Acts 9
9
Shawulu Ruuvini Yaanɛ
1Shawulu yɛ ɗekɨn a shɔ gbeteyi gɨn Uɓeyelapa ratasinɛni waanɛ, nɛn nyoitɔ, kɛɗɔn a yɛ yupɛ̃ni shɔlansi wɛrɛ Ɗa ɗɔbiirɛ, 2a gakiu nɛu ang sẽkoo Yahudawayi ɗɔ ɔ̃nɛ yɛnɛ Damasku aruviya nɛkɛ kpaa shɔ gbete ai gɨn nyaba Uɓeyelapa nɛ, vɔshɔ ko soro u sɔɔriyirɛ shɔu mayi a komoo Urushalima.
3Naa Shawulu atɛ a komoo Damasku ni maani, ɓa shɔ zɛnɛni ɓa, ɗɔsẽsẽ koli a koonyasi au ɗɔbii kpai. 4A nwesi a tipi a nta yeenya u ɗɔgbete geliuyɛ nɛ, <<Shawulu, Shawulu! A tasinraa pi ruviya?>>
5kasinya nɛ, <<A ɓɛɛ piya, Uɓeyelapa?>>
<<Nkɔng Yesɔ, shɔ gbete a tasiu raayɛ,>> Yeenyau shanɛ. 6<<Ama yulapanɛ a tɔ komoo, a ɗɔwakɔ shɔyɛ gelaa vigbete ɔ̃raa kaka jazɨng akɔrɔ a pɛliyɛtɔ.>> 7Shɔ gbeteyi si ɗɔranɛ a Shawuluni i shi shɔk, i ji sha ruwɔɔ ɓa; i nta yeenyau ɓɛɛ ji ɗɔkɔ i ji zɛ shɔwɔɔ ɓa. 8Shawulu yulaparɛ a tipini a ɓeliu nɔrɛ, ama ji zɛ viwɔɔ ɓa. Kɛɗɔn i sãu naarɛ a n-tiu Damasku rɛ. 9Ɔ̃ lee taati ji zɛɗɔ dɔɔɓa, a ɗawuni ji shaa vi ɓa, ji ɓoo viwɔɔ dɔɔɓa.
10Shɔ sisɨn ãnɛ wɔɔ siɗɔn a Damasku u niinɛ Hananinya. Zɛ vi a nɔɔrinɛ, Uɓeyelapa geliunɛ, <<Hananinya!>> a kasinya nɛ.<< Nkɔng yɛm, Uɓeyelapa,>>
11Uɓeyelapa geliu nɛ, <<Mabiinɛ a sã nyabalanɛ gbete shɔ ɓaanɛ kororo, a yɛ Yahuda wɛrɛ a kã jawɔɔ aɗɔn u shɔ Tasu u niinɛ Shawulu. U ɗɔ Ɗa gakinɛ, 12a nɔrinɛ zɛ jawɔɔ u niinɛ Hananinya torɛ, a pɔ̃siunaa rɛ bi aru u kpaa ɗɔzɛnɛ sɔ̃ntɔ.>>
13Hananinya kasinya nɛ, <<Uɓeyelapa, shɔzɛ waanɛ i gelin jaau ruubii tɛttɔ ayuu vikɔ̃linɛ gbete pɛli aa shɔbiiyi yuu kpai a Urushalima. 14Nkɔ atɛ yɛm a Damasku kpaa kaka a yupɛ̃ni shɔlansiyi a wɛrɛ Ɗa i bi aru u sã kopiya shɔ gbeteyi basaa niiyɛ.>>
15Uɓeyelapa geliu nɛ, <<Yɛnɛ, aru n lɔu tɛttɔ u shoshin-vishonɛ, u pɔ̃rɛ shɔ gbeteyi ɓa Yahudawa ɓa a Kpatiyi a shɔ Israilayini i zɛn niitɔ. 16N yɛn tasiu raa-gbete yɛ ɓooyɛtɔ kpai arumi yuu.>>
17Kɛɗɔn Hananinya yɛrɛ, a to wɛrɛurɛ ɗɔgbete Shawulu si ɗɔnyɛ, a pɔ̃siunaa rɛ. A shanɛ,<<Mazɔ̃ Shawulu, Uɓeyelapa shongrɛ Yesɔ au yuu, shɔ gbete shɛ aa ɗekɨn a nyaba gbete a ɗɔ anɛ ɗɔm. Ukɔ shongrɛ aru a kpaa ɗɔzɛnɛ sɔ̃ntɔ, a Ɗa Suru rau bitɛ kpai.>> 18Ji weze tɛ̃ɛ̃ti viwɔɔ naa kaka jazɨng, shɛ a Shawulu nɔɔ kɛ ɗɔukɔ kpaa ɗɔzɛnɛ sɔ̃nrɛ. A yulapa shɔ pɛliu batizima rɛ; 19Akɨnti vishaanɛ u kaka abi sɔ̃nrɛ.
Shawulu Nwari Shɔ Ɗa nyaruubii a Damasku
Shawulu ɔ̃ a shɔ Ɗa gɨnnɛyini lee Ziti a Damasku. 20A yɛrɛ ji wariyuu ɓa, a Yahudawayi ɗɔ,ɔ̃nɛ a gaa shɔ Ɗa nyaruubii nwarinɛrɛ nɛ Yesɔ ukɔ ɔ̃rɛ Ɗa jaa.
21Shɔ gbeteyi nta ruum kpai bizayitɔ i hɨnɛ,<<N ɓa shɔ gbete au si a Urushalima nyoki shɔ gbeteyi bassi Yesɔ yɛ ɓaya? Ji am ɓanɛn sã shɔ nɛn n-tiyi yupɛ̃ni shɔlansiyi ɗekɨn aru shɔu mayitɔ ɓaya?>> 22Ama Shawulu kpaa nyanwanɛ fɛ̃ɛm a kakani yɛnɛ ɗekɨnɗekɨn, a sã Yahudawa gbeteyi a Damasku yuu kpai nɛ Yesɔ kɔ ɔ̃rɛ Shɔshɔranɛ, i ji kasiunya dɔɔɓa.
23Akɨnti gbete dii tɛɛtɛ fɛ̃ɛm, Yahudawayi toli zɔɔrɛ ai maruu nɛi nyo Shawulu tɔ, 24ama shɔwɔɔ geli Shawulu vigbete Yahudawayi ma au yuuyɛtɔ. Niti a zɨmbani i taanɔɔ a nyaba gbete shɔ to komoo yɛ aru i kasiu nyonɛ. 25Ama a zɨmba shɔ gbeteyi gɨn Shawulu i turɛ a yɛti kpẽnti ɓuti i sɔɔriu nyaba wɔɔ a bi kãsiri komoo.
Shawulu A Urushalima
26Shawulu to Urushalima ntabii nɛn ɓasi yuu a Yesɔ jadɔɔyi. Ama i ji ã-sisɨn ɓa au biini ɓa nɛu ji Yesɔ jadɔɔ kɔ ɓa, i kpai i ntau seetitɔ. 27Kɛɗɔn Barnaba au ɗɔbiirɛ a pɔ̃siunaa a n-tiu Yesɔ jaɗɔɔyi ɗɔbiirɛ. A geliyi nɔgbete Shawulu zɛ Uɓeyelapa a nyabarɛ, a nɔgbete Uɓeyelapa nwanya a wuniyɛ. A geliyi wɔsɔ̃n nɔgbete Shawulu nwari shɔ Ɗa nyaruubii a Yesɔ nii a tipi Damasku a kakani seeti ɓa. 28Kɛɗɔn Shawulu ɔ̃ a yini a raa tipi Urushalima kpai, i ɗɔgbete i nwari shɔ Ɗa nyaruubii a Uɓeyelapa nii a kakani seeti ɓa. 29A nwanya a masinya a Yahudawa gbeteyi nta nya Heliniyawa yɛ, ama i yɛ ɗekɨn a nyaba kãnɛ gbete i yɛ nyouyɛ. 30Naa shɔ sisɨn ãnɛyi a Ɗa bi i zɛtɛ nam, i tuu Shawulurɛ yɛnɛ Kayisariya, kɛɗɔn i ãu naa yɛnɛ Taasu.
31Kɛɗɔn aɗɔwakɔ shɔ sisɨn ãnɛyi a Ɗa bi gbeteyi a tipi Yahudiya, tipi Galili, a tipi Samariyayini i kpaa sisɨn roonɛ kɛkn. A nyaba Ɗa Suru naapɔ̃nɛ shɔ sisɨn ãnɛyi a Ɗa bi i kpaa kaka kɨn fɛ̃ɛm, ai sharɛ waanɛ, ai ɔ̃kɛ a ɓuzɨn Uɓeyelapa bassinɛ.
Bituru a Lida a Joopa
32A ɗawakɔ Bituru zaa a tipiu kpai, kɛɗɔn a yɛ ɗɔ shɔ sisɨn-ãnɛ a Ɗa bi gbeteyi ɔ̃nɛ a tipi Lida. 33Aɗɔwakɔ kpaa jawɔɔ u niinɛ Aninya, shɔ gbeteu bi vɔkagbete u ɗɔroonɛ ji zɛnɔɔ lapayunɛ ɓa saa maantaa. 34Bituru geliunɛ,<<Aninya, Yesɔ Kirisi gataatɛ. Yulapanɛ a li-aa ɗɔroonɛrɛ.>> Ji weze tɛ̃ɛ̃ti Aninya yulaparɛ. 35Shɔ gbeteyi ɔ̃nɛ a Lida a Sharon-ni kpai i zɛutɔ, ai kɔsi sisɨnrɛ i gɨn Uɓeyelapa rɛ.
36A Joopa su wɔɔ siɗɔn u niinɛ Tabita, u si shɔ sisɨn ãnɛ (U nii a nya Heliniyawa nɛ Doka.) Suu ãu yuu kpai a ɗɔ vitɔ̃vɨng pɛlinɛ, a shɔraayi naapɔ̃sinɛ. 37A ɗɔukɔ suu rii vɔrɔ a vɔrɛ. Shɔ weliu birɛ a yɔurɛ a jaa gbete a lapa. 38Joopa si ɓa kpɛlɛ a Lida niɓa, naa shɔ sisɨn ãnɛ a Ɗa bi a Joopa i ntatɛ nɛ Bituru u a Lida, i sho shɔzɛ ziti au ɗɔbii nɛ, <<Sɔkɔ pɛli gbãgbã au ɗɔbii.>> 39Kɛɗɔn Bituru mabiirɛ a yɛrɛ a yininyazɔ. Naa totɛ, i tuurɛ yɛnɛ jaa lapa, suuvɔyi kpai i kɨntiu atette, i ɗɔsɨnɛ, i ɗɔ gbeteyi tasiu fãrãyi ɓuzɨn a shɔ ɓiliyini a vi gãsiyini gbete Dokasi pɛliyɛni kpai aɗagbete u si doo nɔniyɛ. 40Bituru shɛshi i ɓilirɛ a jaauni kpai, a ta a yugboti a tipi a gaki Ɗarɛ; kɛɗɔn rinɔɔ a ɗɔɔ vɔrɔu a shanɛ, <<Tabita, yulapanɛ!>>A ɓeli nɔɔrɛ, naa zɛ Bituru tɛ, kɛɗɔn yulaparɛ a ɔ̃rɛ. 41Bituru kpaa birɛ a sãu naarɛ yulaparɛ. Kɛɗɔn a ɓaa shɔ sisɨn ãnɛyi Ɗa binyarɛ, a suvɔyini kpai, a tasirɛyi nɛ suu a suru ni. 42Shɔ sãti ruum a tipi Joopa kpai, a shɔzɛ waanɛ i ã-sisɨnrɛ a Uɓeyelapa biini. 43Bituru ɔ̃ a Joopa dii waanɛ a jawɔɔ wɛrɛ u niinɛ Siman au sɔ̃ koo vivaayiyɛ.
Valgt i Øjeblikket:
Acts 9: Laa
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Word for the World International and The Word for the World Nigeria