Luka 8
8
Suu gbeteyi i gɨn Yesɔ
1A kɨnti ni Yesɔ yuurɛ yɛkɛ komɔɔ wɔ pɛ̃niba a jakomɔɔ, a waa Ɗa nya ruu bi kɛ ɗɔu kɔ aru kpati roonɛ a Ɗalapa wɛrɛ. U jadɔyi kopi tu ziti isi a wuni. 2A suyi gbete shɔ shɛshiyi suru kɔ̃linɛ a vɔrɔ bi: Marayamu(shɔgbete si shɔ ɓaunɛ Madaliya), shɔ gbete shɔ shɛshi u rãama manzii a biiyɛ; 3Yuwana, shɔgbete ɓɛvɔ Kuza yupɛ̃ni au shovi a kpati Hiridu wɛrɛ; wɔɔ Susana, a soro wɔyini waanɛ, i shovi ai vinaa i kã Yesɔ au jadɔyi nɛyi pɔ̃siyi naa.
Ruɓusinɛ a shɔ jaa lanɛ yuu
4Shɔ a Yesɔ ɗɔbii jitɔ a zɔnzɔn a komɔɔ-komɔɔ; naa shɔ mɔɔ pɛ̃niba i toli nyatɛ, Yesɔ geliyi ruɓusinɛm: 5<<Jawɔ shɛrɛ nɛn ɓa zee au jaa. Naa zɔ zɔvitɛ au jaayɛ, wɔyi tɛ̃ɛ̃ a nyaba, a ɗɔukɔ shɔ nalirɛ a dɔɔ, janoyi i arɛ shaarɛ. 6Wɔyi tɛ̃ɛ a ɗɔ tari, naa batɛ, i vɔkirɛ aru gbete ɗɔ zaza siɓa ɗɔuniɓa. 7Wɔyi tɛ̃ɛ a ɗɔ kɔkɔ, i tarɛ i ba a nyazɔ a kɔkɔni, kɔkɔ ɓaliurɛ. 8Wɔyi tɛ̃ɛ a tipi tɔ̃vɨn; vishau tarɛ barɛ i shɛshi nɔɔ, laa maani ko-pi gbete piya.>> Yesɔ sɔ̃ri nyanɛ, <<Ɔ weshopɛ, ɔ sho ntanɛ kɛ ɔ̃nɛ ɗɔn ɔ ntarɛ!>>
Dɔɔ ruɓusinɛ
9Naa Yesɔ jadɔyi i hɨu dɔɔ ruɓusinɛtɛ? 10A kasi nyanɛ, <<Ruɓusinɛ aru Ɗa kpati roonɛ shɔ ãwɔtɛ, ama shɔwɔyi shɔ geli a yɛti ruɓusinɛ, a ruu gbete i yɛ kɨnnɔɔ i zɛɓa, i wesho i kpakaraɓa.>>
Yesɔ tadɔɔ ruɓusinɛ a shɔ jaa ɓanɛ yuu
11Nkɔ gɨngɨn ruɓusinɛ yɛm: Zɔvi ukɔ ɔ̃rɛ Ɗalapa nya ruubii. 12Zɔvi gbete au shishi a nyaba ukɔ ɔ̃rɛ shɔgbete i ntarɛ; japɛ̃pɛ̃ɛ tuu kati ai sisɨni aru gbete iyɛ ã sisɨng ɗɔn nɛ shɔyɛ rairɛ. 13Zɔvi gbete au tɛ̃ɛ a ɗɔ tari ukɔ ɔ̃rɛ shɔgbete ai nta ruum i tɛ a yɛti puru. Ama tɔɓa ai sisɨni ɓa; i ã sisɨng ji fɛ̃ɛ̃ wezee ama naa shɔkɛ ntai sisɨnɛ, i wesi tɔ. 14Zɔvi gbete au shishi a yɛti kɔkɔ ɓɛɛ shɔgbete ai kɛ nta ruumnɛ; ama vi kotipi a ruu vinaa ni a tɔ̃vɨn ntanɛni tui i sisɨng kati au yuuni i jaa jo zɔ̃ɓa. 15Ama zɔvi gbete au tɛ̃ɛ a tipi tɔ̃vɨn yɛ ukɔ ɔ̃rɛ shɔgbete ai kɛ nta ruumnɛ i sã a sisɨn tɔ̃vɨn i gɨn nyatɔ i yaa naa ɓa sete yee jaatɛ.
Pitila gbete shɔ pɔ̃ a yulayɛ
16Shɔwɔ yɛ dɔɔ pitila ɓa nɛn kukitɔ a gbenti nyaɓari ɓa ko u sɨn a tɔ̃ ɗɔroonɛ ɓa, ama i sɨ a yuu laa, nɔgbete shɔ zɛ yaau yɛ naa shɔkɛ tɔnɛ. 17Vigbete shɔkɛ ɓusinɛ shɔ shɛshi ɓilitɔ, a vigbete shɔkɛ kukinɛ shɔyɛ tasi a ɗɔsẽsẽ. 18Ɔ kɔyuutɔ, a nɔgbete ɔ weshoyɛni, aru iviya shɔgbete ai vi ɗɔnyɛ shɔ ã vijo ikɔ, ama shɔgbete ai viɓa naani ɓa shɔyɛ raa jaa shɔgbete ai naa yɛ kati.
Yesɔ ɓini a ɓɛzɔyi
19Yesɔ ɓini a ɓɛzɔ̃yini i arɛ nɛi kasi Yesɔ zɛnɛ, ama ijo kpau zɛnɛ ɓa shɔ si bang. 20Shɔwɔɔ geli Yesɔ nɛ, <<Mini a mɛzɔ̃yi i shitɛ ɓili i kasaa zɛnɛ.>> 21Ama Yesɔ kasinya nɛ, <<Mani a mazɔ̃yini pɛ shɔgbete ai wesho a Ɗa nya ruu bi i shovi a wuniyɛ.>>
Yesɔ lasi sɔrɔ nya
22Lewɔɔ ɗɔn Yesɔ to yɛti latosi au jadɔyi a geliyinɛ, <<U tɛ nya ɓooti da.>>Kɛɗɔn i yulaparɛ. 23Naa i ɗɔɔ yɛnɛ, Yesɔ to noroorɛ. Ɓai zɛnɛni ɓa sɔrɔ yuu a mii wapo a kakani mii gaa yɛti latosiu tonɛrɛ, siyi a yukɔnɛ waanɛ. 24Yesɔ jadɔyi i yɛu ɗɔbiirɛ i nisiurɛ, i shanɛ,<<Mashɔwɛrɛ, Mashɔwɛrɛ! Ukɛ sharu vɔnɛnɛ!>>Yesɔ yulapare lasi sɔrɔurɛ a mii ãlinɛni; i roorɛɛ, a ɗɔukɔ mii a sɔrɔni i shi shik. 25Yesɔ geliu jadɔyinɛ,<<Ɔ sisɨng ãnɛ kɛpiya?>>Ama ɔ̃rikɛ vibii zaanɛ a setini, i yɛ ɗekɨn a zɔ gelinɛni nɛ, <<Shom piya? Au ãsi sɔrɔ nya a sɔrɔ miini i gɨu nyatɔ piya?>>
Yesɔ gati shɔgbete rãma ni biiyɛ
26Yesɔ au jadɔyi i tɛ nya ɓooti Garasa ukɔ ɔ̃rɛ tɛnɛ ɓooti Galili. 27Naa Yesɔ notɛ, i kpɛsi zɔ a shɔwɔni a komɔɔ wuni shɔgbete au si a rãamani biiyɛ. Si rãamau ɔ̃ tɛttɔ au bi tɛ̃ɛtɛ̃ɛ si to ranɛtɛ a tɔ̃ɔ wati ɔ̃ ɓa a wɛrɛ ni ɓa, si ɔ̃li a yusàà. 28Naa zɛ Yesɔ tɛ, kaa nya a kakani, a nwesi au dɔɔ, a shati nyanɛ,<<Yesɔ, Ɗalapa pẽniba gbete vitɛu kaka ɓa jaa! A kasi ivi ang nkɔni viya? N gakaatɔ, mokɔ tasin raanɛ!>> 29Sha shom aru Yesɔ ãsi suru kɔ̃linɛ nya nɛu shɛ kati jau biini. Aru rãamau lɔriu tɛttɔ a tipi lee- lee, si shɔ mau dɔɔ tɛttɔ a naani a saganya a jaa, ama lɔɔri saganyau tɔ rãamayi i gɔ̃kiurɛ i n-tiu ɗɔgbete laa ɓa bang ɓayɛ. 30Yesɔ hɨunɛ,<<A niinɛ iviya?>>jau kasi nyanɛ<<N niinɛ <Lijiyon,> >>aruviya rãamayi au bi waanɛ. 31Rãmãwi gaki Yesɔ nɛ, ukɔ ɗɔ̃yinɛ a too gbikiri-gbikiri. 32Gãnya isi mɛsɛ̃ɛ a ɗɔuni maani, i ɗɔ nya shaanɛ a dɔkɔpɔ. Kɛɗɔn rãamawi i gaki Yesɔ rɛ nɛu ãi naa a gãnya wayi ɗɔbii, a ãi naarɛ. 33I shɛrɛ a jau biini i tɔkɛ gãnyawi bikɔ. A ɗɔuni gãnyawi piti kpai i yuurɛ yɛnɛ yɛti mii wapo. 34Shɔgbete i ga gãnyawi i zɛ vigbete a ɗɔɔ yɛnɛyɛtɔ, kɛɗɔn i yurɛ i dɔti nya a komɔɔ a yɛti jauni piti kpai. 35Shɔ shɛɓili nɛi zɛ vigbete shɔ pɛliyɛ, naa i atɛ Yesɔ ɗɔbii, i kpaa shɔgbete rãamayi shɛu biiyɛ ɔ̃tɛ a Yesɔ dɔɔ, tosi fãrã gbete u yɛti kasiyɛ, i nta seti piti kpai. 36Shɔgbete i zɛ viuyɛ ikɔyi geli shɔ nɔgbete jau gatiyɛ. 37Kɛɗɔn shɔ ɗɔwi piti kpai i geli Yesɔ nɛ u yuu kati a koouni, aru i nta setitɔ waanɛ. Kɛɗɔn Yesɔ to yɛti latosi a ya ɗɔurɛ. 38Shɔgbete a rãama shɛ au biiyɛ gaki Yesɔ nɛ, <<N yɛpɛ mokɔni.>>Ama Yesɔ ãu naa a kawɔ, a shanɛ, 39<<Yɛ wɛrɛnɛ a geli shɔ vigbete Ɗalapa pɛlaayɛ.>> Jau to yɛti komɔɔ, u ɗɔgbete geli shɔ vigbete Yesɔ pɛliuyɛ.
Yayiru ɓɛjaa soro a suugbete ɗinaa a Yesɔ fãrã
40Naa Yesɔ sɔtɛ a tɛnɛ nya ɓooti wapo da, shɔwi i tɛu naa kaziti, aruviya isi a ɗɔgbete i gauyɛ. 41Ama shɔwɔ ɗɔn shɔ ɓaunɛ Yayiru arɛ; usi yupɛ̃ni Yahudawayi ɗɔ ɔ̃nɛ. A nwesi a Yesɔ dɔɔ a gakiu rɛ nɛu yɛn wɛrɛ, 42aruviya u jasoro ɗɔn gbete, u saa kopi atu ziti, kɛ vɔnɛ. Naa Yesɔ yɛtɛ yɔbm, shɔ kɨntiu kɛ tete. 43Ai tetteni suwɔɔ ɗɔn au sharaa kpaa sigani saa kopi atu ziti suu nisi vigbete au wuniyɛ kpai a shɔ likitayi naa, shɔwɔ ji gatiu ɓa ai tete niɓa. 44Suu arɛ shɔ tete a ɗii Yesɔ nya fãrã a kakɨnti, u siga shirɛ nɔgbete. 45Yesɔ hɨnɛ,<<Pi ɗin naa pi bi piya?>>Kopiya pa nya ɗɔn, Bituru shanɛ,<<Shɔmala, shɔwi i kɨntaatɛ a tete i ɗɔgbete i bɔ̃ɔ̃ ayɛ.>> 46Ama Yesɔ shanɛ,<<Shɔwɔ ɗin naatɛ biini, n zɛtɛttɔ aɗagbete kaka shɛ ang biiyɛ.>> 47Suu zɛrɛ naa shɔ zɛu tɛttɔ, a shɛrɛ zanɛni a ta a yugboti a Yesɔ dɔɔ. A shɔ noo piti kpai, a geliu vigebte sɨurɛ ɗiu fãrã yɛ a nɔgbete gatiyɛni. 48Yesɔ geli suu nɛ,<<Jasum, a sisɨn ãnɛ pɔ̃tɛ a gatitɛ. Yɛnɛ a sisɨn puru.>> 49Aɗagbete Yesɔ usi ɗɔ ruum shanɛ, jashonɛwɔ arɛ a yupɛ̃ni wɛrɛ a geli Yayirunɛ,<<A jaa vɔtɛ, mokɔ yɔri shɔmalanɛ tɔkɨn.>> 50Ama Yesɔ ntarɛ a geli Yayiru nɛ,<<Moka nta setinɛ; ã ɓɛjo sisɨng, yɛ gatitɔ.>> 51Naa to wɛrɛutɛ, ji yaa shɔwɔ ɓa nɛu to a wuni niɓa see Bituru,Yɔhana, Yakubu, a jau ɓeye a ɓini. 52Shɔgbete isi ɗɔuyɛ i ɗɔ sɨnɛ a lɛrinɛ a yuu jauni. Yesɔ shanɛ, <<Ɔ sɨn ɓa; jau jo vɔɓa jasuu ɓɛji ɗɔ noro roonɛ!>> 53I piti kpai i latiu tɔ, aruviya i zɛtɛttɔ nɛ jau vɔtɛtɔ. 54Ama Yesɔ tuu jau a naa a ɓau nyarɛ,<<Yulapanɛ majaa!>> 55U suru sɔɔrɛ, jasuu yulaparɛ nɔgbete, see Yesɔ ã nyanɛ shɔu ãu vishanɛnɛ u shapɛ. 56U ɓeye a ɓini ɔ̃rikɛ vibii zaanɛ, ama Yesɔ ãsiyi nyanɛ ikɔ geli shɔwɔnɛ aru vigbete a shɔ pɛlimni.
Valgt i Øjeblikket:
Luka 8: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria
