Nzek 2
2
Woni wa Katatũ: Mwathani Ayona Mũndũ Ũkwete Ũlii wa Kũthima
1Woninĩ ũngĩ nĩnoonie mũndũ akwete ũlii wa kũthima! 2Nĩvo ĩndĩ namũkũlilye atĩĩ, “Ũendete va?”
Nĩwanzũngĩie ambĩa, “Nĩendete kũthima Yelũsalemu, nĩmanye ũasa wayo na ũthanthau wayo.” 3Ũla mũlaĩka waneenete nakwa nĩwookie, na mũlaĩka ũngĩ ooka makomane. 4Mũlaĩka ũsu waneenete nakwa nĩweeie ũsu ũngĩ atĩĩ, “Semba ũthi ũkee mwanake ũya, kana Yelũsalemu ĩkatũwa ta motũi mate na ũkũta, nũndũ wa wingĩ wa andũ mayo na indo syayo. 5Mwĩai Ngai easya kana we mwene akeethĩwa ũkũta wa mwaki ũmĩthyũlũlũkĩte na akeethĩwa ũkumyo wayo.”
Ala maĩ Atave Mayĩtwa Masyoke
6Mwĩai Ngai easya atĩĩ, “Ae! Ae! Kĩai mume nthĩ ya ngalĩko ya ĩũlũ vala namũnyaĩĩkĩisye, nũndũ nĩnamũnyaĩĩkĩsye kĩla vandũ. 7Ae! Inyw'ĩ ala mwĩkalaa Mbavilonĩ kĩai mũke Saioni!” 8Mwĩai Ngai Mwene Ũtonyi W'onthe, ũla ũndũmĩte ũkumyonĩ wake kũla kwĩ andũ ala mamũtavie, (nĩkwĩthĩwa mũndũ o na wĩva ũla ũmũkiitaa akiitaa kyũma kyake kya itho) easya atĩĩ, 9“Ngoosea andũ ala mamũtavie ĩtambya, na makatavwa nĩ andũ ala mamatw'ĩte athũkũmi moo.” Nĩvo ĩndĩ mwĩmanya kana Mwĩai Ngai Mwene Ũtonyi W'onthe nĩwe ũndũmĩte. 10Mwĩai Ngai easya atĩĩ, “Inyw'ĩ andũ ma Saioni inai na kũtana, nũndũ nũkĩte kwĩkalany'a nenyu. 11Andũ ma nthĩ mbingĩ makeekwatany'a nakwa nyie Mwĩai Ngai mũthenya ũsu, na makatw'ĩka andũ makwa, nakwa ngatũa vamwe nenyu.” Nĩvo ĩndĩ mwĩmanya kana Mwĩai Ngai Mwene Ũtonyi W'onthe nĩwe ũndũmĩte kũla mũĩ. 12Mwĩai Ngai akoosa amesye andũ ma Yuta methĩwe ũtiĩwa wake ĩngĩ me nthĩ ĩla ntheu, na akanyuva Yelũsalemu ĩngĩ.
13Vindyai inyw'ĩ andũ onthe mwĩ mbee wa Mwĩai Ngai, nũndũ nĩwũkĩte kuma wĩkalonĩ wake mũtheu.
BIBLE SOCIETY OF KENYA © 2011