मत्ती 8
8
येशूये काट कुष्ठरोगीकी गेपाक्च
(मर्कूस १:४०-४५; लूका ५:१२-१६)
1येशू डाँडा लकीङ म्हाका झालार राहा अनि भर्मीकुङ बाड्को भीडै होसकोकी डुटा। 2होडीक न बेला काट जना कुष्ठरोग लग्डीस्च भर्मी राहार होसकुङ अगाडि घुँडा टुसार डेया, “ए प्रभु, नाकै मीमन जाटा डेनाङ ङाकी गेपाक्की ह्योक्ले।” 3येशूये होसे भर्मीमीटाक मीहुट डार डेया, “ङा मीमन जाट्ले, नाङ गेप्की क्योटो!” होडीक न बेला होसे कुष्ठरोग लग्डीस्च भर्मी गेप्की क्योटा। 4होटै येशूये होसकी डेया, “इसे कुरा सुकीर मासेटाक्की। तर लाहाकी पूजाहारी लेठाङ नुङार टान्हाक्की, र मोशौ व्यवस्थाङ डेच लेखा भर्मीकोलाक नाङ गेप्च साक्षीयो लागि भेटी योहो।”
रोमी कप्तानौ विश्वास
(लूका ७:१-१०)
5जब येशू कफर्नहुम सहराङ टाह्रा, अनि काट जना रोमी कप्तान राहार होसकोकी बिन्ती जाट्चै डेया, 6“ए प्रभु, ङौ नोकर पक्षाघात रोगै छाम इमाङ थला पर्न ङुमने।” 7येशूये होसकी डेया, “ङा राहार होसकी गेपाक्ले।” 8तर कप्तानै डेया, “ए प्रभु, नाकोकी ङौ इम भित्री आल्खी ज्योस्च ङा माले।#८:८ ए प्रभु, नाकोकी ङौ इम भित्री आल्खी ज्योस्च ङा माले: होसे कप्तानकी थाहा लेया यहूदीको सेन र अन्यजातिकुङ इम भित्री मापर्ले। तर नाकै वचन मट्टै ङाक्ङ यान्ही, र ङौ नोकर गेप्ले। 9हीजैडेनाङ ङा र बाड्को हाकिमकुङ अधीनाङ ले। ङौ अधीनाङ र सिपाहीको ले। काटकी ‘नुङ्ना’ डेले, होसे नुङ्ले, अर्कोकी ‘रान्हा’ डेले, होसे राल्हे, अनि ङौ नोकरकी ‘इसे जाटो’ डेले, र होचे जाट्ले।”
10होच्यो याङ्च कुरा सेयार येशू छक्क पर्या अनि लहो न्हुङ-न्हुङ राछ भर्मीकोलाक डेया, “साँच्ची न, ङा नाखुरीककी डेले, इस्राएलाङ इडीक बाड्को विश्वास लेच ङै सुकीर माडुप्मने। 11ङा नाखुरीककी डेले, वास्टै अन्यजातिको पूर्व र पश्चिम लकीङ राल्हे, र अब्राहाम, इसहाक र याकूबखाटा स्वर्गौ राज्यौ भोजाङ ज्याकी ङुले। 12तर स्वर्गौ राज्यौ सन्तान छान्की पर्च इस्राएलीको चहिँ बाहिर छुम्ठाङ लोम्हकाले। होला भर्मीको मीस्याक जीक्चै राप्म ङुले।”
13तब येशूये कप्तानकी डेया, “नुङ्नी, नाकै कुङ्च छान्की विश्वास जाट्नने होङ्च न छान्ने।” अनि होच्यो नोकर होडीक न बेला गेप्की क्योटा।
छाचको गेप्च
(मर्कूस १:२९-३४; लूका ४:३८-४१)
14जब येशू पत्रुसौ इमाङ नुङा, होला होसकै पत्रुसौ गुमाकी ज्वरो राहार थला पर्न ङुच डाङा। 15होसकै पत्रुसौ गुमौ मीहुट छुवा र होसकी ज्वरै डास्की क्योटा। अनि होसे सोवार ज्यामा-गामा खासार होसकोकी याहा।
16नामबीक्रखीङ भर्मीकै भूत लग्डीस्च वास्टै भर्मीकोलाक येशू लेठाङ राका। होसकै वचन लकीङ भूतको छ्युका,#८:१६ यहूदीकुङ म्हुङ बाट्च दिनाङ सुयेर काम माजाट्नन्या। तर नाखान कीम्रखीङ चहिँ म्हुङबाट्च दिन भ्यामन्या र कुसे काम जाट्की मीमन ले होसे न जाट्की ह्योक्न्या जस्तै छाच भर्मीकोलाक बुवार येशू लेठाङ राक्की। र पट्ट न छाचकोलाक गेपाका। 17इटजाट्न यशैया अगमवक्तै ङाक्च कुरा पूरा छाना,
“होसको लहे न कानुङ कमजोरीको ला,
अनि कानुङ रोगको सोटार आल्हा।”#यशैया ५३:४
चेलाकै तेरीकी पर्च मुल्य
(लूका ९:५७-६२)
18जब येशूये लहो वरिपरि भर्मीकुङ भीड डाङा र लहो चेलाकोलाक डेया, “लौ काल्हा तालपारी नुइङ।” 19तब काट जना धर्मगुरु होसको लेठाङ राहार इट डेया, “ए गुरु, नाको कुलाक-कुलाक नुङ्ले, ङा र नाकोखाटा न नुङ्ले।” 20येशूये होसकी डेया, “सीलौ ओडार र ग्वाजाकुङ मीम छान्ने। तर भर्मीयो मीजौ लागि च मीटालु ठोन्होक्च ठाउँ र माले।”
21अनि चेलाको मध्याङ काट जनै डेया, “गुरु ज्यु, पहिला ङाकी नुङार ङौ बोइ सीरखीङ ठाक्की डीन्हीङ।” 22तर येशूये होसकी डेया, “मुर्दाकोलाक मुर्दाकै न ठाक्ख्यो।”#८:२२ “मुर्दाकोलाक मुर्दाकै न ठाक्ख्यो।”: यहूदीको सीच भर्मीकी ठाक्की चहिँ साप्फी महत्वपूर्ण मन्डीले। तर येशूये डेया सीच भर्मीकी ठाक्की डेनाङ र मेखोल्हाकी डुट्की चहिँ साप्फी महत्वपूर्ण हो।
येशूये नाम्सु र तालौ छाल बाहाक्च
(मर्कूस ४:३५-४१; लूका ८:२२-२५)
23येशू डुङ्गाङ काल्हार होसकुङ चेलाको र होसकोखाटा न नुङा। 24मोसोमायाङ तालाङ बीह्रीमसेच बाड्को नाम्सु राहा, अनि डीयो छाल सोवार डुङ्गा डीये न्हेपार ठाखी पा। तर येशू चहिँ मीस्न ङुमन्या। 25चेलाको नुङार होसकोकी सोट्चै डेया, “ए प्रभु, कानकी जीवाटाक्नी! काल्हा ठाहार सीकी पाम भ्यामने!” 26अनि येशूये होखुरीककी डेया, “ए चेक्जा र विश्वास मालेचको, नाखुरीक हीजै बीह्रीछ?” तब सोवार होसकै नाम्सु र डीयो छालकी हक्कारीया र बाखी क्योटा। 27याङ्च डाङार होखुरीक पट्ट न छक्क पर्या र डेकी ठाला, “इसे भर्मी कुङ्च हो? नाम्सु र तालौ छालै समेत इसकै डेच मन्डीच लेसा!”
भूत लग्डीस्च नीस जना भर्मीको गेप्च
(मर्कूस ५:१-२०; लूका ८:२६-३९)
28जब येशू तालौ पारी पट्टी गदरिनीकुङ मुलुकाङ टाह्रा, होला भूत लग्डीस्च नीस जना भर्मीको चिहान लकीङ राछै जाट्नाङ होसकोकी डुपा। होखुरीक इडीक बीह्रीमसेच लेया, की होसे लामीङ सुर राम्ह नुङ्ङ जाट्की माह्योक्ङन्या। 29होखुरीकै च्याक्चै इट डेया, “ए परमेश्वरौ मीजा, नाकुङ कानखाटा ही काम ले? ही नाको तोक्डीच समय डेनाङ अगाडि न कानकी दु:ख याखी राछ हो?”
30होखुरीक लकीङ चेक पारी काट बाड्को वाकौ बगाल स्यास्न न लेया। 31होटबाटै होसे भूतकै येशूकी इट डेचै बिन्ती जाटा, “इडीक कानकी नाकै डोन्ने डेनाङ, कानकी होसे वाकौ बगालाङ नुङ्की आज्ञा यान्ही।” 32अनि येशूये होखुरीककी डेया, “नुङ्नी!” होडीक न बेला भूतको होसे नीस भर्मी लकीङ ख्योहा र वाकौ बगाल भित्री पर्या, र पट्ट न वाकौ बगाल भीरीङ हुर्रडीस्चै नुङार तालाङ ठाहार सीया।
33वाक आर्छाचको भोग्डीसार सहराङ नुङा। पट्ट न घटना र होसे भूत लग्डीस्च भर्मीकोलाक ही छानार गेपा डेम सेटाका। 34इसे कुरा सेरखीङ पट्ट न सहराङ लेच भर्मीको येशूकी डुप्की डेम राहा। अनि डुप्च न्हुइङ होसे भर्मीकै होसकोकी, कानुङ इलाका लकीङ नुङ्की क्योट्नी डेयार बिन्ती जाटा।
Valgt i Øjeblikket:
मत्ती 8: EMGP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2025 by Mother Tongue Translators Society and Wycliffe Bible Translators, Inc.
