Hoseya 4
4
Mlungu kankuyilawumu Israeli
1Mwenga wantu wa Israeli mumpikaniri Mtuwa Mlungu. Mana Mtuwa Mlungu kankuwagambira vidoda wenikaya wa isi ayi, “Kwahera kayi uwaminika pota uheri muisi, kwahera yakammana Mlungu muisi ayi. 2Walirapa kwa mpayu na wiwa na kutenda uhumba pota kuwera na mpaka. Waliraga weni gweka. 3Toziya ya aga isi yoseri iwera shiwala, wenikaya wakuyi woseri wankuhowa pamuhera na wankanyama wa kuntundu na wambongu, ata wasomba wa kubahari wankulaguwa.”
Mlungu kankuwatakula vidoda watambika
4Kumbiti wantu nawalawumiwa ama kutakulwa vidoda, mana neni nikulawumu gwenga mtambika. 5Gwenga hagulikwari paliwala na mbuyi gwa Mlungu hakalikwari pamuhera nagwenga pashiru. Hanimwagamiziyi mawu gwaku Israeli. 6Wantu waneni wagamira toziya wamana ndiri neni, mana gwenga mtambika gulema mafundu na lagiru. Vinu nikulema kuwera mtambika gwaneni na wana waku hapeni niwatekeleri.
7Ntambu yawongerekiti watambika, woseri ndo ntambu yawongeriti kung'alambuka. Su, haniwugalambuli uweru wawu kuwera soni. 8Walilundiziya kwa tambiku za wantu yawana vidoda. Wanemelera nentu kuwawona wankutenda vidoda. 9Kumbiti yagafira kuwapata wantu hashiwapati watambika, haniwakomangi toziya ya matendu gawu madoda, haniwawuziliri matendu gawu weni. 10Hawaliyi, kumbiti hapeni wikuti, hawatendi uhumba, kumbiti hapeni waleri wana, toziya wandeka neni Mtuwa Mlungu na kuwaguwira wamlungu wamonga.
Mlungu kankupangira guwira za wamlungu
11Mtuwa Mlungu kalonga hangu, Divai ya syayi na ya makashu iwusiya umani. 12Wantu waneni waluwa litakulu kulawa kushinyagu sha mtera gwawu, gaa katunga shakuwapanana ntakula. Matamata za kutenda uhumba zankuwapoteziya, watenda uhumba kwa kuwaguwira wamlungu wamonga, wandeka neni Mlungu gwawu. 13Wankutambikira kulugongu na wankutumiziya ubani mumitera ya miyaloni na migudi na mikwashu, mana lisisi lyawu ndo liherepa.
Toziya ayi wahinga wenu watenda uhumba na mdala gwaku katenda undiyandiya, 14Kumbiti hapeni niwakomangi wahinga wenu pawatenda uhumba, ama wadala wenu pawatenda undiyandiya, mana wapalu weni ndo yawagenda pamuhera na wahumba na kutambikira pamuhera nawomberi munguwiru za uhumba. Wantu awa yawahera mahala nakaka hawagamili.
15Nakaka mwenga Waisraeli ndo wahumba! Kumbiti, namuwatenda wantu wa Yuda waweri na likosa, Namgenda Gilgali ama kugenda Beti Aveni. Ama kulirapa pamlonga, handa Mtuwa Mlungu ntambu yakalikala! 16Waisraeli ndo wakakatala gambira punda farasi. Mlungu katendi hashi kuwalololera, handa kondolu kumaliwuziwu? 17Wantu wa Efraimu wasagula kuguwira vinyagu. Su guwaleki wendereyi hera. 18Wakolamlima pawalowera, wanemelera kugonja na wahumba, mana weni wanemelera soni kuliku ligoya. 19Su, shivyulavyula hashiwagulusiyi,
shakapanu womberi hawaweri na soni toziya ya tambiku zawu kwa wamlungu wa mpayu.
The Bible version in the Pogoro Language. @The Word for The World International and Pogoro Language translation. All rights reserved.