Ruumiya 3
3
Dhuŋun dho dhan wurijo dhuŋuna gi dhuŋun dha doinya
1A minoŋ iŋirani gwiro dhaŋ gwina gwuthi Yahuudi? i aŋ gwiro gwina gwuthi je ganu gi uredhini? 2Gwoinyadho gi dai peth, abi kwereny ŋediŋa limuminyi dhuŋuna dhina dhidhi di Kalo. 3A dhiro akwai ada coŋ degen lati limuminyi no? Abi dhuŋun dhina dhati dhiminyildhai no dhuthi ŋoma daruje uminyuŋw gwa Kalo tur a? 4Oo; abricul Kaloŋa ŋwurujini titiganu, abi liji peth ro lidhuŋun; gwiro ŋinena ulinuŋwna, Daŋa iŋirini gi dhuŋun dhuŋa dha dhabiŋi, a ŋa dhinyi maji maŋa akimini. 5Abi ada dhuŋun dhega dhina dhati dhiŋir no dhimaŋiye dhuŋuna dhina dhiŋir dha Kalo, alŋa larakwai? Kalo gina gaji gijidhedha kuŋwdhugore guthi dhuŋuna dhina dhati dhiŋir na? (Nyi gwabiŋu gwiro ŋinena athin kwiji abiŋi.) 6Oo. Ada dhimaro minoŋ akwai Kalo gaji gakimiye gidhileo? 7Abi ada dhuŋun dhina dhiro titiganu dha Kalo dhimoinyadhani ŋidhuŋun ŋai ŋiny di majdh gwuŋun, kworaŋ nyibukimini ko gwiro ŋinena nyi gwoma gwike? 8Gwati gwiro minoŋ no, (gwiro ŋinena mani liji coŋ lina luthi dhuŋuna dhina dhike dega arnu alŋa labiŋu dhuŋuna ibidha,) Abricije alapai ŋida ŋina ŋike, di ŋidi ila ŋina ŋiŋir? gi liji lina luthi ẖukm gwina gwidhunu galo.
Liji peth la gidhila like
9Dhuŋun dharakwai? Alŋa liŋiranu degen a? Oo. Dhati dhiro minoŋ gatur no. Alŋa laro kwereny nu Yahuud a Yuunaaniyiin peth limaje gi ŋidi ganu ŋina ŋike; 10gwiro ŋinena ulinuŋwna, Gwati gweda gwina gwiŋir no, gwati gwetipo no. 11Gwati gweda gwina gwiliŋidhi no, a gwati gweda gwina gwathibupe Kaloŋa no. 12Peth limagathani dhai, a ŋediŋa limaro tur. Gwati gweda gwina gwathapai dhuŋuna dhina dhiŋir no, gwati gwetipo no. 13Gwulo gwegen gwiro dhel dhina dhiginu; diŋila dai degen limukinejo lijo ganu; a ŋiya ŋa juma ŋijo ŋwinyu ganu ŋwegen. 14Ŋwinyu ŋwegen ŋwoinyadho luinuŋw a dhuŋun dhina dhire. 15Ŋwora ŋwegen ŋwathabire babraŋ dirinyiye. 16Gi dai degen erna gwo a dhuŋun dhina dhojimaŋ. 17A dhai dha audhaijiye galo dhati dhiliŋidhilo no. 18Ŋidheny ŋa Kalo ŋate gi je ganu jegen no. 19Alŋa liliŋidhi darnu dhuŋun peth dhina dhardhai naamuus dhabiŋaijuŋwuldhai degen lina lo gi naamuus ganu, di ŋwinyu peth luŋthini, a gidhila peth gaje gi ẖukm gwina gwaji gwaje gwa Kalo. 20A minoŋ ŋiro ŋai ŋa naamuus aŋinu yati ina iŋirini gi je ganu juŋun no; ŋinena naamuus gwai liŋa gwo gwa ŋidi ŋina ŋike.
Dhuŋun dhina Dhiŋir dho gi imaan gi al Masiiẖ
21Abi ŋinena dhuŋun dhina dhiŋir dha Kalo dhimaŋini a dhati dhaŋinu naamuus gwai no, a naamuus a nebiŋa limaro shuhuud gwa dhuŋun ibidha. 22Dhuŋun dhina dhiŋir dha Kalo imaan gwai gwa Yasuuⓐ al Masiiẖ dho gi liji peth a degen alaŋ peth lina luminyu; ŋinena athil rui ter no. 23Ŋinena liji peth limapai ŋida ŋina ŋike, a lati limobani di majdh gwa Kalo no; 24liŋirinu tur niⓐma gwai gwuŋun bibre gwai gwina gwo di al Masiiẖ Yasuuⓐ, 25gwina gwima Kalo geta duŋwuro gweta gwadhi dhudhani ganu ŋida ŋina ŋike imaan gwai gi ŋin ŋuŋun, daŋiye dhuŋuna dhuŋun dhina dhiŋir duŋwubire ŋida ŋina ŋike ŋina ŋimerna, mutha gwai dhugore gwortal gwa Kalo; 26daŋiye dhuŋuna dhuŋun dhina dhiŋir gi lamun ibila; duŋwuro gweta gwina gwiŋir, gwina gwiŋiriye gweta gwina gwuminyu Yasuuⓐuŋw. 27A minoŋ are ŋamilai gwada? Gwimerna. Naamuus gwai gwirau? Naamuus gwai gwa ŋiro a? Oo, abi naamuus gwai gwa imaan. 28A minoŋ alŋa ladhura darnu kwiji gwiŋirini imaan gwai a gwati gwiro ŋiro ŋai ŋa naamuus no. 29Kalo giro Kalo ga Yahuud dogo a? Gati giro ga Liumam ko na? Ye, ga Liumam ko. 30Ŋinena Kalo giro getipo; ŋeda gwina gwaji gwaliŋiriye lina lurtedhinu gi imaan, a lina lati lurtedhinu no imaan gwai. 31A minoŋ alŋa laruje naamuus tur imaan gwai a? Oo; abi alŋa lamuthineye naamuus galo.
Valgt i Øjeblikket:
Ruumiya 3: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.