AEMAARIS PAK 24
24
Yahudi owe, Paulus jaos, atakam
1Emesare. Bare ban takarawa, Allah Tame pak baem ipit daytu juas Ananiasam, wan duturu oweam, pemerintah basakamtii atakam tastu ipit juas Tertulusam, era asan aesosesen. Are gubernur bipu aememes, wanam Paulus pota pak aeme atakam akoresen. 2Owe Paulus ajates, wanam Tertulus, Paulus pota aeme pak, emes atakam akorome. “Feliks akotnak! Wore atakam akot asakamtamaarim. Erarawa datapirmi owe asan akot aemapaarum. Wonom bimak binip aptam ipit. Erarawa wan asan pota aemapmas, asan akot aemeroem. 3Danom datapirmi samaniin samaniin emes aporaarum. Dararawa, terima kasih atakam wora akorommarom. 4Dere wora akorommin atakamkope, jane asan akot bajiepor, atakam wora ajanimpormin. Ara atakam karokope. Wore damo jip baemap-ombar. 5Emesare, dare ara aemema ipit, owe bajurusum ipit aporom. Are ara tapirmiin tapirmiin Yahudi owe, jokoman baemem, atakam ajomtamaarir. Are Nasaret atakam bajamkai owe akapar ipit. 6Are Allah Tame pota baemapom aempore. Dararawa, armat ipit ajipirtaerom, wanam daagama Basakamtam Atakam jipu baoorpor, aemom. 7Tentara kapar ipit juas Lisias ere, ara aemema ipit, daban atirikomtaere. 8Are, ara aemema ipit apota pak atakam akores owe, wobipu bajinao, atakam asakamtame. Emesare, wonom era ipit womba aoorportem, ara akoremmarom pota pak takes atakamnak aportemarem.” Tertulus emes atakam aesimen. 9Yahudi owe takesam, “Paulus potanak. Ara akoremarom atakam, ere atakamnak.” Emes atakam aesimesen.
Paulus Yahudi owe gubernur bipu atep ajite atakam
10Emesare. Era gubernur ipit, atakam Paulus akoromen. “Emesare, wonom atakam pakorey.” Emes atakam aesimen. Paulus arawa, atakam akoren. “Wore tahun tanane, atakam ara tapirmi owe asakamtamaarim. Dere era pak apormin. Erarawa ara aemanis jaos pak, ere wobipu atep bajit, akot ajimin. 11Bare 12 aemanse, dere Allah basitim Yerusalem aesoso. Wonom emes atakam, atakamnak aportemarem. 12Allah tame bomonam, Yahudi owe samayen tame bomon takesam, kota wan asanam, dere owe atakam bamkore apok. Denom owe jokoman baemem, atakam bajomtam apok. Ara aemapes owe dere emes pak baem bapor apok. 13Me depota pak aemo atakam wora akorommanis, are anakot atakam baemekore asan apok. 14Dere ere, emes atakam wora akorommin. Ara aememes owe, ara ajamkaimin pak pote agamaen. Dere ere, darfais aAllah asitimmin. Emesare, dere Tuhan asamot owe bajortaer akukuretiie atakam eemnak ambesemkorommin. Ere Yesus atakam are. Dere Musa Basakamtam Atakam buku atakam takesam, Allah atakam bakoretam owe aeapomes buku atakam takesam, eemnak ambesemkorommin. 15Ara aememes owe, Allah aemto pak, banamek apemes. Denom era pak banamek apemmin. Emesare, era dambir aemes turunak owe tekesam ajaorwasittemas. Era dambir aemes jaos owe takesam ajaorwasittemas. Dare emes banamek takan apemmarom. 16Emesare, dere Allah bipu aememin pakam, asamot owe bipu aememin pakam, turunak baem aemporaaremin. Dere emes aememin pak takes, dejak anakot atet apok aemporaaremin.
17Dere tahun bamintep aesosaaru. Derarawa, uang desaman owe bambi batetam aofasio. Denom pak Allah bataetiitam aofasio. 18Dere emes aemo ere, ara aemapes owe, dere Allah Tame bomon aporenis. Bonak ere, denom era atet apok baemem pak tai asirkoromo. Emesare, denom owe tanane damon apok. Basawuam apok. 19Me, Asia tapirmi aejinaoes wan Yahudi owe era asan aememes. Era owe wobipu amba bamarem, ere akotnak. Are depota pak akoremas atakam, atakam amba bakore, ere akotnak. 20Wanam dere Yahudi Agama Atakam Basakamtii Owe bipu aememo, aemapes owe, depota pak aporenis apaye, are atakam bakoretas. 21Emesare, dere atakam takakope akoreo. ‘Dere, dambir owe ajaorwasittemas, emes atakam ambesemmin. Erarawa era owe dera aoorpormanis.’ Emes atakam aesimo.” Paulus emes atakam akoren.
22Me Feliks ere, Tuhan asamot owe bajortaer akukuretiie atakam amsamnaken. Armat ipitam, “Dare waa ara atakam ajiire. Tentara kapar ipit juas Lisias ajinaoto, dere wopota pak, atakam asakamtiitemin.” Emes atakam aesimen. 23Armat ipit arawa, atakam, komandan ipit asakamtame. “Wore ara aemema ipit banamek bataiey. Me, armat ipit tasan bajarkope atii bata bas. Ajoo owe, pak ara bafaafetam, atii bata bas.” Emes atakam aesimen.
24Emesare. Asep bare ere, Feliks aremotin ajinaoemisen. Aremo juas Drusilaen. Are Yahudi saman taoten. Emesare, Feliks Paulus ajaten. Ararawa, Paulus Kristus Yesus bamesem atakam akoretame atakam jane ajien. 25Paulus, turu owe baemem atakamam, jak fiak baemem atakamam, Allah era aemamesto dosa atakam basakamtii bare atakamam, emes atakam akoretamen. Feliks arawa, ombare aememen. “Wonom baesosey. Asan akot aportey, dere wora aojatetemin.” Emes atakam aesimen. 26Are, Paulus, uang, ara batetam, akoten. Erarawa are Paulus bare tanane ajatea ajaien. Are atakam Paulus akoroma ajaien.
27Emesare tahun jamnuk aemapesen. Tahun jamnuk aemapes arawa, Perkius Festus, Feliks, gubernur baem pak jow auuemen. Feliks ere, Yahudi owe jak akot baemapom aememen. Erarawa are Paulus, buji tame bomon, beken ajiapomen.
Valgt i Øjeblikket:
AEMAARIS PAK 24: LAIASC
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
@LAI 1994