TIMOTIUS GI NIGOM 5
5
Nicuk Timotiusti tut yo di ingon jo kep nya
1Ma ahyet hwen bit andig-ndau nya ingonti au. Noro ma ambus ingonti dem kep nok ambus acig ningonti. Ma abibon pinjoi pilei nya dem kep nok akinjoi bat nya. 2Ma abibon sindig nya cem dem kep nok apmem lene aba angon di gom bibon sop gwam nitta pilei nya dem kep nok akwohop.
3Ma aba angon di gom binyohou sop kibom di iwer kibom nijit nya. 4Lene gino sop kibom hi bon nimunggwom bat nya kin nidrot bat nya lene ma yo dima igyai mun di igbit ba, inyohou ide sop kibom bit leu nok Allah nihyet nicuk nyeti. Tug hon nisinati dima lene ma ibirop mun di igbit bak ide andigpoi nya hanyen. Gini bindei ba, Allah joi sut yok. 5Sop kibom di nijit rino sop kibom di bon nide bat nya hi di inyohou noni bi. Noni ba ningon com Allah ba, huk nadi bak Noni tut mun di suar bikwop mmun-njap. 6Sop kibom di ba noho rok mun di ngat ningwes eisi lene mbro nok gino niyaijo yo lo, mai su. 7Disok ei nani dip tut mun di dicuk yok tut dini ba, apai sut bak sop kibom kin ide bat nya leu binhyepo bit bon hi pai yo kinei kan bi. 8Ne gino tungwagom nyohou ninsi de nya bi bitut nide ig bei nsi nya bibie ug e bi ne no dima dem kep no di bikep ser ningon jo kepti ba, sibut bibor dor njiriek no di ningon jo kep bi.
9Ma asindui sut sop kibom dino nide njap ug ei ari bingwam ningot muhwindagom bigyo ninyeng tibim kin kibom nindigsi di akwop inyeng dima au. Tut kibom di akwop ninyeng ne suar noni nggre kin sop nya di iwak ijjep gom ngat he#5:9: Nipas kep iwak ijjep gom ngat he cem kei lene nipas kep ingon gom tut ijjep cem kei. 10ba, tungwatu nya yahagom ikan tut bipia noni ne sop di niyai munti nya kei bibor tug hon gi miep nimunggwom bat nya ingon nok mungkun kei cem cigit tungwatu nya kui ig cem ba nibou coi mem yo di ingon jo kep nya cem ngondut yo di yuhui mbum nya cem. Nirop ninda ndigsi tut rino noni ndo nijoi biborti tug hon niyai midyai di kei biborti nya.
11Noro tut sop kibom di pilei nya lene ma akwop inyeng kin kibom nindigsi nya au. Leu gino ibit leu ingut kanti ne ijoi sut gima iwak ijjep bat nya bu. Gima dem kep nok ikes Kristus ei ba, 12ingon ngkwei leu mun di ipreu ei mem Noni lene gima biyai ingon mui. 13Tut gima cem inda jo kep ide midyai nya bi. Noro ihwou ningnai cem isuglai biyam cem ikwek dat mun nyeng hi cem isimbot kep biyam tut mun di igbit bi cem. 14Gima rino dijoi sut bipia kibom di pilei nya iwak ijjep bat nya hi bu leu binhyepo igyai imunggwom ba, inyohou ide ig bei nsi nya. Gino igyai nok gima lene mibon nituti mem ide siceu nya irom ighyet kui nye bi. 15Lewo sop kibom nya ibou poi israwir bitti kin Bilis tu. 16Ne gino sop di ningon jo kep bon nide bat sop kibom nya lene ma nyohou nide kibom nya hak ug. Ma noni hara yo di mbusyamei mem gima inyohou yok au. Lewo yo di mbusyamei inyohou sop kibom di nijit nya he.
17Tut nibou di ibie tut ide mbusyamei mungkun kei lene ma jibirop imuhup hanyen biyok mbican bram yam. Gini bon ninyeng mem yo di ita ibou ei nitri nihyetti kin ningginau tungwatu nyati. 18#Ul. 25:4; Mat. 10:10; Luk. 10:7 Bit leu nok gi ipas ei Allah nihyetti “Ma jingot kep sapi di co kep gandum di cig nisina bai leu ningan dima nuhui ser au.” Lene gi ipas bu “Tungwa tou rino yai midyai lene nimuhup mittau binoni hak ug.” 19#Ul. 17:6, 19:15 Gino hi pai kep nibou mbusyamei gom lene ma amiap kep nihyet au bibou ibou can ibou ningai ighyet tot kep yam hyet tut ug e. 20Bikwop nibou di ingon mui nya ne ma asok kep yok ngkiem ser ei yo di mbusyamei yahagom igyai him leu binhyepo nindigsi nya ittin ser.
21Disok kep na ei Allah kin Kristus Yesus kin malaikati di dia-diau nya yoho bei bipia abit mun di dicuk na tut dini hagom. Ma amig mbus tungwatu nya ba, aba angon kan-kan wai au. 22Ma abisau sut gino ata hi nok nibou mbusyamei au. Leu gino noni dem mem midyai dima bigyo lo, ata noni sisrau ne gima dem kep nok apriet kin nide sisar. Ma angon sok kep nanti ser nhyema angon kwes kei.
23Ma adut minyei he au. Noro ma adut ba anggur ngei poi mien cem ser anghop di dut lewo anggwen-nggwen nyen.
24Bihi ide sisar jo nibreisi bindei dino itug ndei hukum. Noro hiter ide sisar jo nding ba, mipiet ei nidipti bu. 25Nok gima cem bihi ide niyai munti di kei nya jo nibreisi lene gi jo nding bibor ne bit bon jo nding kikau kan bi.
Valgt i Øjeblikket:
TIMOTIUS GI NIGOM 5: HAD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind