matiyu 2
2
Shɔ Sẽrẽ i a Yesɔ Ɗɔbii
1A knti gbete shɔ yee Yesɔ a Baitalami a tipi Yahudiya, a ɗagbete Hiridu roo kpati yɛ, shɔ sẽrẽ i a aka gɨnri yɛnɛ Urushalima 2i hɨn nɛ,<< Jaa gbete shɔ yeeyɛ neyɛ ɔ̃ kpati Yahudawa u piya? U zɛu sɛ a gɨnri u arɛ u basiu pɛ.>>
3Naa kpati Hiridu nta vimtɛ ɗɔkɔ a yɔriyuu waanɛ, a shɔ Urushalimayini kpai. 4Hiridu toli shɔ nya piti a yupɛ̃ni shɔlansi wɛrɛ Ɗani, a shɔgbeteyi mati shɔ laabeene nya ãsine Musa, a hɨrɛ nɛ shɔ yɛ yee Shɔshɔraanɛ piɗɔpiya? 5I kasinyanɛ,<<Ɔ shɔ Baitalami a tipi Yahudiya, shompɛ vigbete janyagadi bee a ɗekɨn tɛ̃ɛ̃tɛ̃ɛ̃ː
6<< <Mɔkɔ, Baitalami, a tipi Yahudiya,
a ɓaa pɛ̃tɛ̃rɛ̃ ɓa a shɔ gbeteyi roo kpati a tipi Yahudiya niɓa;
Shɔgbete yɛ roo kpatiyɛ shɛjo awɔ tetemkɔ
shɔgbete yɛ teesing shɔ Israila i ɗekɨn.>>>
7Kɛɗɔn Hiridu ɓaa shɔ sẽrẽ i nya kaali nɛn ntapɛ ai nya ɗagbete sɛu shɛyɛ. 8Kɛɗɔn Hiridu shoyi kɛ Baitalami nɛ, <<Ɔ yɛnɛ ɔ kãa ɗɔ jaau tɔ̃vɨn, ɔkɛ kpaunɛ, n kasi n ntaatɔ, n kɔma n yɛu ɗɔɔ bassinɛ pɛjo.>>
9A knti gbete i nta vigbete kpatiu geliyitɛ, i yɛ ɓɛɛjo i nyaba, sɛ gbete i zɛyɛ a gɨnri yɛ ɗekɨnɗekɨn a shi ɗɔgbete jaau ɗɔnniyɛ. 10Naa i zɛ sɛutɛ, i nta yɛti puru fɛ̃ɛm. 11Naa ito yɛti wɛrɛutɛ, i zɛ jaa bẽrẽtiu rɛ a ɓini Mariyamuni, i ta a yugboti i basiurɛ. Kɛɗɔn i ɓeli nya duu i sii tari jajeri a kusũ laa gbete shɔ ɓuzɨni awuni yɛ shɔ ɓaanɛ incense a nɔɔ gbeteu sẽẽ sũrũ-sũrũyɛ, i ã jaaurɛ, i shanɛ i gbãutɛ gbulugbulu. 12I sɔkɛ nyaba wɔɔ i yɛi wɛrɛ koorɛ, aru gbete si Ɗalapa gɔ̃yi yusho tɛttɔ a norinɛ gboti nɛ ikɔi sɔɔ Hiridu ɗɔbiinɛ toti.
Yusufu a Mariyamu i ranaa yɛnɛ tipi Masar
13Akɨnti gbete shɔ sẽrẽwi i yɛtɛ, Ɗajaashonɛlapa shɛ a Yusufu ɗekɨn a norinɛ a shanɛ,<<Yuu lapanɛ, a tuu jaau a ɓini ni a yɛ tipi Masar, a ɔ̃ ɗɔwakɔ setɛ n gelaatɛ a sɔɔrɛ, Hiridu u ɗɔ gbeteu kãã ɗɔ jaau nɛn nyɔuvɔrɔ.>> 14Yusufu yurɛ, a tuu jaaurɛ a ɓini ni a zɨmba a yɛ Masar rɛ, 15I ɔ̃ a ɗɔukɔ anɛ lee gbete Hiridu vɔyɛ. Vim ɔ̃ nankɔ u yisinya vigbete Uɓeyelapa shayɛ au janyagadi nya nɛː <<N ɓaa MAJAA nya a tipi Masar.>>
Jajayi Nyokinɛ
16Naa Hiridu yeetɛ a sisɨn nɛ shɔ sẽrẽyi vi zɛnɛ i tasiutɛ nɛi ruu kpɛ̃nɛ aɗɔn, u sisɨn lɛsi fɛ̃ɛm, a ãsinyanɛ shɔ nyɔki jaavɔshɔyi a Baitalami a komoo gbete a ɗɔu maani gbeteyi saa ziti sɔɔnɛ knti kpai, Hiridu pɛli nankɔ sho vishonɛ ji a vigbete nta a shɔ sẽrẽ vi zɛnɛyi nyakɔ zai. 17A nyabankɔ vigbete janyagadi Irimiya shayɛ ɔ̃ nizɛː
18<<Shɔ nta yeenya a tipi Rama,
nyavɔ sɨnnɛ a sisɨn kɔnɛ pɛ̃niba,
Rahila sɨn aru ɓɛɛ jaayi
bɛ̃ɛ̃tɔ nɛ shɔkɔ sɔ̃rin murunɛ,
aru gbete ɓɛɛ jaayi i tɔɓa.>>
Yusufu, Mariyamu a Yesɔ i Sɔɔnɛ a Tipi Masar
19Akɨnti gbete Hirudu vɔyɛ a Masar Ɗajashonɛlapa shɛ a Yusufu ɗekɨn a nɔrinɛ, 20a geliunɛ <<Yulapa, a tuu jaau a ɓinini a yɛ tipi Israila, shɔgbeteyi tɔnɛ nyɔ jaau i vɔlitɛ.>>
21Kɛɗɔn Yusufu yurɛ a tuu jaau a ɓinini a sɔɔ tipi Israilarɛ. 22Naa Yusufu nta nya tɛ nɛ Akelayu Hiridu ɓɛɛ jaa kɔ roo kpatirɛ a tipi Yahuda, a Hiridu tipi, Yusufu nta seti ɔ̃nɛ tɔ a ɗɔuni. Si Ɗajaashonɛlapa gɔ̃u yushotɛ a nɔrinɛ bang, a yɛkɛ tipi Galili. 23A Yusufu yɛrɛ a ɔ̃kɛ komoo wɔɔ shɔ ɓaanɛ Nazara. Vim ɔ̃ nankɔ u yisinya vigbete janyagadiyi i sha a ɗekɨn tɛ̃ɛ̃tɛ̃ɛ u ɔ̃ nizɛː <<Shɔ yɛ ɓaunɛ shɔ Nazara.>>
Valgt i Øjeblikket:
matiyu 2: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
