Roma 2
2
Maromak tesi lia la fihir ema Judeu ka laos Judeu
1Tanba nee, belun, se mak o hodi julga ema seluk, afinal o rasik la livre hosi sala. Tanba bainhira o julga ema seluk, nee hanesan o julga o nia aan rasik. Tanba o nebee julga ema seluk, o mos halo sala hanesan sira.#Mateus 7:1; Lucas 6:37 2Ita hatene, bainhira Maromak desidi atu foo kastigu ba ema nebee halo buat aat sira nee, Nia desizaun nee sempre loos. 3Nunee, se o hatudu liman ba ema seluk, maibee o rasik halo aat hanesan ema nee, keta hanoin dehan o bele halai sees hosi Maromak nia kastigu!
4O hatene katak, Maromak laran diak teb-tebes i Nia aguenta hela ho pasiensia nafatin. Nusaa mak o la respeita Nia laran diak nee? Keta halo be o la komprende katak, Nia hatudu Nia laran diak ba o para o bele husik o nia sala hodi fila fali ba Nia.
5Maibee o ulun toos i lakohi husik o nia sala. Nunee iha loron ikus bainhira Maromak hatudu Nia hirus hodi kastigu ema nebee halo sala, o sei simu kastigu todan liu tan. Iha tempu nebaa ema hotu-hotu sei haree katak, Maromak sei tesi lia ho loloos. 6Nia sei selu ba ema ida-idak tuir nia hahalok. #Salmu sira 62:12; Proverbiu sira 24:12
7Maromak sei foo moris rohan-laek ba ema nebee badinas halo buat diak bebeik, atu nunee, Maromak respeita i foti aas sira nia naran. 8Maibee iha mos ema balu mak hanoin sira nia aan deit, i lakohi halo tuir buat nebee loos, sira halo aat hela deit. Ba sira nee Maromak sei hirus teb-tebes too foo kastigu todan.
9Ema sira nebee halo buat aat, sira sei hetan susar no terus. Atu ema Judeu ka laos ema Judeu, sira hetan hotu. 10Maibee ema sira nebee halo buat diak, Maromak sei respeita i foti aas sira nia naran, i foo paz ho hakmatek ba sira. Atu ema Judeu ka laos ema Judeu, sira hotu simu, 11tanba Maromak la fihir ema.#Deuteronomio 10:17
12Ema hotu-hotu nebee halo sala sei hetan kastigu, nia sei mate haketak aan hosi Maromak. Ema nebee laos Judeu, la hatene lei nebee Maromak foo ba Moisés. Maski nunee, Maromak kastigu sira, la bazeia ba lei nee. Maibee ema Judeu nebee hatene lei Moisés nian, Maromak sei julga sira tuir lei nee. 13Tanba laos ema nebee rona lei nee mak moris loos iha Maromak nia futar oin, maibee ema nebee moris tuir lei nee mak moris loos.
14Maski ema nebee laos Judeu la iha Maromak nia lei, maibee dala ruma sira halo tuir duni buat nebee lei nee haruka. Nee hatudu katak, sira nia neon rasik mak hatudu buat nebee loos no sala. 15Buat nebee ema laos Judeu halo nee hatudu katak saida mak Maromak tau iha Nia lei, iha tiha ona iha sira nia neon ho laran. Tanba dala ruma sira rasik hatene katak sira nia hahalok sala, i dala ruma mos sira rasik hatene dehan sira halo buat nebee loos. 16Nunee mos sei akontese iha loron ikus. Iha loron nee, tuir Novidade Diak nebee hau foo sai, Maromak sei foti Jesus Kristu para tesi ema hotu-hotu nia lia. Nia sei tesi buat hotu nebee segredu hela iha ema nia laran no hanoin.
Maromak nia Lei ho sunat la salva ema Judeu
17Entaun, oinsaa ho imi ema Judeu? Imi laran metin katak imi diak ona tanba imi hatene Maromak nia lei, i imi gaba aan katak imi iha Maromak. 18Imi hatene Maromak nia hakarak, i hatene saida mak diak liu, tanba mestri sira hanorin ona ba imi hosi Maromak nia lei. 19Imi fiar aan dehan, imi bele hatudu dalan ba ema matan delek. Imi konsidera imi nia aan hanesan naroman nebee leno ema nebee moris iha nakukun laran. 20Imi hanoin katak imi bele hanorin ema beik no labarik nebee la hatene buat ida. Imi hanoin nunee tanba hosi Maromak nia lei nee imi bele iha matenek no hatene lia loos.
21Imi hanorin ona ema seluk, nusaa mak imi la hanorin imi nia aan rasik? Imi hanorin dehan: la bele naok, maibee imi rasik naok. 22Imi dehan, la bele halo relasaun seksual ho ema nebee laos o nia feen ka laen. Afinal imi rasik halo sala nee. Imi hakribit teb-tebes lulik, maibee imi naok fali sasaan hosi uma lulik. 23Imi foti aan dehan imi mak hatene Maromak nia lei, maibee imi rasik kontra fali lei nee hodi hatuun Maromak nia naran. 24Hori uluk hakerek ona iha Livru Sagradu dehan, “Tanba imi ema Judeu nia hahalok mak ema nebee laos Judeu hatete aat Maromak nia naran.”#Isaías 52:5
25Sunat iha folin bainhira imi, ema Judeu, halo tuir Maromak nia lei. Maibee se imi kontra Maromak nia lei, maka sunat nee la iha folin. 26Se iha ema ruma nebee la sunat maibee nia moris tuir Maromak nia lei, entaun Maromak sei simu nia hanesan fali ema nebee sunat tiha ona. 27Ema sira nebee la sunat maibee moris tuir Maromak nia lei, sira sei foo sala ba imi ema Judeu. Tanba imi hatene lei nee hori uluk kedas i imi mos sunat tiha ona, maibee imi kontra fali lei nee.
28Ema Judeu isin, laos haree hosi liur. I sunat loloos laos buat nebee ema halo iha isin lolon deit. 29Maibee ema Judeu isin, haree hosi nia laran. I sunat nebee loos mak sunat hosi laran, nebee Maromak nia Espiritu mak halo, laos sunat iha isin deit tuir lei. Ema nebee sunat hosi laran nee, Maromak mak gaba, laos ema.#Deuteronomio 30:6
Valgt i Øjeblikket:
Roma 2: BTDT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Wycliffe Timor-Leste.