Lũ 1
1
Elimeleki na Mũsyĩ wake Maithama mathi Moavi
1Tene yĩla Ĩsilaeli yatongoew'e nĩ Asili, nĩkweethĩiwe na yũa nthĩ ĩsu. Kwoou mũndũ ũmwe kuma Mbetheleemu nthĩ ya Yuta nĩwaendie e na mũka na ana make elĩ kwĩkala kwa kavinda ũeninĩ nthĩ ya Moavi. 2Mũndũ ũsu eetawa Elimeleki, na mũka eetawa Naũmi. Ana make ũmwe eetawa Maloni na ũla ũngĩ eetawa Kilioni. Andũ asu maĩ ma mũsyĩ wa Aevilathi ala matwĩe Mbetheleemu nthĩ ya Yuta. Nĩmaendie Moavi matũa kw'o. 3Elimeleki mũũme wa Naũmi nĩwakwie, na amũtia e na ana make elĩ. 4Ana asu nĩmatwaie aka Amoavi. Ũmwe eetawa Oliva, na ũla ũngĩ Lũthi. Ĩtina wa kwĩkala nthĩ ĩsu vandũ va myaka vakuvĩ ĩkũmi, 5Maloni na Kilioni nĩmakwie o namo, Naũmi atiwa e weka, ate syana kana mũũme.
Naũmi na Lũthi Maisyoka Mbetheleemu
6Ĩtina wa ĩvinda ĩna, Naũmi e kũu Moavi nĩweewie kana Ngai nũathimĩte andũ make ma Ĩsilaeli kwa kũmanenga ngetha mbingĩ. Kwoou nĩweeyũmbanisye aume Moavi asyoke kwoo e na aka-a-mwana. 7Nĩwaumie vala watwĩe e na aka-a-mwana asu elĩ na athi na nzĩa ĩla yaĩ ĩmatwae nthĩ ya Yuta. 8Nĩvo ĩndĩ Naũmi weeie aka-a-mwana asu atĩĩ, “Syokai mũsyĩ, kĩla ũmwe wenyu kwa inyia wake. Nĩvoya Mwĩai Ngai amwĩke nesa o tondũ inyw'ĩ mwambĩkie na mweekie andũ makwa ala makwie. 9Mwĩai Ngai nĩatonyethye kĩla ũmwe wenyu kũkwata mũũme ũngĩ na kwĩthĩwa na mũsyĩ wake mwene.”
Kwoou Naũmi nĩwamakethisye na ngethi ya wendo mataanĩsye, ĩndĩ mambĩĩa kũĩa na wasya mũnene. 10Nĩmamwĩie atĩĩ, “Aiee, ithyĩ twĩthi naku kwa andũ menyu!”
11Naũmi amea atĩĩ, “Eĩtu makwa, no nginya mũsyoke kwenyu. Mwĩenda kũendany'a nakwa nĩkĩ? Mwĩona ta ndonya kũsyaa ana angĩ makamũtwaa? 12Syokai kwenyu eĩtu makwa; nyie nĩ mũkũũ nditwaĩka ĩngĩ. O na ngasya nĩna wĩkwatyo, na ngĩkwata mũũme ũtukũ ũũ na ĩndĩ ngĩsyaa syana, 13mweteela ikesa kwĩana? Mwĩona mũlea kũtwawa nũndũ woo? Aiee, eĩtu makwa, nĩmwĩsĩ kana ũu ndũtonyeka. Nĩna woo mwingĩ kwĩ inyw'ĩ, nĩkwĩthĩwa Mwĩai Ngai nũnengete ũkũno.”
14Aka asu meew'a ũu nĩmambĩĩie kũĩa ĩngĩ. Nĩvo ĩndĩ Oliva wakethisye Naũmi na ngethi ya wendo mataanĩsye, na asyoka kwoo, ĩndĩ Lũthi eeyĩemeesya vala ve Naũmi. 15Naũmi nĩweeie Lũthi atĩĩ, “Mũka wa mwana-a-inyia wa mũũme waku nĩwasyoka kwa andũ ma mbaĩ yoo, na kwa ngai syoo, mũatĩĩe ũsyoke kwenyu o naku.” 16Ĩndĩ Lũthi amũsũngĩa amwĩa atĩĩ, “Eka kũnthing'ĩĩsya nume vala ũĩ, kana kũmbĩa nĩsyoke ngũtie. Vala ũũthi nĩvo ngũthi, na vala wĩtũa nĩvo nĩtũa. Andũ maku makeethĩwa andũ makwa, na Ngai waku akeethĩwa Ngai wakwa. 17Vala wĩkw'ĩĩa nĩvo ngakw'ĩĩa, na novo ngathikwa. Mwĩai Ngai nĩangany'e mũno ethĩwa ngataananw'a naku nĩ kĩndũ kĩngĩ eka kĩkw'ũ.”
18Yĩla Naũmi woonie kana Lũthi nĩweeyumĩtye vyũ kũendany'a nake, nĩwaekanie nake. 19Kwoou me elĩ nĩmaendeeie na kyalo nginya mavika Mbetheleemu. Mavika kũu andũ onthe ma ndũa ĩsu nĩmaseng'ie mũno kũvika aka makũlya atĩĩ, “Ii, ũũ nĩ Naũmi?” 20Naũmi nĩwamasũngĩie amea atĩĩ, “Ekai kũmbĩta Naũmi#1.20 Naũmi: Ũalyũlo wa ĩsyĩtwa yĩĩ kĩthyomonĩ kya Kĩevelania nĩ Mũtanu mbĩtei Mala#1.20 Mala: Ũalyũlo wa Ĩsyĩtwa yĩĩ kĩthyomonĩ kya Kĩevelania nĩ Wũũ nĩkwĩthĩwa Ngai Mwene Ũtonyi W'onthe nũmbĩkĩte maũndũ me woo mũno. 21Naumie kũũ nĩna kĩla kĩndũ, ĩndĩ Mwĩai Ngai andũnga nĩ mũthei. Yu mwĩmbĩta Naũmi nĩkĩ na Mwĩai Ngai Mwene Ũtonyi W'onthe nũnzilĩlĩte na akanenga thĩna?” 22Ũu nĩw'o Naũmi wasyokie kuma nthĩ ya Moavi e na Lũthi mũka-a-mwana, ũla waĩ wa mbaĩ ya Amoavi. Mavikie Mbetheleemu ĩvinda ya kũketha nganũ ya mbaale yĩyambĩĩa.
BIBLE SOCIETY OF KENYA © 2011