Tito 3
3
Mwĩkalo wa Aklĩsto ũla Waĩlĩte
1Lilikany'a andũ menyivĩasye anene na ala me na ũkũmũ, o vamwe na kũmew'aa, meyũmbanĩtye kwĩka maũndũ ala maĩlĩte. 2Matavye maikaneenee mũndũ o na wĩva ndeto nthũku, ĩndĩ methĩwe me auu na me avoo, na mavinda onthe mayĩthĩawa me na veva wa wĩnyivyo kwa andũ onthe. 3Nĩkwĩthĩwa navu mbeenĩ o naitũ twaĩ atumanu, mbaa matũ, na tũkakengwa. Twaĩ ngombo sya mawendi mathũku, na motanu ma nthĩ ma kĩla mũthemba. Twekalaa mwĩkalo mũthũku na twaĩ na kĩwĩu; tũkamenwa nĩ andũ naitũ tũkamenana. 4Ĩndĩ yĩla Ngai Mũtangĩĩi waitũ woonanisye tei na wendo wake kwitũ, 5nĩtwatangĩĩiwe. Ndaatũtangĩĩa nũndũ wa meko maseo o na meva ala tweekĩte, ĩndĩ nĩ kwondũ wa tei wake mwene, kwĩsĩla kwa Veva Mũtheu, ũla ũtũtusaa ũsyao mweũ na kũtũnenga mwĩkalo mweũ kwa kũthesya ngoo sitũ. 6Ngai nĩwatusũisye na Veva Mũtheu kwĩsĩla kwa Yesũ Klĩsto Mũtangĩĩi waitũ, 7nĩ kana kwĩsĩla mumonĩ wa Klĩsto tũtuwe alũngalu, na kũkwata thayũ wa tene na tene ũla nĩw'o wĩkwatyo witũ. 8Ndeto isu nĩ sya w'o vyũ.
Nĩenda ũneene maũndũ asu na vinya mũno, nĩ kana ala mamũĩkĩĩa Ngai menengane ĩvinda yonthe kwĩka maũndũ maseo, ala nĩmaĩlĩte na ma kũtethya andũ onthe. 9Ĩndĩ ĩvathane na ngananĩo, ngewa ĩũlũ wa mosyaanĩo ma andũ; kũemanwa na kũtetany'a ĩũlũ wa Mĩao ya Mwose, nĩkwĩthĩwa maũndũ ma mũthemba ũsu mai na ũtethyo na nĩ ma mana. 10Mũndũ wa kĩthokoo wamũkany'a ĩvinda yĩmwe kana kelĩ, ekana nake. 11We nĩwĩsĩ kana mũndũ wa mũthemba ũsu nũtiĩte nzĩa, na naĩ syake nĩsyonanasya kana we nĩ mũvĩtany'a.
Motao ma Mũthya
12Yĩla nĩtũma Alitemasi kana Tikikasi kwaku, wĩtata mũno wũke Nikovolisi kũla nĩĩthĩwa, nũndũ nĩvangĩte kwĩkala kũu ĩvinda ya mbevo. 13Tata ũndũ vatonyeka ũtetheesye Nzenasi, ũla mũsili wa makoani, vamwe na Avolo mambĩĩe kyalo kyoo, na ũisisya nĩ kana methĩwe na syĩndũ syonthe ila me na vata nasyo. 14Andũ maitũ maĩlĩte kwĩmanyĩsya kwĩka maũndũ maseo, nĩ kana matetheeasye kũla kwĩ mavata ma w'o, na ti kwĩkalaa mana.
15Andũ onthe ala me vamwe nakw'a kũũ nĩmakũkethya. Tũkethesye anyanyae maitũ onthe ala twĩ ma mũĩkĩĩo ũmwe.
Mumo wa Ngai nĩwĩthĩwe nenyu inyw'onthe.
BIBLE SOCIETY OF KENYA © 2011