Zakaliya 3
3
Malola ga Mtambika mkulu
1Shakapanu Mtuwa Mlungu kanangaziya malola gamonga neni Zakaria, mumalola aga nimwona mtambika mkulu Yoshuwa kagoloka kulongolu kwa ntumintumi gwa kumpindi. Uwega wakuyi wa kumliwu shetani kagolokiti su kamsitaki. 2Ntumintumi gwa kumpindi kamgambira shetani, Mtuwa Mlungu kakukalapiri shetani! Mtuwa Mlungu mweni kagusyaguliti mji gwa Yerusalemu, kakukalapiri! Hashi muntu ayu handa limbamba lyalinyasulitwi pamotu.
3Yoshuwa kaweriti kavala nguwu zidoda pakaweriti kagoloka kulongolu kwa ntumintumi gwa kumpindi. 4Ntumintumi gwa kumpindi kawagambira walii yawagolokiti kulongolu kwakuyi, “Mumvuli nguwu zakuyi zidoda.” Shakapanu kamgambira Yoshuwa, “Guloli mbusiya shidoda shaku na neni hanikuvalasiyi nguwu ziherepa.”
5Shakapanu kawagambira mumvalasiyi shiremba shiherepa pamtuyi. Su wamvalasiya shilemba shiherepa na nguwu na ntumintumi gwa kumpindi kaweriti kagoloka palii.
6Shakapanu ntumintumi gwa Mtuwa Mlungu kamgambira Yoshuwa. 7Mtuwa Mlungu gwa mashonta katakula hangu, “Pagujimira malonguziya gangu na malagaliru ganikupananiti, su hagugolokeri numba yangu na ligeleri yakuyi. Naneni hanikutendi gwingiri muuntumintumi wangu handa awa yawagoloka kulongolu kwa neni. 8Gwee Yoshuwa Mtambika Mkulu na mwenga watambika wayaguyi yamuwera pamuhera nayu vinu mpikiniri, mwenga yamuwera lilangaliru lya shaka shiherepa shashiza. Hanimjegi ntumintumi gwangu yawamshema Lutambi. 9Muliholi kuwera ntula kulongolu kwa Yoshuwa libuwi lyalyana wega saba. Na neni hansongoli malembu pampindi pakuyi na kwa lishaka limu hera hambusiyi vidoda vya isi ayi. Neni Mtuwa Mlungu yakana makakala goseri ntakula. 10Mulishaka ali, kila yumu gwenu hakamshemeri ganja gwakuyi kalikali pasi pa mzabibu gwakuyi na mtini gwakuyi.”
The Bible version in the Pogoro Language. @The Word for The World International and Pogoro Language translation. All rights reserved.