Nzek 7
7
Kũtĩĩa Kũya Kũte kwa W'o Kũikanw'a
1Mwakanĩ wa kana wa kũsumbĩka kwa Ndalio, mũthenyanĩ wa kana wa mwei wa kenda ũla wĩtawa Kĩsilevu, Mwĩai Ngai nĩwaneenie na Nzekalia. 2Andũ ma Mbethi-eli nĩmatũmie Saleseli na Lekemimeleki vamwe na andũ moo makavoye Mwĩai Ngai ameke nesa, 3na maikũlya athembi ma Ĩkalũ ya Mwĩai Ngai Mwene Ũtonyi W'onthe na athani atĩĩ, “Nĩtwaĩlĩte kũendeea kũĩa na kũtĩĩa kũya mweinĩ wa katano, ũndũ tũtwĩe tũyĩka vandũ va myaka mingĩ?” 4Nĩvo ĩndĩ Mwĩai Ngai Mwene Ũtonyi W'onthe waneenie nakwa ambĩa atĩĩ, 5“Neena na andũ onthe ma nthĩ ya Ĩsilaeli na athembi ũmee atĩĩ, ‘Vandũ va ĩvinda ya myaka mĩongo mũonza mĩvĩtũku, inyw'ĩ nĩmwĩthĩĩtwe mũitĩĩa kũya na kũĩa mweinĩ wa katano na wa mũonza. Mwĩsũanĩa mwatĩĩaa kũya nũndũ wakwa? 6Yĩla mũũya na kũnyw'a, nũndũ mũtaĩsaa na kũnyw'a nũndũ wenyu ene?’ 7Nĩkũlya atĩĩ, ii tisyo ndeto ila Mwĩai Ngai waneenie kwĩsĩla kwa athani ala maĩ kw'o mbeenĩ, yĩla Yelũsalemu na ndũa ila imĩthyũlũlũkĩte syaendee nesa, na ngalĩko ya ĩtheo ĩla yĩtawa Nengevu, na nthĩ yĩ nguumo wa iĩma yĩ ngalĩko ya ũthũĩlonĩ wa syũa syatwĩwe?”
Andũ Mataviwe nũndũ wa Kũlea Kwĩw'a
8Mwĩai Ngai nĩwaneenie na Nzekalia amwĩa atĩĩ, 9“Nyie Mwĩai Ngai Mwene Ũtonyi W'onthe nĩasya atĩĩ, ‘Silaai sila wa katĩ, ĩw'anĩai tei na ĩnee ũmwe kwa ũla ũngĩ, 10mũikathĩnasye aka ndiwa, ala makw'ĩĩwe nĩ aaĩthe, aeni kana ngya. Kũikethĩwe mũndũ o na ũmwe ũkũsũanĩĩa ũngĩ ũndũ mũthũku ngoonĩ yake.’
11“Ĩndĩ andũ nĩmaleile kwĩw'a, meethĩwa me ang'endu, na mavinga matũ moo maikew'e. 12Moomisye ngoo syoo ta mavia maikese kwĩw'a mĩao na ndeto syakwa, ila nyie Mwĩai Ngai Mwene Ũtonyi W'onthe naetie kwĩsĩla kwa Veva wakwa, ngĩtũmĩa athani ala maĩ vo mbeenĩ. Kwoou nyie Mwĩai Ngai Mwene Ũtonyi W'onthe nĩnathatiw'e mũno nĩmo, 13na nasya, ‘O ũndũ nametie na malea kũmbĩthukĩĩsya, o namo nĩmambĩtie na nalea kũmethukĩĩsya.’ 14Nĩnamanyaĩĩkisye na kĩlingi mathi kũlika nthĩ ingĩ syonthe ila mateesĩ. Kwoou nthĩ ĩla matiie nĩyatiiwe ĩte mũndũ, weethĩa vai mũndũ o na ũmwe ũtũa vo. Nthĩ ĩsu ya kwendeesya nĩyatiiwe yĩ nthei.”
BIBLE SOCIETY OF KENYA © 2011