Fuɗɗoode 2
2
1Nii kammu e leydi e ko woni e muɓɓen fuu kiɓɓiniraa. 2Nyalaande jeɗɗaɓerde ndeen tawi Laamɗo tilake e golleeji muuɗum tagugol fuu. O fowti e golleeji makko tagugol ɗi o gollannoo ɗiin fuu. 3Laamɗo barkini nyalaande jeɗɗaɓerde ndeen, senini nde, sabo e mayre o fowtinii nde o timminnoo tagugol tageefo fuu ndeen.
No neɗɗo tagiraa
4Inan no kammu e leydi tagiraa gilla fuɗɗoode.
Nde Laamɗo Joomiraaɗo tagunoo kammu e leydi ndeen, 5tawi lekki fuu walaano e leydi. Huɗo du fuɗaayno, sabo Laamɗo Joomiraaɗo tomnaayno ƴuwoonde dow leydi tafon. Neɗɗo du walaano faa golla e mayri. 6Ammaa ndiyam na ilannoo na yarna leydi ndiin fuu.
7Laamɗo Joomiraaɗo nokki leydi, tagi neɗɗo, de fuufi e kine muuɗum foofaango nguurndam. Ndeen neɗɗo oon laatii buurɗo. 8Laamɗo Joomiraaɗo waɗi ngesa leɗɗe ley Eden faro lettugal. O watti neɗɗo mo o tagi oon ley ngesa ngaan. 9Laamɗo Joomiraaɗo funni e leydi sii leɗɗe muuyniiɗe ndaarude ɗe ɓiɓɓe muɓɓen mbeli nyaamude fuu. O funni lekki nguurndam hakkunde ngesa ngaan, kam e lekki anndinoohi ko wooɗi e ko boni kiin.
10Gooruwol yalti ley Eden ina yarna ngesa leɗɗe ngaan. Ngol feccii ɗo ngol yalti ɗoon, ngol laatii calɗi nay. 11Salndu arandeeru nduun ina wi'ee Pison. Kayru fiilii leydi Hawila. Leydi ndiin ina woodi kaŋŋe. 12Kaŋŋe leydi ndiin wo kaŋŋe dimo. Ɗakkere wi'eteende Bideliyum e kaaƴe dime bi'eteeɗe onikis du ina ngoni toon. 13Salndu ɗiɗaɓuru nduun ina wi'ee Gihon. Kayru fiilii leydi Kuus fuu. 14Salndu tataɓuru nduun ina wi'ee Tiigiri. Indu wubbira lettugal leydi Asuura. Salndu nayaɓurdu nduun woni Efrat.
15Laamɗo Joomiraaɗo hooƴi neɗɗo mo tagi oon, watti ɗum ley ngesa Eden ngaan faa rema nga, hayba nga. 16O yamiri neɗɗo oon, o wi'i ɗum:
— Aɗa waawi nyaamude ɓiɓɓe leɗɗe gonɗe ley ngesa ɗeen fuu. 17Ammaa taa nyaamu ɓiɓɓe lekki anndinoohi ko boni e ko wooɗi kiin, sabo nde nyaamuɗaa ɓiɓɓe makki fu, a maayan.
No debbo tagiraa
18Ndeen Laamɗo Joomiraaɗo wi'i:
— Neɗɗo haanaa wonude kam tan. Mi waɗanan mo balloowo nannduɗo e makko, kawranɗo o.
19Laamɗo Joomiraaɗo waɗiri daabaaji ladde e pooli fuu e leydi, de waddi ɗi to neɗɗo oon faa ndaara noy o inndirta ɗi. Innde nde o hokki gootel e majji fuu, ndeen laatotoo innde muuɗum. 20Noon neɗɗo oon inndiri daabaaji e pooli e kulle ladde fuu. Ammaa ley majji fuu tawaaka balloowo kawranɗo o. 21Laamɗo Joomiraaɗo ɗannini gorko oon ɗoyngol teddungol, itti ƴi'al wecco muuɗum gootal de uddiri nokkuure ndeen teewu. 22Laamɗo Joomiraaɗo tagirii debbo e ƴi'al wecco ngal itti e gorko ngaal. Ndeen o waddi debbo oon to gorko oon. 23Gorko oon wi'ii:
Ɗum kaa wo ƴi'al jeyaangal e ƴi'e am,
wo teewu njeyaangu e teewu am.
O noddirte debbo,#2:23 E Ibraninkoore, «isa» wo innde debbo, «is» wo innde gorko.
sabo e gorko o ittaa.
24Ɗum waɗi de gorko yoppan inna mum e bammum, de nanngundura e deekum, ɓe ɗiɗo fuu ɓe laatoo neɗɗo gooto.
25Gorko oon e deekum fuu ɓalli ɓoli ngonnoo. Ɓe anndaano semteende.
Valgt i Øjeblikket:
Fuɗɗoode 2: FBF
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© SIM International 2012, 2022