Yos 21
21
Ndũa ila Syanengiwe Alivai
(1Mav 6.54-81)
1Atongoi ma andũ ma mĩsyĩ ya mbaĩ ya Livai nĩmaendie kũla kwĩ Mũthembi Eleasali, Yosua mwana wa Nuni, na atongoi onthe ma mĩsyĩ ya andũ ma Ĩsilaeli. 2#Mot 35.1-8 Nĩmaneenie namo me ndũanĩ ya Silo mamea atĩĩ, “Mwĩai nĩweeaĩie Mwose amwĩa kana nĩtwaĩlĩte kũnengwa ndũa sya kwĩkala, o vamwe na isesi ila ithyũlũlũkĩte ndũa isu nĩ kana tũĩthĩasye indo sitũ vo.” 3Kwoou kwĩanana na ũndũ Mwĩai Ngai weeaĩte, andũ ma Ĩsilaeli nĩmanengie Alivai ndũa imwe na isesi sya kũĩthĩsya indo kuma isionĩ ila manengetwe sya ng'ũndũ.
4Alivai ma nzyawa sya Koathi nĩmo maĩ ma mbee kũnengwa ndũa. Kwoou Alivai ala maĩ nzyawa sya mũthembi Alũni nĩmanengiwe ndũa ĩkũmi na itatũ kuma isionĩ sya andũ ma mbaĩ sya Yuta, Simioni, na Mbengyameni. 5Nzyawa ila ingĩ sya Koathi nĩsyanengiwe ndũa ĩkũmi kuma isionĩ sya andũ ma mbaĩ sya Evalaimu, Ndani, na nyusu ya andũ ma mbaĩ ya Manase.
6Nzyawa sya Ngelisoni nĩsyanengiwe ndũa ĩkũmi na itatũ kuma isionĩ sya andũ ma mbaĩ ya Isakali, Aseli, Navutalĩ, na nyusu ĩla ĩngĩ ya mbaĩ ya Manase ĩla yatwĩe Mbasani.
7Andũ ma mĩsyĩ ya nzyawa sya Melali nĩmanengiwe ndũa ĩkũmi na ilĩ kuma isionĩ sya andũ ma mbaĩ sya Lũveni, Ngandi, na Nzevuluni.
8Kwa kũkũna kula andũ ma Ĩsilaeli nĩmanengie Alivai ndũa ii vamwe na isesi sya kũĩthya kwĩanana na ũndũ Mwĩai Ngai weeaĩĩte Mwose.
9Aa nĩmo masyĩtwa ma ndũa kuma isionĩ sya andũ ma mbaĩ ya Yuta na ya Simioni ila syanengiwe 10ana ma Alũni nzyawa ya Koathi ũla waĩ mwana wa Livai. Ndũa ii nĩsyo syaĩ sya mbee kũnenganwe. 11Nĩmanengiwe ndũa ya Kiliathi-aliva ĩla kwa ĩsyĩtwa yĩngĩ yĩtawa Eviloni vamwe na isesi sya kũĩthya ila syamĩthyũlũlũkĩte sya nthĩ yĩ iĩma ya Yuta. Aliva nĩwe waĩ ĩthe wa Anaki. 12Mĩũnda na motũi ma ndũa ĩsu maĩ mananengwa Kalevu mwana wa Yevune syĩthĩwe ng'ũndũ yake.
13O vamwe na kũnenga nzyawa sya mũthembi Alũni ndũa ya Eviloni ĩla yaĩ ĩmwe ya ila ndũa sya wĩvitho wa ala mooaanĩte, vamwe na isesi syayo sya kũĩthya ila imĩthyũlũlũkĩte, nzyawa isu nĩsyanengiwe ndũa ii: Livina, 14Yatili, Esitemoa, 15Oloni, Ndevili, 16Aini, Yuta na Mbethi-semesi. Manengiwe ndũa isu syonthe vamwe na isesi syasyo sya kũĩthya; ndũa isu syaĩ kenda kuma isionĩ sya andũ ma mbaĩ ya Yuta na Simioni. 17Kuma kĩsionĩ kya andũ ma mbaĩ ya Mbengyameni nĩmanengiwe ndũa inya ila nĩ Ngiveoni, Ngeva, 18Anathothi, na Alimoni vamwe na isesi syasyo sya kũĩthya. 19Ndũa syonthe ila syanengiwe nzyawa sya Alũni ila syaĩ athembi syaĩ ĩkũmi na itatũ na syaĩ vamwe na isesi syasyo sya kũĩthya.
20Mĩsyĩ ĩla ĩngĩ ya Alivai ma nzyawa sya Koathi nĩyanengiwe ndũa kuma kĩsionĩ kya andũ ma mbaĩ ya Evalaimu. 21Nĩmanengiwe ndũa ya Sekemu ĩla yĩ nthĩ yĩ iĩma ya Evalaimu, na yaĩ ĩmwe ya ila ndũa sya wĩvitho wa ala moaanĩte, ndũa ya Ngeseli, 22Kĩvisaimu, na Mbethi-oloni. Ndũa isu syaĩ inya na syaĩ vamwe na isesi syasyo sya kũĩthya. 23Kuma kĩsionĩ kya andũ ma mbaĩ ya Ndani nĩmanengiwe ndũa inya ila nĩ Eliteke, Ngivethoni, 24Aiyaloni, na Ngathi-limoni. Ndũa isu syaĩ vamwe na isesi syasyo sya kũĩthya. 25Kuma kĩsionĩ kya andũ ma nyusu ya mbaĩ ya Manase nĩmanengiwe ndũa ya Taanaki na ya Ngathi-limoni vamwe na isesi syasyo sya kũĩthya. 26Ndũa isu ĩkũmi nĩsyo syanengiwe andũ ma mĩsyĩ ya nzyawa sya Koathi, na syaĩ vamwe na isesi syasyo sya kũĩthya.
27Alivai ala maĩ nzyawa sya Ngelisoni manengiwe ndũa ilĩ kuma kĩsionĩ kya nthĩ kya andũ ma nyusu ya mbaĩ ya Manase. Ndũa isu nĩ Ngolani ĩla yaĩ ĩmwe ya ila ndũa sya wĩvitho wa ala moaanĩte na yaĩ Mbasani, na ndũa ya Mbe-esitela. Ndũa isu syaĩ vamwe na isesi syasyo sya kũĩthya. 28Kuma kĩsionĩ kya nthĩ kya andũ ma mbaĩ ya Isakali nĩmanengiwe ndũa inya. Ndũa isu nĩ Kisioni, Ndavelathi, 29Yalimuthi na Eni-nganimu. Ndũa isu syaĩ vamwe na isesi syasyo sya kũĩthya. 30Kuma kĩsionĩ kya nthĩ kya andũ ma mbaĩ ya Aseli nĩmanengiwe ndũa inya. Ndũa isu nĩ Misaali, Avitoni, 31Elikathi na Leovu. Ndũa isu syaĩ vamwe na isesi syasyo sya kũĩthya. 32Kuma kĩsionĩ kya nthĩ kya andũ ma mbaĩ ya Navutalĩ nĩmanengiwe ndũa itatũ. Ndũa isu nĩ Ketesi, ĩmwe ya ndũa ila syaĩ sya wĩvitho wa ala moaanĩte yĩ Kalilii, Amothi-ndoli, na Kalitani. Ndũa isu syaĩ vamwe na isesi syasyo sya kũĩthya. 33Andũ ma mĩsyĩ ya nzyawa sya Ngelisoni manengiwe ndũa ĩkũmi na itatũ ila syaĩ vamwe na isesi syasyo sya kũĩthya.
34Andũ ala angĩ ma mĩsyĩ ya Alivai na maĩ nzyawa sya Melali nĩmanengiwe ndũa inya kuma kĩsionĩ kya nthĩ kya andũ ma mbaĩ ya Nzevuluni. Ndũa isu nĩ Yokineamu, Kalita, 35Ndimina, na Naalali. Ndũa isu syaĩ vamwe na isesi syasyo sya kũĩthya. 36Kuma kĩsionĩ kya nthĩ kya andũ ma mbaĩ ya Lũveni nĩmanengiwe ndũa inya. Ndũa isu nĩ Mbeseli, Yaasa, 37Ketemothi na Mevaathi. Ndũa isu syaĩ vamwe na isesi syasyo sya kũĩthya. 38Kuma kĩsionĩ kya nthĩ kya andũ ma mbaĩ ya Ngandi nĩmanengiwe ndũa inya. Ndũa ĩsu syaĩ Lamothi ĩmwe ya ila ndũa sya wĩvitho wa ala moaanĩte yĩ Ngileati, Maanaimu, 39Esivoni, na Yaseli. Ndũa isu syaĩ vamwe na isesi syasyo sya kũĩthya. 40Kwoou ndũa syonthe ila syanengiwe andũ ala angĩ ma mbaĩ ya Livai na maĩ nzyawa sya Melali syaĩ ĩkũmi na ilĩ.
41Ndũa syonthe ila syanengiwe Alivai kuma isionĩ sya andũ ma Ĩsilaeli syaĩ mĩongo ĩna na nyanya, na syaĩ vamwe na isesi syasyo sya kũĩthya. 42Kĩla ĩmwe ya ndũa isu yathyũlũlũkĩtwe nĩ isesi sya kũĩthya.
43Kwoou Mwĩai Ngai nĩwanengie andũ ma Ĩsilaeli nthĩ yonthe ĩla weevĩtĩte kana akanenga aaũmae moo. Nĩmameisye nthĩ ĩsu na matũa vo. 44Mwĩai Ngai nĩwamanengie kwĩkala na mũuo me kĩla vandũ nthĩ ĩsu, o tondũ weevĩtĩte akatha aaũmae moo. Vai ũmwe wa amaitha moo waaĩthĩwa atonya kũmasinda, nũndũ Mwĩai Ngai nĩwanengie andũ ma Ĩsilaeli ũtonyi wa kũsinda amaitha moo. 45Maũndũ onthe ala Mwĩai Ngai wathĩte andũ ma Ĩsilaeli nĩmeanĩie; vai ũmwe wamo ũtaaĩanĩa.
BIBLE SOCIETY OF KENYA © 2011