Hoseya 9
9
Hoseya kankubwera makomangu ga Israeli
1Mwenga wantu wa Israeli namunemelera ama namutenda msambu gambira maisi gamonga, mana muwera wahumba kwa kumleka Mlungu gwenu. Muwanemelera na kuwaguwira wamlungu pahala pa kukomera viboga. 2Vinu su hamuweri na mabenangu madidini ga nganu na zabibu na hapeni mpati divai ya syayi. 3Wantu wa Israeli hapeni wasigali muisi ya Mtuwa Mlungu, nakaka hawawuyi muumanda Misri na hawaliyi viboga vyavilemwa na Mlungu aku Ashuru. 4Hapeni wamlaviliri Mtuwa Mlungu tambiku za divai, mana Mlungu hapeni kanemiziwi kwa tambiku zawu. Toziya hawaweri wadoda gambira shiboga sha shiwembu, yoseri yakashiliya hakalemwi na Mlungu. Hashiweri shiboga sha kuliya weni hera, toziya shijimilwandiri kujengwa Mnumba ya Mtuwa Mlungu. 5Mana hapeni mjimilwi kayi kunemelera msambu gwa Mtuwa Mlungu. 6Tembera mtira kulaguwa muisi yenu, Wantu wa Misri hawawalagi na wantu wa Memfisi hawawafindiri mumasembi. Magugu hagagibikili hanja zenu za mpiya, misontu hayimemi mumalingu genu.
7Mashaka ga makomangu gasoka, nakaka mashaka ga kuwuzilirwa gasoka, wantu wa Israeli washimana shaka ashi! Mwenga mlonga, “Mbuyi gwa Mlungu kawera mzigizigi, muntu ayu yakalongoziwa na rohu kawera na lukwali.” Mwankulonga hangu toziya ya ukontola wenu na shuki yamuwera nayu kwakuyi. 8Mwenga wantu wa Israeli Mlungu kasyagula neni mbuyi weri mlolera gwenu, kumbiti koseri kwang'enda muyambira mgomiziwu gambira mpongu. Ata Munumba ya Mlungu gwakuyi. 9Wantu wa Israeli watenda makontola nentu ntambu yayiweriti Gibea. Mlungu hakagaholi makosa gawu na kuwakomanga kwa vidoda vyawu.
Madoda ga Israeli na malawiru gakuyi
10Mtuwa Mlungu kalonga hangu, paniwawoniti wantu wa Israeli waweriti gambira Zabibu kushiwala na paniwawoniti wambuyi wenu waweriti waherepa gambira tini za kwanja mumtera gwa tini. Kumbiti pawasokiti aku Baal Peori wanjiti kushiguwira shinyagu sha wamlungu yawamshishema Baali, wawera nkalaliru gambira shinyagu shilii shawashifiliti. 11Ligoya lya Israeli haliwusiwi gambira mpongu, wana hapeni wiwuki kayi, hapeni kuweri na wana ama kuweri na yawana yinda. 12Pawawajega wana, hapeni niwaleki wakomu ata yumu gwawu. Hawashiwoni, paniwaleka gweka yawu
13Panimwoniti Israeli, kaweriti handa mtendi mdidika mungapa iherepa, kumbiti vinu Israeli mpaka kawajegi wana wakuyi walaguwi. 14Gwee Mtuwa Mlungu guwakomangi wantu awa, su guwakomi ntambu ayi. Guwatendi wadala wawu kuwera wagumba. Guwawusiyi maweri su nawanoniziya wana wawu!
Toza ya Mtuwa Mlungu kwa Israeli
15Mtuwa Mlungu kalonga hangu. Ukontola wawu woseri wanjiti Giligali, aku ndo pananjiti kuwakalalira. Toziya ya ukontola wa matendu gawu, haniwawingi munumba mwangu. Hapeni niwafili kayi. Wakulu wawu woseri wang'alambuka. 16Wantu wa Israeli wakomwa wawera handa mtera yagwana mishigira iyuma na hapeni waleri wana woseri. Ata pawalera na wana, Haniwalagi wana wawu yawawafira.
Mbuyi gwa Mlungu kankuyowelera kuusu Israeli
17Toziya walema kumpikanira Mlungu gwangu hakawawasi na womberi hawayeliyeri pakati pa maisi.
The Bible version in the Pogoro Language. @The Word for The World International and Pogoro Language translation. All rights reserved.