Nzev 2
2
Mwathani Ayĩsũva Andũ Maumbũle Naĩ
1Ĩtũngĩanĩei!
Ĩtũngĩanĩe vamwe we mbaĩ ĩte nthoni,
2ũtanamba kũũlũkw'a nĩ kĩseve ta mavuti,
na mbee wa mũthenya wa ũthatu mwai wa Mwĩai Ngai ũtanamba kũvika;
mũthenya wa ũsilĩlo wa Mwĩai Ngai ũtanamba kũvika.
3Manthai Mwĩai Ngai inyw'ĩ andũ auu ĩũlũ wa nthĩ,
inyw'ĩ ala mũatĩĩaa mĩao yake.
Manthai ũlũngalu, manthai ũuu;
nĩkũtonyeka mũkavithwa mũthenyanĩ wa ũthatu wa Mwĩai Ngai.
Mwĩai Ngai Akakany'a Atũi ma Ĩsilaeli
4 #
Ĩsa 14.29-31; Yel 47.1-7; Esek 25.15-17; Yoe 3.4-8; Amo 1.6-8; Nzek 9.5-7 Ndũa ya Ngasa ĩkatiwa yĩ nthei,
na ya Asikeloni ĩkatiwa yĩ mbomboku.
Andũ ma Asitoti makalũngw'a mũthenya katĩ,
na andũ ma Ekeloni makalũngw'a kuma ndũanĩ yoo.
5Kyeva nĩ kwenyu inyw'ĩ andũ ala mũtũaa ũtee wa ũkanga,
inyw'ĩ andũ ma mbaĩ ya Akelethi.
Mwĩai Ngai nũkũtw'ĩĩe ũsilĩlo,
we Kanaani, nthĩ ya Avilisiti;
akakũmina wĩthĩe vai mũndũ ũtialĩte.
6Nthĩ ĩla yĩ ũtee wa ũkanga,
ĩkatw'ĩka isesi sya kũĩthya,
tũsũmba twa aĩthi, na itũũ sya malondu.
7Nthĩ ĩla yĩ ũtee wa ũkanga,
ĩkatw'ĩka ya andũ ma Yuta ala makatiala,
vala makaĩthĩsya indo syoo.
Wĩoo makakomaa nyũmbanĩ sya Asikeloni,
nĩkwĩthĩwa Mwĩai Ngai, Ngai woo akeethĩwa vamwe namo,
na akatuma maendeea nesa ĩngĩ.
8 #
Ĩsa 15.1—16.14; 25.10-12; Yel 48.1—49.6; Esek 21.28-32; 25.1-11; Amo 1.13-15 “Nĩnĩw'ĩte numangano sya andũ ma Moavi na ivũthya sya Aamimoni;
ũndũ maumangĩte andũ makwa,
na makekathĩĩa kana nĩmekwosa nthĩ yoo.
9 #
Mwa 19.24
Kwoou o tondũ nyie Mwĩai Ngai Mwene Ũtonyi W'onthe, Ngai wa Ĩsilaeli nĩ thayũ,
kwa w'o Moavi ĩkekala ta Sondomu,
na Amimoni ĩkekala ta Ngomola;
nthĩ yusũĩte syĩnyeelya na maima ma mũnyũ,
ĩkatiwa yĩ mbanange tene na tene.
Andũ makwa ala matialĩte makatava mũtavo kuma nthĩ isu;
andũ ma mbaĩ yakwa ala matialĩte makamesya nthĩ isu.”
10Ũu nĩw'o andũ ma Moavi na Aamimoni mekanw'a,
nũndũ wa ngathĩĩo syoo,
nũndũ wa kũuma na kũvũthya andũ ma Mwĩai Ngai Mwene Ũtonyi W'onthe.
11Mwĩai Ngai akamatelemya mũno,
yĩla ũkananga ngai syonthe sya nthĩ.
Mbaĩ syonthe ĩũlũ wa nthĩ ikamũthaitha,
kĩla ĩmwe yĩ nthĩ yoo.
12 #
Ĩsa 18.1-7
O ta ũu inyw'ĩ andũ ma Ethiovia,
mũkooawa na ũvyũ wake.
13 #
Ĩsa 10.5-34; 14.24-27; Naũ 1.1—3.19 Mwĩai Ngai akatũmĩa vinya wake kwananga nthĩ ya Asuli;
akatuma ndũa ya Nineva ĩtiwa yĩ nthei na ĩte kĩw'ũ ta weũ.
14Indo ikatindia ndũanĩ ĩsu,
na nyamũ sya kĩla mũthemba sya kĩthekanĩ.
Ndunduuli ikekala maũombokunĩ ma ndũa ĩsu,
na kũambĩa ndĩlĩsyanĩ syayo.
Ngũngũũ ikaambĩa mĩomonĩ ya yo,
andũ makaumya mĩtĩ ya mĩkũũ myakonĩ ya yo.
15Ĩno nĩ ndũa ĩla ĩnaĩ na ngathĩĩo,
ĩla ĩnekalaa yĩ ũsũvĩonĩ.
Ndũa ĩla ĩnaneenaa ĩkasya,
“No inyie, na vai ũngĩ!”
Ndũa ĩsu ĩtiĩtwe yĩ nthei,
wĩkalo wa nyamũ sya kĩthekanĩ!
Andũ onthe ala meĩsĩlaa vakuvĩ nayo,
makamĩthekeea na kũmĩvũthĩĩsya.
BIBLE SOCIETY OF KENYA © 2011