Aⲁmaal Ar Rusul 18
18
Gi Kuurinthuus
1A gidon gi dhuŋun ibidha a Buulus gathani Athiinaŋw, ŋwela Kuurinthuus. 2Ŋwubuje Yahuudi gweta gwina gwan Akiila, gwina gwiro gwa len la Bunṯi, gwina gwidhi gi Iṯaaliiya kwa gwai gwuŋun gwina gwan Biriiskilla, ŋinena dhedhi Kuluudiyuus Yahuud amr peth dilgathani Ruumiyaŋw. Ŋwela degen. 3Ŋinena uthilo ŋiro ŋetipo, allije degen alapai ŋiro, ŋiro ŋegen ŋiro ŋadhi gegita khiyaam. 4Athil abiŋaijiye liji lai la majmaⓐ ŋwamun peth ŋwa Sabith, ŋwari gwa urle dugore galo da Yahuud a da Yuunaaniyiin.
5Abi dina ma Siilaŋa Tiimuuthaawus gwai ula gi Makiduuniya, a Dhigirim dhiŋa Buulusuŋw duŋwabiŋaijo Yahuud darnu Yasuuⓐ gwiro al Masiiẖ. 6A dina maldoinyajo a alilo, ŋwudhudhire ciraŋa juŋun ŋwulaicinu, Ŋin ŋalo ŋaje ŋwura alaŋ ŋwalo; nyi gwijuro. A ŋinena nyi gwela gi Liumam. 7Ŋwugathani kaloŋa ibige ŋwuni gi dunu gwa kwiji gweta gwina gwan Tartiyuus Yuustus, gwina gwathorthadha Kaloŋa, a dunu gwuŋun gwimaijil galo majmaⓐ gwai. 8A Kiriisbus, gwina gwiro kweleny gwa majmaⓐ, uminyi Kwelenya liji lai la dunu gwuŋun peth; a loinyadho la Kuurinthuus dina maldiŋini aluminyi, alⓐamidhini. 9Abi Kweleny abiŋaijo Buulusuŋw gile dhuŋun dhai dhina dhiro ŋinena dhiŋidi ŋwaici, Athaŋa dhenyo no, ŋababiŋi, athaŋa gwugudo no; 10ŋinena atha daje, a kwiji gweta gwati gwuthi ŋoma gwaŋa umeye ŋiya no, ŋinena uthiny lijo loinyadho gi mediina ibigwa. 11Ŋwuje mine gidhileo getipo a luweo nyiril, athuŋwul alimiye degen ganu dhuŋuna dha Kalo.
Qaaliyuunŋa Buulus gwai
12Abi dina ma Qaaliyuun ro mudiir gwa Akhaaya, a Yahuud dira Buulusuŋw nono dhugor dhai dhetipo alodhadha gi kursi ga ẖukm, 13alarnu, Kwiji ibigwa gwurlejo lijo dilorthadha Kaloŋa dhuŋun dhai dhina dhati dhiro dhuŋun dha naamuus no. 14Abi dina ma Buulus ari gwigiye ŋwinyu ŋwuŋun, a Qaaliyuun aici Yahuud nu, Yahuud lai, ada dhuŋun dhimaje dugun dhina dhike i dhina dhadhi rinyiye dhimar, nyi gwaliŋa darnu dhuŋun dhalo dhiro titiganu. 15Abi ada dhuŋun dhimaro dhan dhuŋun a jiriny a naamuus gwalo, daŋadhul nyaŋa; nyi gwati gwuminyu dinyiro gadhi ga dhuŋun ibidha no. 16Ŋwulruce gi kursi ga ẖukm. 17A Yuunaaniyiin peth mutha Suustaaniisuŋw, gwina gwiro kweleny gwa majmaⓐ, alpi gi je ganu ja kursi ga ẖukm. Athibi Qaaliyuun gitijo dhuŋuna ibidha je no.
Aura gwa Buulus gi Suuriiya
18Abi Buulus je ŋwamun ŋwoinyadho manaŋ mine, ŋwubaji ŋwumira limega, ŋwela Suuriiya felluuka gwai, Biriiskilla ŋalai Akiila gwai; a dina muŋw weini lira luŋun gi Kankhiriya, ŋinena gukinu ẖarram gwai. 19Alobani gi Afasus, ŋwulgathani mine; abi ŋeda uni majmaⓐ, alabiŋaijiye Yahuud ŋalai. 20Albothaije galo dilijigalo ŋwamun ŋwoinyadhanu, athuŋw buminyu no; 21ŋwulbimira ŋwulaicinu, Aram nyi gwela Urushaliim dapai ŋidwa ŋina ŋaji ŋila, abi nyi gwaji gwaura dagalo manaŋ, ada Kalo gimuminyi. Ŋwugathani Afasusuŋw. 22A dina muŋw obani gi Ges̱ariiya, ŋwalo ŋwumira kaniisa, ŋwubule gi Anṯaakiiya. 23A dina muŋw je mine ŋwamun coŋ ŋwutu ŋwen peth ŋwa Qalaaṯiiya a ŋwa Fariijiiya, ŋwubiriye calmiz nono peth.
Abulluus gi Afasus
24A Yahuudi gweta obana gi Afasus gwina gwan Abulluus, gwina gwiro kwiji gwa Iskandariiya, gwina gwiro kwiji gwina gwuthi ŋoma gwabiŋi momaŋ a gwiliŋidhi jitham momaŋ. 25Ŋeda ibigwa gwaliminu gi dhai dha Kweleny; ŋinena athuŋw upe ganu dhigirim dhai, ŋwabiŋaijo lijo a ŋwalimiye dhuŋuna momaŋ dhan Kweleny, gwiliŋidhi maⓐmuudiiya gwa Yuuẖanna dogo. 26Athi kwiji ibigwa abiŋaijo lijo gi majmaⓐ re gwai ganu: A dina ma Akiilaŋa Biriiskilla gwai diŋini, alodhadha degen, alaŋajo dhai dha Kalo gwoinyadhanu momaŋ. 27A dina muŋwari gwela Akhaaya, a limega ulijo calmiz jawaab, alabiŋaijo calmiz alari gwaluminyi. A dina muŋw ila, ŋwulgathaje uwa gwuleny lina luminyu niⓐma gwai. 28Ŋoma ŋai ŋina ŋinaŋ ŋwudhinyi Yahuud gi je ganu ja liji, ŋwulaŋajo dhuŋuna momaŋ dhina dhijo gi jitham ganu darnu Yasuuⓐ gwiro al Masiiẖ.
Valgt i Øjeblikket:
Aⲁmaal Ar Rusul 18: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.