อิซราเอล ญาย 11
11
โมเซด เค็ย ควัน เกา อียิบ ต็อง เปิล
1เยโฮวา ก็ ไล โมเซด คือเน “ลบ เน เอิญ ลงโทด ฟาโร เคิบ ครำ อียิบ มี มบลึ เดียว เน วัล ลบ เน เอิญ ลงโทด อัห แร็ง กวา จู ลบ เจ็นนัน ซัง นำ ญอม พระ แป เริล ลบ เน นำ มบรึห แป เริล นังเลาะ นำ มบรึห แป ปัด แอ็ม มด ดาย 2มานะ เน มัห ก็ ต็อง ไล ครำ อิซราเอล จู ล็อง จู นัง ต็อง ไล อัห มด ตึง อัหคล็อง อัหเม ไล อัห ครอ ซอย เงิน ซอย ทอง ตัก ครำ อียิบ นัน” เยโฮวา อัง
3เยโฮวา ก็ แอง ระ ครำ อียิบ ทือ ครำ อิซราเอล ซีเละ ปึง ลูกนอง ฟาโร เคิบ ปึง พซาซน คอง นำ มด นัน อัห ก็ ซำ ทือ โมเซด ดก ซีเละ
4ทาเน โมเซด ก็ ไล ฟาโร คือเน “เยโฮวา อง มเบิล แอ็ม ควัน เกา แป ดาย ‘แจ็ล บึด ปะมาน ฮก ทุม งกีจ็อง อง เริล ทัว ปะเทด อียิบ 5ควัน เกา ครำ อียิบ จู ล็อง ตัก เป็น อัหคล็อง ต็อง เปิล แอ็ม มด ควัน คอง พะเจายูฮัว ตี แกะ ทีซุด ก็ ต็อง เปิล ควัน คอง ปึง อัหเม ตี เป็น คีคา โม แปง เจิง นำ นัน ตี เป็น ครำ ตำตอย ทีซุด นัน อัห ก็ เปิล แอ็ม มด งกีจ็อง ไอ มี เว็น ซีเอ เตาะ ควัน เกา ปึง แปะ แกะ งัว ลา ก็ ต็อง เปิล แอ็ม มด 6ต็อง มี นเซิง ครำ เญ็ม ญ็อก คับ ซะ คับ แญ็น ทัว ปะเทด อียิบ มด วาล นัน ไอ มี เกย มี ซะราย มอก เน ซัง บัดนะ นโดน ก็ ไอ มี ซะราย มอก เน วัล เตาะ 7ทัว ปะเทด อียิบ ต็อง มี ครำ เปิล ดก ซีเละ แต ครำ อิซราเอล ไอ มี ซีวะ อัง เตาะ เค็ด งาล ซะ งำ ซวะ โร็ห ก็ ไอ มี เตาะ งัว ลา แปะ แกะ ก็ เลาะ อุ มด เยโฮวา แอง จังนัน ก็ ระ แป เม็จจึด เค็ย นำ แอง ซิห ครำ อียิบ เคิบ ครำ อิซราเอล ไอ มี เมือนนอย’ เยโฮวา ไล แป จังนะ ดาย 8ดอม เนอะ ไอ มี อิง ปึง ลูกนอง คอง มัห ก็ ต็อง โตะ กราบ ไว เอิญ ฮัก อัห ต็อง ครอ ระ เอิญ ซับรวง ครำ อิซราเอล ปัด แอ็ม เจ็น ปะเทด แป เน” โมเซด อัง แลว โมเซด จ็อก แลว นำ ก็ ทอก เริล ออ นำ แร็ง อ็อด ซีเละ
9กำนา เยโฮวา ก็ เพีย ไล โมเซด แลว คือเน “ฟาโร ไอ มี ญอม ปัง แญง มัห ก็ เพือ ระ เอิญ กุญ แอง ซะ แปลก ดก มบลึ ซิห ปะเทด อียิบ วาล ต็อง เล็ห ซะ ราย ดก มบลึ วาล ซัง นำ พระ แป เริล” เยโฮวา ไล โมเซด จังนะ แลว 10ทาเน โมเซด เคิบ อาโรน ก็ แอง ซะ แปลก ดก มบลึ เคิบ มัด ฟาโร แลว แต เยโฮวา ก็ เฮง แอง ระ ฟาโร ลืน ดาน นำ ก็ ลด ไอ มี ญอม พระ ครำ อิซราเอล เริล เจ็น ปะเทด ออ
Valgt i Øjeblikket:
อิซราเอล ญาย 11: Prai
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
Global Partners