2 TIMOTIUS GI NICAN 1
1
Paulus pigo Timotius
1Srat dini leu da di Paulus. Dani ne no di ya kui Yesus bit leu Allah ningon kanti mem da ri. Noni pinak da leu binhyepo ditri tut niyaijo nijep di Noni preu ei mem nye tu. Igyai niyaijo nijep dima tug hon gi inok gom kin Kristus Yesus.
2 #
Kis. 16:1
Srat dini mem Timotius di nok dipmot di dingon kieti.
Handei kon ba, Icig Allah kin ide Tuhan Yesus Kristus isingat tut na ba, ingondut na cem ba, ibiyai angon jo nyahan.
Paulus pai sigyo bibiwin kep Timotius ningonti
3Dijem sigyo bak Allah. Dinok Nide awak di ningon mien kwes kei dem kep nok didigup bat-didigai bat nya di inok awak mem Noni nipou su. Dijem sigyo bak Noni tirigi dingat nadi tindei na bikwop mmun-njap. 4Diyok ngon kep mpe di ayai nggwei kibor tut da. Gima rino dijoi sut gima dingat na bou diyai him hanyen bu leu binhyepo dingon llei bibor. 5#Kis. 16:1 Diyok ngon kep ade niba ningon com Kristusti di mungkun kei ba, dem kep nok adrot Lois kin apmem Eunike ide niba ningon com Kristusti. Lene dikan tut bipia nani cem aba angon com Kristus noyam kin yoni. 6Gima rino dibiwin kep angonti leu binhyepo amiep hum kin nisindemti di Allah yai bina tirigi po dikes dinda ei abou nggram him dip pima. 7Ninnei di Allah yai binye bindei ba, ingwes mien bi noro sindem tut nye biyai ningon ngakei yamti kin noom ningon binye.
8Gima rino ma ammai sut gima atri tut side Tuhan au. Ma ammai sut gi disima ei ig bui nsi dini drek dip Kristus cem au. Noro Allah misindem tut na mem gima atindei ser nituti tirigi apriet kin ninghuisi wei drek dip Nihyet Di Kei. 9Noni teu nye leu sisar biyai niyaijo nijep binye leu api hig nye leu binhyepo inok Nide limwa nya. Mun dini tug hon igyai munti nya bi noro tug hon Allah ningon kanti kin nisingat tut nyeti cem. Noni singat tut nye tug hon Kristus Yesus nipou tirigi Noni pai tes dihyeisi dini bigyo. 10Noro tini bu ne Allah ndo nisingat tut nyeti tug hon Kristus Yesus di teu nye leu sisar biyai niyaijo nijep binye nikweisi. Noni bindei cut nimai nisindemti leu api kau leu niyaijo nijep di jo kikau tug hon Nihyet Di Kei.
11 #
1Tim. 2:7
Allah ta da bidinok no di ya kui Yesus ba, dinok guru cem leu binhyepo ditri tut Nihyet Di Kei. 12Gima rino diyai ninghuisi wei drek dip mun dini yok. Noro dingon nddong lewo dikan tut No di diba dingon com. Gima cem dingon jo kep bipia Noni sindem mem gima nyohou mun di Noni ba ningon com da tut#1:12: Nipas kep a mun di Noni ba ningon com da tut cem kei lene nipas kep a mun di diba dingon com Noni tut cem kei. kikau ug bipek Njap Ningwig Honti. 13Suar abit nihyet di nijit di dipingok angonti tut tu. Ma akrau kep ade niba ningon com Kristusti kin ningon ngakei yamti di nyeni igyai tug hon ide ninok gom kin Kristus Yesus. 14Suar anyohou mun di bon ninyeng di Allah ba ningon com na tut hagom tug hon nisindemti leu Allah Ninnei di ningat rin ei singonti.
15Akan tut bipia tungwatu nya yahagom ei hanjop Asia bitut Figelus kin Hermogenes ingkek ndok tut da bikes da ei su. 16Noro Onesiforus nya igwam ser dingon ninyen. Handei kon ba, Tuhan ngondut yok. Mbro nok gino disima ei ig bui nsi lo, Onesiforus mmai sut da bi. 17Tirigi noni kwei krau minu ndig Roma lene nggok ser da bikwop mmun-njap bibou tau kep da ug e. 18Akan tut bipia noni mpu da nindig bibor ei minu ndig Efesus nipou su. Handei kon ba, Tuhan ngondut noni mem njap di Noni kes hukum ei tungwatu nya dip.
Valgt i Øjeblikket:
2 TIMOTIUS GI NICAN 1: HAD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind