Kaaroma 3
3
ONTOPORUA 3.
Aajuda Naapagani. Ompango nehiteero.
1Ano omujuda oku vure jakuauo motshee? Efukareko otari kuaca tshike?
2Ori noruporo orundji. Tangotango sho pua pungurua mokati kauo omarombuerero ga Karunga.
3Otshi ri ngiini, nge jamue mokati kauo kaa nehiteero? Uudiginini ua Karunga otau dimua po nani morua mbo inaa hiteera?. Nandodiro!#3:3 Karunga ota guanica omarombuerero ge, nanto jamue je mu eca inaje mu iteera.
4Oshoka Karunga omunatshiri, omuntu keshe omuniirombo. Otsho kua tshangua: “Ngueje u nokumonikua omujuki meehapu dohe, ngueje u nokukara omusindani nge to umanekua.”#3:4 Epsalmi rjomukuaniirua David. Ota popi Karunga.
5 # 3:5 (Ps 50:6) Ndere uuhineji uetu nge tau orora uujuki ua Karunga, nena atu ti ngiini? Karunga ita ningi neji nge ta geere nondjashi.?
6Ote popi opantu. Tshivarerue, oshoka nena Karunga na pangure ngiini uujuni?#3:6 Karunga ita ningi neji nge ta geere uurunde uaajuda, nanto uurunde mbuka ua orora uo uunene u’uujuki no uesiroshenda rja Karunga. Oshoka Karunga, nge ita geere uurunde uaajuda, oku nokueca uo aarunde jarue jomuujuni aushe, ke ja geere.
7Otshiri ha Karunga, nge tahi oroka ha f’oneenene, ho ha simana moru’iirombo jandje, otshike nduno ngaje te ka pangurua nanena ng’omurunde?
8Jamue oje tu rundira nokutja nasse uo tua ti anuua: “Otshike katu ninga uuhineji, opo uuhanaua u ze mo?” Epanguro rjauo orj’uka.#3:8 Enongero orjo ndika: Inatshi pitikua okuninga uuhineji moru’otshinima otshaanaua.
9Ongiini ano, sse otu ja vure?#3:9 Ss’aajuda otu vure aapagani? Nandodiro! Otsha ningua tsha faturuka nokutja aajuda naapagani oje ri mepangero rjuurunde.
10Metshangua aku tiua: “Kapu nomujuki nand’ogumue.
11Kapu nomunandunge, kapu na gumue ha kongo Karunga.
12Ajeshe oja pjampjana, ajeshe ja katarumeka. Kapu na ngu ta rongo shoka tsh’uka, nande ogumue.
13Omuriui guauo ogua f’ombira h’eguruka, haa tshendjereke nomaraka gauo, uuzigo uepiri ou ri peemrungu dauo.
14Okana kauo ok’uda omatukano nuururu.
15Eempadi dauo di nondapo, nge da ara okutirashi ombinzi.
16Eshanaguro niishuna ji ri meendjira dauo.
17Ondjira hombiri kaje hi tshi.
18Etirokarunga kari ri momuenjo guauo.” (Eehapu domapsalmi)
19Sse otu tshi tshi nokutja atshishe tatshi tiua kompango, otatshi rombuerua mboka je ri mompango,#3:19 Okutja aajuda. opo okana keshe ka muenekue, uujuni aushe u pangurue ku Karunga.#3:19 Ngashi aapagani, naajuda uo aarunde aahineji. Jo aajuda itaa vuru okuimonica aajuki moru’iironga jauo.
20Omuntu ita ningi omujuki moru’iironga jompango. Ompango oho ondjira hokudimburura uurunde.#3:20 Eenkuma daantu pu Karunga itadi dimua po neguanico rjiironga jompango.
21Nena uujuki mbu ua zi mu Karunga oua oroka, nanto katu ri mompango. Ompango naaprofeti oje u okorora nare.#3:21 Ompango ha Moses itahi gandja uujuki, aaue, oKarunga.
22Okutja uujuki mbu ua zi mu Karunga moru’ehiteero rjokuiteera Jesus Kristus, mbu tau gandjua ku ajeshe mba je mu iteera. Kaku nejoororo.#3:22 Okutja ehiteero arishe rjokuiteera Jesus Kristus, nokutja eehapu de neharo rje niipango je. Eno, ehiteero ndika ari ningi aantu ajeshe aajuki.
23Oshoka aantu ajeshe ja jona, no ja kanica ehadimo rja Karunga.#3:23 Oja kanica shoka aakuruntu jetu jotango ja kanica, sho ja tidua mo mo Paradisa, nokutja oshenda hokujapura.
24Otaa peua uujuki ng’otshipeua tshotshari kesiroshenda rje moru’ekuriro rja Jesus Kristus.
25Ngoka Karunga a tura ng’oshura hokugejurukica nombinzi he muene kehiteero, opo a horore uujuki ue pedimopo rjeendjo, di da ningua nare.
26Oshoka Karunga oku nonteni okuorora uujuki ue merara rjonare, opo he muene a monikue ng’omujuki, he a hucire uo omujuki keshe, ngu a hiteera Jesus Kristus.#3:26 Eendjo adishedishe na di donare oda geerua ku Karunga mu Jesus Kristus, sho e tu sira komutshigakano. Otsho uujuki ua Karunga oua oroka muujuni.
27Omua ara ano okuitangera tshee?#3:27 Aajuda kaa vura okuitangera nokutja jo oje vure aapagani. Aaue, aajuda naapagani uo ohaa mon’uujuki uauo mehiteero rjokuiteera Jesus Kristus. Katshi po. Moru’ompango hini? Morua ndji hiironga? Aaue, omoru’ompango hehiteero.
28Sse otu tshi tshi nokutja omuntu ot’ucirua uujuki kehiteero, ha kiironga jompango.
29Nenge Karunga oKarunga kaajuda ike? Ke shi uo kaapagani? Eno, no kaapagani uo.
30Oshoka oku na Karunga gumuike, ngu t’ucire uujuki kehiteero, mba ja fukarekua na mba inaa fukarekua.
31Atu dimi ano ompango moru’ehiteero? Aaue, otatu koreke ompango.
Omission Heklesia Ekatolika, 1951. Namibian Catholic Bishops Conference.