Nzek 4
4
Woni wa Katano: Mwathani Ayona Kĩndũ kya Kwilĩĩla Taa
1Ũla mũlaĩka waneenete nakwa nĩwookie ĩngĩ vala nĩĩ na ambamũkya ũndũ mũndũ ũamũkaw'a akomete. 2Nĩwangũlilye atĩĩ, “Wĩona kyaũ?”
Nĩnamũsũngĩie namwĩa, “Nĩona kĩndũ kya kwilĩĩla taa kĩseũvĩtw'e na thaavu mũthei, kilĩĩlwe mbakũli ĩũlũ na kĩna taa mũonza, na kĩla taa wĩ na kũndũ mũonza kwa kwĩkĩwa ndambi. 3#Ũvu 11.4 Ũtee waw'o ve mĩtĩ ĩlĩ ya mĩthata: Ũmwe ngalĩko ya kw'oko kwa aũme kwa mbakũli, na ũngĩ ngalĩko ya kw'oko kwa aka kwayo.” 4Nĩnakũlilye ũla mũlaĩka waneenaa nakwa atĩĩ, “Mũnene wakwa, syĩndũ ii syĩonany'a ata?”
5Nake angũlya, “Nũndũ ũtesĩ syĩndũ ii syĩonany'a ata?”
Nĩnamũsũngĩie namwĩa, “Aiee mũnene wakwa.”
6 #
Esa 5.2
Nĩvo ĩndĩ wambĩie atĩĩ, “Mwĩai Ngai easya atĩĩ ĩũlũ wa Nzelũvaveli, ‘Nyie Mwĩai Ngai Mwene Ũtonyi W'onthe nĩasya kana ti kwa ũtonyi, kana kwa vinya, ĩndĩ nĩ kwa Veva wakwa.’ 7We kĩĩma kĩnene, nue ũũ? Ũkatw'ĩkĩthw'a nthĩ ndindimalu nĩ Nzelũvaveli. Yĩla Nzelũvaveli wĩilĩĩla ĩvia ya kũmina Ĩkalũ, andũ makatana mayasya, ‘Nĩ yanake! Ĩĩ, nĩ yanake!’ ”
8O ta ũu Mwĩai Ngai nĩwaneenie nakwa ambĩa atĩĩ, 9“Nzelũvaveli nĩwe waakie mũsingi wa nyũmba ĩno, na o ta ũu nowe ũkamĩmina. Nĩvo ĩndĩ memanya kana nyie Mwĩai Ngai Mwene Ũtonyi W'onthe, ninyie ngũtũmĩte kũla maĩ. 10#Ũvu 5.6 Nũndũ ũla ũvũthasya mũthenya wa maũndũ manini akatana na akoona Nzelũvaveli akwete kavilũ.”
Ũla mũlaĩka nĩwambĩie atĩĩ, “Taa ii mũonza nĩ metho mũonza ma Mwĩai Ngai, ala monaa kĩla vandũ ĩũlũ wa nthĩ.”
11 #
Ũvu 11.4
Nĩvo ĩndĩ nakwa namũkũlilye atĩĩ, “Nayo mĩtĩ ĩno ĩlĩ ya mĩthata, ũmwe wĩ ngalĩko ya kw'oko kwa aũme kwa kĩndũ kya kwilĩĩla taa, na ũngĩ wĩ ngalĩko ya kw'oko kwa aka kwakyo yĩonany'a ata?” 12Nĩnasyokie ĩngĩ namũkũlya atĩĩ, “Mbonge ii ilĩ sya mũthata syĩ ũtee wa mĩlũngũ ĩlĩ ya thaavu, ĩla yĩkĩĩlawa mauta syĩonany'a ata?”
13Nake angũlya, “Nũndũ ũtesĩ syĩndũ ii syĩonany'a ata?”
Nakwa namwĩa, “Aiee mũnene wakwa.”
14Nĩwanzũngĩie ambĩa atĩĩ, “Aa nĩ ala elĩ metĩkĩw'e mauta, na manyuvĩtwe mamũthũkũme Mwĩai wa nthĩ yonthe.”
BIBLE SOCIETY OF KENYA © 2011