रोमी 7
7
ब्याहौ उदाहरण
1विश्वासी डाजेभाइको र डैबहिनीको, ङा इसे कुरा व्यवस्था वार्छकोलाक डेमन ले, भर्मीको जीवाठर मट्टै व्यवस्थौ अधीनाङ छान्ने। इसे कुरा नाखुरीककी थाहा माले र? 2उदाहरणौ लागि कुसेर ब्याहा जाट्च मास्टो भर्मी लहो लेन्जा जीवाठर नियम अनुसार होसे लेन्जौ अधीनाङ न छान्ने। तर इडीक होसे मास्टोओ लेन्जा सीया डेनाङ होसे मास्टो होसे नियम लकीङ स्वतन्त्र छान्ने। 3इटजाट्न न लहो लेन्जा मासीम न होसे मास्टोये अर्को लेन्जाखाटा ब्याहा जाटा डेनाङ होचे व्यभिचार जाट्ले। तर लेन्जा सीच न्हुइङ होसे मास्टो होसे नियम लकीङ स्वतन्त्र छान्ने र अर्को भर्मीखाटा ब्याहा जाट्नाङ र होसे मास्टोकी व्यभिचारौ दोष मालग्डीस्ले। 4विश्वासी डाजेभाइको र डैबहिनीको, नाखुरीक र ख्रीष्टौ शरीरखाटा न व्यवस्थौ लागि सीमने। ताकि नाखुरीक अर्को भर्मी, अथवा नाखुरीक सीच लकीङ जीवाम सोच ख्रीष्टखाटा काट न छान्नी र परमेश्वरौ लागि मीस्या स्याटाक्की ह्योक्नी। 5जब कान पुरानो पापी स्वभावौ अधीनाङ जीवन जीवाम ङुमन्या, तब व्यवस्थै कानुङ शरीरकी अधीनाङ पार्यार पाप जाट्की लैडीयार मृत्यु राका। 6अब कान लिखित व्यवस्थै डेनाङ लेखा पुरानो तरिकै होइन तर पवित्र आत्मौ नयाँ तरिका अनुसार सेवा जाट्ले हीजैडेनाङ चाहाँ कान ख्रीष्टखाटा सीचबाटै इसे व्यवस्थौ अधीन लकीङ स्वतन्त्र छान्नने।
व्यवस्था र पाप
7होट हो डेनाङ कानै ही डेइङ ट? ही साँची न व्यवस्था पाप हो? कुला पाप हो र, होइन। व्यवस्था मालेनाङ च ङै पापकी न माचीन्डीच लेया। हीजैडेनाङ व्यवस्थै, “नीये लोभ जाट्की माछान्ने” डेयार माडेच लेनाङ च ङै लोभ जाट्की माछान्ने डेच कुरा थाहा न माढीन्छ लेया। 8तर जब व्यवस्था लकीङ “लोभ माजाटो” डेच आज्ञा ङै थाहा डुपा, तब ङौ पुरानो जीवनै पट्ट न खालुङ लोभ जाट्च मीमन जाटा। हीजैडेनाङ व्यवस्था मालेकी हो डेनाङ च कानुङ जीवनाङ पापौ हीर अधिकार माछान्च लेया। 9पहिला व्यवस्थौ आज्ञा माह्वार्नाङ ङा लहो न तरिकै जीवाम ङुमन्या, तर आज्ञा वार्छ न्हुइङ ङै पाप जाट्न ङुमनेसा डेयार थाहा डुपा। 10इटजाट्न न ङा आत्मिक रुपाङ सीकी पर्या। व्यवस्थौ आज्ञै जीवन राक्की पर्च तर ङौ लागि मृत्यु टी राका। 11हीजैडेनाङ पापै धार्मिक आज्ञा लकीङ मौका डुपार ङाकी धोका याहा र इटजाट्न पापै धार्मिक आज्ञाकी हतियार खासार ङाकी साटा। 12व्यवस्था लाहा न पवित्र ले, अनि व्यवस्थौ पट्ट न आज्ञाको पवित्र, धार्मिक र असल ले। 13होट हो डेनाङ ही असल व्यवस्थै ङाकी साटा ट? अ हँ होट होइन, पापै टी ङाकी असल व्यवस्थौ हतियार क्योटार साटा। इटजाट्न पापै लहो सक्कली रुप टान्हाकार पाप साँची न दुष्ट लेसा डेयार व्यवस्थै टान्हाक्ले।
भर्मीयो नीस स्वभाव
14कानकी थाहा ले व्यवस्था परमेश्वरौ आत्मा लकीङ मोशाकी याछ हो, तर ङा च शारीरिक स्वभाव अनुसार क्योस्च र कमारा लेखा न पापाङ आर्लाच भर्मी हो। 15ङा ही जाट्न न ले, ङा ङाल्हा न माह्वार्ले। ङै मीमन जाट्च असल काम ङा माजाट्ले तर ङाकी जाक्ङ मासेच खराब काम ही ले ङा होसे न जाट्ले। 16इटजाट्न ङाकी जाक्ङ मासेच खराब काम जाटा डेनाङ ङा व्यवस्थाकी ठिक ले डेयार मन्डीले। 17होटबाटै अब होसे खराब काम ङै जाट्च होइन, इसे च ङा भित्री लेच पापै जाट्च हो। 18ङाकी थाहा ले, की ङा भित्री पाप स्वभाव लेचबाटै कुसेर सेछ कुरै बास माजाट्ले। ङा भित्री सेछ काम जाट्च मीमन लेनाङ र ङा होसे काम पूरा जाट्की माह्योक्ले। 19ङै मीमन जाट्च असल काम ङा माजाट्ले, तर ङै मीमन माजाट्च दुष्ट काम चहिँ टी ङै जाट्न ङुच छान्ने। 20तर इडीक ङाकी कुसे काम जाक्ङ मासेले ङा होसे न काम जाट्ले डेनाङ च होसे काम जाट्च ङा होइन तर ङा भित्री लेच पापै जाट्च हो।
21इटजाट्न ङा इसे व्यवस्थै काम जाट्च थाहा डीन्ल्हे, जब ङा सेछ काम जाट्च मीमन जाट्ले, तब दुष्ट विचार ङाखाटा न छान्ने। 22ङा हृदय भित्री लकीङ न परमेश्वरौ व्यवस्थाङ माह्राङ्ले। 23तर ङा भित्री अर्को न शक्तिये काम जाट्च डाङ्ले। इसे शक्तिये चहिँ ङौ ङाल्हौ न मीमनै मन्डीकी पाच व्यवस्थौ विरुद्धाङ लडाइँ जाट्ले। इसे पापौ व्यवस्थै ङाकी कैदी खास्ले र पापै ङौ शरीराङ काम जाट्ले। 24ङा कुडीक दु:खी भर्मी औला! इसे सीम नुङ्च शरीरकी पाप र मृत्यु लकीङ सुये छुटकारा याल्हे? 25परमेश्वरकी धन्यवाद छान्ख्यो, काल्हौ प्रभु येशू ख्रीष्टै न ङाकी छुटकारा याल्हे। ङा ङाल्हा चहिँ परमेश्वरौ व्यवस्थौ सेवा जाट्ले तर ङौ पापी स्वभावै कमारा लेखा न पापौ व्यवस्थाकी सेवा जाट्ले।
© 2025 by Mother Tongue Translators Society and Wycliffe Bible Translators, Inc.