilii kuliyera.
10Su nimkosiyiti Malaika ulii yakayoweriti na neni, “Wankushijegera koshi shikapu ashi?”
11Kanankula, “Wankujegera muisi ya Babeli na kunyawa numba kwajili yakuyi. Payiwera kala, shikapu hashitulwi palii pahala pakuyi.”
The Bible version in the Pogoro Language. @The Word for The World International and Pogoro Language translation. All rights reserved.