Tito 1
1
1Kuma vala nĩĩ nyie Vaũlo, mũthũkũmi wa Ngai na mũtũmwa wa Yesũ Klĩsto. Nyie nĩnyuvĩtwe nĩtetheeasye andũ ala manyuvĩtwe nĩ Ngai, mongeleke kwĩthĩwa na mũĩkĩĩo mũlũmu na ũmanyi wa ũw'o wa Ngai. 2Mũĩkĩĩo na ũw'o ũũ syĩ na wĩkwatyo wa thayũ ũtathela. Ngai ũla ũtesa kũneena ũvũngũ, nĩwe wathanie myaka ya naku tene, 3na kwoou ĩvinda yĩla yaĩlĩte yavika, awumĩlya kwĩsĩla ũtũmaninĩ wa ndeto yake. Nanengiwe ũtũmani ũsu nĩũtavany'e kwĩanana na mwĩao wa Ngai Mũtangĩĩi waitũ.
4 #
2Ako 8.23; Aka 2.3; 2Tim 4.10 Valũa ũũ wakwa nĩ kwaku we Tito, mwana wakwa wa w'o mũĩkĩĩonĩ ũla tũkwatanĩe.
Mumo na mũuo nĩsyĩthĩwe naku kuma kwa Ngai Asa na Klĩsto Yesũ Mũtangĩĩi waitũ.
Ũthũkũmi wa Tito Kĩthamanĩ kya Kĩlete
5Nakũtiie Kĩlete nĩ kana wĩke maũndũ ala matialĩte, na ũinyuva atumĩa ma ĩkanisa nthĩnĩ wa kĩla ndũa, kwĩanana na ũndũ nakũtavisye. 6#1Tim 3.2-7 Mũtumĩa no nginya ethĩwe atawetanĩw'a na ũndũ ũthũku, e mũũme wa kĩveti o kĩmwe, na syana syake no nginya ikethĩwa syĩ aĩkĩĩi, na itaweteka kwĩthĩwa na mwĩkalo mũthũku kana kwĩthĩwa mbaa matũ. 7Mũsyaĩĩsya wa ĩkanisa aũngamĩaa wĩa wa Ngai, na nĩwaĩlĩte kwĩthĩwa atawetanĩw'a na ũndũ mũthũku. Ndakethĩwe na mĩtavyo, kana mũndũ ũthataa mĩtũkĩ, mũthengi, mũndũ wa kaũ kana wĩ ĩtomo ya syĩndũ syeene. 8Ĩndĩ ethĩwe endete andũ, na endete kwĩka maũndũ maseo, mũndũ wĩ wĩting'o, mũtheu ngoo, mũlũngalu, na wĩ mwĩkalo mũseo. 9O ta ũu nĩethĩwe akwatĩte akalũmya ki ũtũmani ũla ũtonya kwĩtĩkĩlĩka na wosanaa na ũmanyĩsyo ũla wa w'o, nĩ kana ethĩwe atonya kũmanyĩsya angĩ ũmanyĩsyo ũsu wa w'o, na o ta ũu ayonany'a ĩvĩtyo ya ala mekũleana naw'o.
Ũndũ Amanyĩsya ma Ũvũngũ Mailyĩ
10Ve aingĩ, na mũno mũno aĩkĩĩi kuma ũthaithinĩ wa Kĩyuti, mbaa matũ ala meũkenga andũ ala angĩ na ndeto syoo sya mana. 11Mavindĩthye nĩkwĩthĩwa nĩmeũvũavũany'a na kũvalaany'a ngwatanĩo ya aĩkĩĩi kwa kũmanyĩsya kĩla mataĩlĩte kũmanyĩsya, na meĩka ũu me na kĩeleelo kĩthũku kya kwĩanĩsya mawendi moo. 12O na mwathani ũmwe woo mbene nĩwaisye atĩĩ, “Andũ ma Kĩlete mavinda onthe maneenaa ũvũngũ; mailyĩ ta nyamũ mbai na nĩ andũ atulu na me ĩtomo.” 13Ũkũsĩ ũsu nĩ wa w'o. Kwoou makany'e mũno, nĩ kana methĩwe na mũĩkĩĩo ũla waĩlĩte, 14vandũ va kũatĩĩaa mbano sya mana sya Ayuti, na mĩao yumanĩte na andũ ala maleete ũla w'o. 15Kĩla kĩndũ nĩ kĩtheu kwa andũ ala atheu ngoo, ĩndĩ vai kĩndũ kĩtheu kwa ala avuku ngoonĩ na mataĩkĩĩaa, nũndũ ilĩko syoo na wasya woo wa ngoo nĩmbukye. 16Andũ ma mũthemba ũsu maasya nĩmamwĩsĩ Ngai, ĩndĩ meko moo nĩmaleanĩte na ũu. Nĩ andũ ma kĩmena matendeka, na mbaa matũ itatonya kwĩka ũndũ o na wĩva mũseo.
BIBLE SOCIETY OF KENYA © 2011