Hoseya 2
2
1“Su muwashemi wakaka wenu, wantu waneni na wadada wenu weni Mtuwa Mlungu kawafiriti.”
Mdala mndiyandiya na isi ya Israeli yayigalambukiti
2Mumlongangi mawu gwenu, mana vinu yomberi mdala gwaneni ndiri na neni nampalu gwakuyi ndiri. Mumlongangi kaleki uhumba wakuyi na kakali kutali na uhumba wakuyi. 3Pakajimirandiri kumbuyira neni, hanimvuri nguwu zakuyi su kaweri shivula, hanimtendi kaweri ntambu yakiwukiti na kumtenda kaweri gambira shiwala, hanimtendi kayumi handa shiwala na hakahowi kwa kwimuluwa. 4Na wana wakuyi hapeni niwawoneri lusungu, toziya ndo wana wa uhumba. 5“Mawu gwawu katenda uhumba, pakapatiti yinda katenda mirandu ya soni. Pakalonga, haniwagenderi yaniwafira, weni wampananiti shiboga na mashi, sufu na shitani na lipaki na divai.”
6Kumbiti, neni Mlungu hanimdiwiri njira yakuyi kwa misontu na hanimzengeteri shibambaza nakapata njira ya kulawira kunja. 7“Pakawagendera wapalu wakuyi yakawafira, hapeni kawapati na pakawasakula, hapeni kawawoni. Su hakalongi, hanimwuyiri mpalu gwangu gwa kwanja, toziya kwakuyi weriti mbaka kuliku vinu.”
8Kavimana ndiri kuwera neni ndo yanimpananiti viboga na divai na lipaki na mpiya na zaabu kwa uvuwa, zyeni kamjegiriti Baali tambiku. 9Mushaka sha kubenenga hantoli viboga vyangu, hambusiyi divai yaneni shaka shakuyi. Hanimpoki nguwu zaneni za sufu na shitani, zyeni zimgibikiti shivula shakuyi. 10Hanimvuli nguwu zakuyi kulongolu kwa yawamfira na kwahera muntu yakaweza kundewelera. 11Haniyiwusiyi misambu yakuyi yoseri, misambu yakuyi ya lyezi kulawa na ya shaka sha Kwoyera na misambu yoseri yayilagaliritwi. 12“Haniyihalibisiyi mizabibu yakuyi na mitini, gakalongiti ndo malipu kulawa yawamfira. Haniyitendi iweri vidowi na wankanyama wa kundundu hawayiliyi. 13Hanimkomangi toziya ya mashaka gakawatumiziyiti ubani Mabaali na kulilembeziya kwa heleni za madini ga mabuhi ga beyi nkulu na kuwagendera yawamfira, kumbiti kandeka neni. Kalonga Mtuwa Mlungu.”
Ufiru wa Mtuwa Mlungu kwa wantu wakuyi
14Su, hanimzyangizyangi na hanimjegi kushiwala na kutakula na yomberi mpolimpoli. 15Uganu hanimwuziliri malambu gakuyi ga mizabibu na lulalanda lya Akori hanilitendi ligomi lya matumbiru. Hakanfati mweni pakaweriti mndemba, handa shaka pakawukiti muisi ya Misri. 16“Neni Mtuwa Mlungu nonga hangu. Lishaka ali, gwenga hagunshemi mpalu gwangu na hapeni gunshemi kayi Baali.” 17Mana hanilihusiyi litawu lya Baali, nalikantwa kayi mumlomu mwaku.
18Hantendi lipatanu na wankanyama wa kuntundu, wampongu wa kulyera pamuhera na vyoseri vigongolu. Hambusiyi upindi na ligumba na vintu vya nkondu muisi na kukutenda guweri ponga.
19Hanikujimiri na haguweri mdala gwangu mashaka goseri,
haweri mwaminika kwagwenga
hanikuwoneri lusungu na kukufira gwenga.
20Hanikutendi guweri gwangu naneni haweri mwaminika kwa gwenga,
na gwenga hagumani neni kuwera na Mtuwa Mlungu.
21“Lishaka ali neni Mtuwa Mlungu hanankuli,
handagaliri mpindi zitowi mvula mulitapaka,
na litapaka halimeliziyi viboga.”
22Viboga havimeri na mitera ya zabibu na mizayituni,
hayimeri mululalanda lwa Yezireeli.
23Hanimmeliziyi Yezreeli muisi,
hanimwoneri lusungu, yomberi yanimshema, Yakawonelwa ndiri lusungu
na walii yawashemwa, Wangu ndiri
haniwagambili, Mwenga ndo wantu waneni.
Na weni hawalongi, Gwenga ndo Mlungu gwa twenga.
The Bible version in the Pogoro Language. @The Word for The World International and Pogoro Language translation. All rights reserved.