Mika 7
7
Mothũku ala Meekawa nĩ Andũ ma Ĩsilaeli
1Nĩna thĩna mwingĩ!
Nĩilyĩ ta mũndũ wĩ na nzaa,
ũla wĩthĩaa vate ĩtunda yĩtialĩte mĩtundanĩ,
na vate nzavivũ itialĩte mĩsavivũnĩ,
nũndũ nzavivũ na makũyũ ala me mũyo,
nĩmaminĩte kũkethwa.
2Vai mũndũ mũlũngalu o na ũmwe ũtiĩtwe ĩũlũ wa nthĩ;
vai mũndũ mũĩkĩĩku.
Kĩla mũndũ eteelaa akwate mwanya wa kũaa;
kĩla mũndũ asyĩmaa andũ ala make.
3Moko moo nĩmekaa ũndũ ũla mũthũku na kĩthito;
mũsumbĩ na mũsili nĩmetasya ĩtuvi ya wendeesyo.
Andũ ala me ũtonyi nĩmaneenaa ndeto nthũku ila syendeeasya thayũ woo,
me vamwe nĩmaseũvasya mũvango wa kwĩanĩsya ndeto isu.
4Mũndũ ũla mũseo vyũ kwoo ailyĩ mĩtae ya kĩthekanĩ,
na ũla mũlũngalu vyũ nĩ mũthũku kwĩ wiio wa mĩw'a.
Mũthenya nũvikie ũla Ngai wĩkany'a andũ,
o tondũ asyaĩĩsya moo athani mamatavisye;
yu nĩavũavũanu.
5Ndũkaaĩkĩĩe mũtũi waku,
na ndũkaaĩkwatye mũnyanyau;
sũvĩa ndeto syaku ila ũneenaa,
o na ũineena na kĩveti kyaku kĩla wendete.
6 #
Mat 10.35-36; Lk 12.53 Nũndũ mwana nĩwanangĩaa ĩthe ndaĩa,
na mwĩĩtu nũng'endeaa inyia wake.
Mũka-a-mwana nũng'endeaa inyia wa mũũme;
mũmaitha wa mũndũ no andũ ala ma mũsyĩ wake mwene.
7Ĩndĩ ngalĩkonĩ ĩla yakwa,
neteelaa Mwĩai Ngai na wĩkwatyo,
neteelaa Ngai, ũla ũndangĩĩaa,
Ngai wakwa nũkwĩw'a mboya syakwa.
Mwĩai Ngai Akatangĩĩa Andũ make
8We mũmaitha wakwa, ndũkatane nũndũ wa mathĩna makwa;
yĩla navalũka, ngookĩlaa.
Yĩla nĩ kĩvindunĩ,
Mwĩai Ngai akeethĩawa kyeni kyakwa.
9Nĩngũmĩĩsya ũkany'o wa Mwĩai Ngai,
nũndũ nĩnĩmũvĩtĩsye,
nginya yĩla ũkandetea na kũneena ĩũlũ wa ũlũngalu wakwa.
Akambumaalya kyeninĩ,
na ngoona ũlũngalu wake.
10Nĩvo ĩndĩ amaitha makwa makona ũu,
na ũla waneenie angũlya, “Aĩva Mwĩai Ngai, Ngai waku?”
Akakwatwa nĩ nthoni.
Ngamwona e mũsinde,
na akakinyangĩwa nthĩ ta ndaka nzĩanĩ nene.
11Mũthenya nĩwũkĩte wa kwaka ngũta sya Yelũsalemu;
mũthenya ũsu mĩvaka ĩkathanthaw'a mũno.
12Mũthenya ũsu andũ makooka kũla mũĩ,
kuma Asuli na kuma ndũanĩ sya Misili.
O ta ũu makooka kuma Misili na kuma kĩsionĩ kya Ũsĩ wa Euvalati;
kuma ũkanga kũthi ũla ũngĩ, na kuma kĩĩma kũthi kĩla kĩngĩ.
13Ĩndĩ nthĩ ĩkatiwa yĩ nthei,
nũndũ wa mothũku ma andũ ala matũaa vo.
Tei wa Ngai kwa Andũ ma Ĩsilaeli
14Ame Mwĩai Ngai, ĩthĩwa mũĩthi wa andũ maku,
andũ ala ũnyuvĩte makethĩwa maku.
O na kau mekalaa kĩthekanĩ me oka,
ve nthĩ nou ĩmathyũlũlũkĩte.
Nĩmathi makaye isesinĩ sya Mbasani na Ngileati,
o ũndũ meekaa tene.
15Ngamony'a maũndũ ma kũseng'ya,
o ũndũ namekie yĩla namaumisye nthĩ ya Misili.
16Yĩla andũ ma mbaĩ ingĩ meona ũu,
makakwatwa nĩ nthoni,
o na kau me vinya mwingĩ,
makakunĩka makanyw'a moo na matũ moo nĩ kũsonoka.
17Makakoma na ĩvu kĩtoonĩ ta nzoka,
na ta tũsamũ tũla tũtambũkaa ĩũlũ wa nthĩ;
makooka kuma kũndũnĩ kwoo kũlũmu,
matetemete mausũĩtwe nĩ w'ĩa;
makamũsyokea Mwĩai Ngai, Ngai waitũ me na w'ĩa,
na makekalaa me na kĩkĩo kyake.
18Kũiĩ Ngai ũngĩ taku,
nue ũekeaa naĩ na kũekea mavĩtyo ma andũ maku ala matialile,
andũ ala wanyuvie methĩwe maku.
Ũthatu waku ndwĩkalaa tene na tene,
ĩndĩ nĩwendeeaw'a mũno nĩ kũtwony'a tei waku.
19Nũũtwĩw'ĩa tei ĩngĩ na kũthesya naĩ sitũ,
na kwĩkya mavĩtyo maitũ vala valiku ũkanganĩ.
20Nũkwony'a nzyawa sya Yakovo ũĩkĩĩku waku,
na kwony'a nzyawa sya Avalaamu wendo waku ũtaolekaa,
o tondũ weevĩtie kũla kwĩ aaũmae maitũ kuma tene.
BIBLE SOCIETY OF KENYA © 2011