Yos 5
5
1Yĩla asumbĩ onthe ma Aamoli ala matwĩe ngalĩko ya ũthũĩlonĩ wa syũa ya Ũsĩ wa Yolotani, na asumbĩ onthe ma Akanaani ala matwĩe ũtee wa Ũkanga wa Menditelenia, meewie kana Mwĩai Ngai nũng'alĩthisye Ũsĩ wa Yolotani nginya andũ onthe ma Ĩsilaeli mainga, nĩmakwatiwe nĩ w'ĩa mwingĩ mũno na makw'a ngoo nũndũ wa kũkĩa andũ ma Ĩsilaeli.
Andũ ma Ĩsilaeli Mayaĩkwa me Ngilikali
2Ĩvindanĩ yĩu Mwĩai Ngai nĩwaneenie na Yosua amwĩa atĩĩ, “Seũvya tũvyũ tũĩ kuma ĩvianĩ yũmũ nĩ kana waĩke andũ ma Ĩsilaeli.” 3Kwoou Yosua nĩweekie ũndũ Mwĩai Ngai wamwĩaĩĩte na amaĩkĩa vandũ veetiwe kuma ĩvinda yĩu Kĩĩma kya Nzaĩko. 4Yosua eekie ũu nũndũ aũme onthe ala maumie nthĩ ya Misili me na ũkũũ wa kũthi kaũnĩ nĩmakw'ĩĩe weũnĩ me kyalonĩ ĩtina wa kuma nthĩ ĩsu. 5Aũme onthe ala maumĩte Misili maĩ aĩke ĩndĩ ala masyaĩwe weũnĩ me kyalonĩ kya kuma Misili mayaĩ aĩke. 6#Mot 14.28-35 Andũ ma Ĩsilaeli nĩmekalile mayanganga weũnĩ vandũ va myaka mĩongo ĩna, nginya aũme onthe ala maĩ na ũkũũ wa kũthi kaũnĩ mayuma Misili makw'a nũndũ nĩmaleile kũmwĩw'a Mwĩai Ngai. Mwĩai Ngai nĩweevĩtĩte kũla maĩ akasya kana maikalika ĩla nthĩ nthwii na nou wathĩte aaũmae moo kana akamanenga. 7Kwa kĩtumi kĩu Mwĩai Ngai nĩwasũvĩie syana syoo nĩ kana syĩthĩwe vandũ voo. Syana isu nĩsyo Yosua waĩkie nũndũ ĩyaa-aĩkwa yĩla maĩ kyalonĩ weũnĩ. 8Andũ ma Ĩsilaeli mamina kwaĩkwa nĩmekalile maeemanĩ nginya ala maĩkĩtwe mavoa. 9Mwĩai Ngai nĩweeie Yosua atĩĩ, “Ũmũnthĩ nĩnavetanga nthoni syenyu sya kwĩthĩwa mwĩ ngombo nthĩ ya Misili.” Kĩu nĩkyo kyatumie vandũ vau vetwa Ngilikali na o na ũmũnthĩ vetawa ũu.
10 #
Kuma 12.1-13
Andũ ma Ĩsilaeli maendee na kwĩkala maeemanĩ kũu Ngilikali weũnĩ vakuvĩ na Yeliko, nĩmeethĩiwe na Mboka ya Vasaka matukũ ĩkũmi na ana ma mwei ĩa mawĩoo. 11Mũthenya ũla waatĩĩe ĩtina wa Mboka ya Vasaka, nĩmaĩe ĩvinda ya mbee lĩu wa nthĩ ya Kanaani. Lĩu ũsu waĩ mĩkate ĩte mbota na lĩu wa mbaa mbeke mũkaange. 12#Kuma 16.35 Andũ ma Ĩsilaeli nĩmaekie kwona ũla lĩu wĩtawa mana na kuma mũthenya ũsu mambĩĩa kũya lĩu ũla wavandawa nthĩ ya Kanaani.
Yosua na Mũndũ Ũkwete Ũvyũ
13Mũthenya ũmwe Yosua e vakuvĩ na ndũa ya Yeliko, nĩwoonie mũndũ aũngamĩte mbee wake akwete ũvyũ. Yosua nĩwathengeeie vala ũĩ na amũkũlya atĩĩ, “We wĩ ngalĩko yaitũ kana wĩ ngalĩko ya amaitha maitũ?”
14Mũndũ ũsu nĩwamũsũngĩie amwĩa, “Ndi ngalĩko ĩla mũĩ kana ya amaitha menyu. Nĩ vaa ta mũnene wa asikalĩ ma kaũ ma Mwĩai Ngai.”
Yosua nĩwakumanie atina nthĩ na ũthyũ athaitha na amwĩa, “Mũnene, nyie nĩ mũthũkũmi waku. Wĩenda nĩke ata?”
15Mũnene ũsu wa asikalĩ ma kaũ ma Mwĩai Ngai asũngĩa Yosua, “Umya iatũ syaku; vau ũũngamĩte nĩ vandũ vatheu.” Yosua nĩweekie ũndũ weeiwe nĩ mũndũ ũsu.
BIBLE SOCIETY OF KENYA © 2011