Mika 7
7
Vitendu vidoda vya Israeli
1Neni hinginika nentu, nilifana na muntu yakana njala mweni kakala kwapa mabwajubwaju geni tini na zabibu zakuyi ziyapwa kala. 2Kwahera mwaminika yakasigaliti pasipanu, kwahera yoseri yakatenda yagafiruwa kwa Mlungu. Kila muntu katenda ukontola, kila yumu kamuwinda myaguyi su kamlagi. 3Woseri kwa pamuhera wapanga kutenda makontola. Wakulu na watoza waluwa swinda. Yawamanika watenda shawafira na woseri kwa pamuhera watenda shikontola. 4Yakawera na luhala kupita woseri ndo atali kuliku mbigili.
Lishaka lya toza ya Mlungu kwa wantu lyankwiza, ntambu yawatungiti wambuyi. Wantu hapeni waweri na ntambu ya kutenda. 5Su nagumwamini muntu yoseri, pota nagumtumbira ganja gwaku. Guloli weri shaguyowera kwa mdala gwaku. 6Mndemba kankumbeza tati gwakuyi, mhinga kankulikoma na mawu gwakuyi, mdala gwa mwana gwakuyi kalikoma na nahonga gwakuyi. Mnkondu gwa muntu ndo gwa munumba mwakuyi.
7Kumbiti neni nimtumbira Mtuwa Mlungu na nankumhepera Mlungu gwangu yakanopoliti, Mlungu gwaneni hakampikaniri.
Mtuwa Mlungu kajega ukombola
8Nagusekelera malaguwa gangu gwee mnkondu gwaneni. Panguwa, hangoloki kayi, Pawera paluwindu Mtuwa Mlungu hakaweri ulangala wangu. 9Toziya nimtendera madoda Mtuwa Mlungu, hangu kana maya nentu na neni, nayomberi hakendeleyi kukomanga, mpaka hakayoweri naneni, nayomberi hakanjegi uwulangala na neni haniwuwoni ulopola wakuyi. 10Shakapanu mnkondu gwangu hakawoni aga, nayomberi hakawoni soni kwa galii gakatakuliti, kuwera kakoshi Mtuwa Mlungu gwawu? Kumbiti vinu neni nimwoni mnkondu gwangu pakaguwa na kutimbangwatimbangwa handa lidiku lya munjira.
11Mwenga wantu wa Yerusalemu mashaka gakwiza geni hamnyawi kayi vibambaza vya mji. Shaka ashi mbaka za isi yenu hayiyongerwi. 12Lishaka ali wantu hawizi, kulawa Ashuru na miji ya Misri na kulawa Misri mpaka lushemba Eufrati, kulawa bahari mpaka bahari na kulawa lugongu mpaka lugongu. 13Kumbiti isi yimonga pasipanu hayiweri shiwala, toziya ya ukontola wa wenikaya wakuyi.
Mlungu kankuyiwonera lusungu Israeli
14Gwee Mlungu, guwaloleri wantu waku gambira muntu yakawalolera wanyama wakuyi kwa luboku lwakuyi lwa lihengu, guwalonguziyi wantu waku yaguwasaguliti waweri waku, yawalikala gweka yawu kuntundu muisi yana maliwuziwu yagana wolera. Guwaleki waliyiziyi mu Bashani na Gileadi, ntambu yagutenditi makashu.
15Gutulanguziyi kayi makangashu gaku. Handa shaka shagutulaviyiti muisi ya Misri. 16Wantu wa maisi pawagawona aga, hawaweri na soni ata handa wana makakala. Hawalikangashi na wahera sha kutakula na kuwera handa wantu mazogu. 17Hawalikwegi mumadikudiku handa njoka, handa viwumbi yawakwawakwawa muutapaka. Hawalawi maboma gawu pawalendemala kwa lyoga na womberi hawamuwuyiri Mtuwa Mlungu gwetu kwa lyoga na kutira toziya yakuyi.
18Gwee Mlungu kwahera Mlungu handa gwenga, gwenga gugalekeziya makontola ga wantu waku yawasigala na gugalolandiri makosa gawu. Maya gakuyi galikalandiri mashaka goseri, ila gufira kutulanguziya lusunga lwaku. 19Gwee Mtuwa Mlungu gutuwoneri lusungu, gutuwusiliri vidoda vyetu na kwasira kutali makontola getu goseri, mumatiwa ga bahari. 20Haguweri mwaminika kwa wiwuka wa Abrahamu na Yakobu, ntambu yagutakuliti kwa wambuyi watwenga kwanjira makashu.
The Bible version in the Pogoro Language. @The Word for The World International and Pogoro Language translation. All rights reserved.