Yos 19
19
Kĩsio kya Nthĩ kĩla Kyanengiwe Mbaĩ ya Simioni
1Kĩsio kya nthĩ kĩla kyanengiwe andũ ma mĩsyĩ ya mbaĩ ya Simioni nĩkyo kyaĩ kya kelĩ kũnenganwe. Kĩsio kĩu kyaendete kũlika kĩsionĩ kĩla kyanengetwe andũ ma mbaĩ ya Yuta. 2#1Mav 4.28-33 Ndũa ila syanengiwe andũ ma mbaĩ ya Simioni syaĩ: Mbeeli-sieva, Sieva, Molata, 3Asali-suali, Mbala, Esemu, 4Elitolati, Mbethuli, Olima, 5Nzikilaki, Mbethi-malikavothi, Asali-susa, 6Mbethi-Levaothi, na Salueni. Ndũa isu syonthe syaĩ ĩkũmi na itatũ na syaĩ vamwe na motũi ala maithyũlũlũkĩte.
7Ndũa ingĩ syaĩ: Aini, Limoni, Etheli na Asani: Isu nĩ ndũa inya na syaĩ vamwe na motũi ala maithyũlũlũkĩte. 8Ndũa isu syaĩ vamwe na motũi ala maithyũlũlũkĩte kũthi kũvika ndũa ya Mbaalathi-mbeeli ĩla kwa ĩsyĩtwa yĩngĩ yĩtawa Lama na yĩ ngalĩko ya ĩtheo ĩla yĩtawa Nengevu. Kĩu nĩkyo kĩsio kya nthĩ kĩla andũ ma mĩsyĩ ya mbaĩ ya Simioni manengiwe kĩthĩwe ng'ũndũ yoo. 9Kĩsio kya nthĩ kĩla kyanengiwe andũ ma mbaĩ ya Yuta kyaĩ kĩnene mbee wa ũndũ mendaa kĩsio kĩana, na kwoou kĩu nĩkyo kyatumie andũ ma mbaĩ ya Simioni manengwa kĩsio kĩmwe kuma kĩsionĩ kĩu kya Yuta kĩthĩwe ng'ũndũ yoo.
Kĩsio kya Nthĩ kĩla Kyanengiwe Mbaĩ ya Nzevuluni
10Kĩsio kya nthĩ kĩla kyanengiwe andũ ma mĩsyĩ ya mbaĩ ya Nzevuluni nĩkyo kyaĩ kya katatũ kũnenganwe. Kĩsio kĩu manengiwe kyavikĩte ndũanĩ ya Saliti. 11Kuma vau mũvaka wa kĩsio kĩu weelekele ngalĩko ya ũthũĩlonĩ wa syũa nginya ndũanĩ ya Malala na ũkatina ndũa ya Ndavesethi na kalũsĩnĩ kala ke ngalĩko ya wumĩlonĩ wa syũa ya ndũa ya Yokineamu. 12Ngalĩkonĩ ĩla ĩngĩ ya ndũa ya Saliti mũvaka ũsu nĩwaendete ngalĩko ya wumĩlonĩ wa syũa nginya mũvakanĩ wa ndũa ya Kĩsilothi-tavoli, na ĩndĩ ũkaendeea nginya ndũanĩ ya Ndavelathi, na ũkambata nginya ndũanĩ ya Yavia. 13Mũvaka ũsu nĩwaendee ngalĩko ya wumĩlonĩ wa syũa, na kuma vau ũkathi kũvika ndũanĩ sya Ngathi-eevieli, na Ethi-kasini. Nĩwavĩndũkĩte ũkelekela ndũanĩ ya Nea, na ũkathi nginya ndũanĩ ya Limoni. 14Kwelekela ngalĩko ya ĩũlũ mũvaka ũsu nĩwavĩndũkĩte ũkathi kũvika ndũanĩ ya Anathoni, na ũkavika mwandanĩ wa Ivita-eli. 15Kĩsio kĩu o ta ũu kyaĩ vamwe na ndũa sya Katathi, Naalali, Similoni, Itala, na Mbetheleemu. Ndũa isu syonthe syaĩ ĩkũmi na ilĩ na syaĩ vamwe na motũi ala maithyũlũlũkĩte. 16Ndũa isu vamwe na motũi masyo syaĩ kĩsionĩ kya nthĩ kĩla andũ ma mĩsyĩ ya mbaĩ ya Nzevuluni manengiwe kĩthĩwe ng'ũndũ yoo.
Kĩsio kya Nthĩ kĩla Kyanengiwe Mbaĩ ya Isakali
17Kĩsio kya nthĩ kĩla kyanengiwe andũ ma mĩsyĩ ya mbaĩ ya Isakali nĩkyo kyaĩ kya kana kũnenganwe. 18Kĩsio kĩu kyaĩ vamwe na ndũa sya Yesileeli, Kesulothi, Sunemu, 19Avalaimu, Siioni, Anaalathi, 20Lavithi, Kisioni, Evesu, 21Lemethi, Eni-nganimu, Eni-aata, na Mbethi-vasesi. 22Mũvaka ũsu o ta ũu nĩwakwatĩte Tavoli, Saasuma, na Mbethi-semesi. Waendete kũthelela ũsĩnĩ wa Yolotani. Kĩsio kĩu kyaĩ na ndũa ĩkũmi na thanthatũ vamwe na motũi ala maithyũlũlũkĩte. 23Ndũa isu vamwe na motũi masyo syaĩ kĩsionĩ kya nthĩ kĩla mĩsyĩ ya andũ ma mbaĩ ya Isakali manengiwe kĩthĩwe ng'ũndũ yoo.
Kĩsio kya Nthĩ kĩla kyanengiwe Mbaĩ ya Aseli
24Kĩsio kya nthĩ kĩla kyanengiwe andũ ma mĩsyĩ ya mbaĩ ya Aseli nĩkyo kyaĩ kya katano kũnenganwe. 25Kĩsio kĩu kyaĩ vamwe na ndũa sya Elikathi, Aali, Mbeteni, Akisavu, 26Alameleki, Amati, na Misaali. Mũvaka wakyo wa ngalĩko ya ũthũĩlonĩ wa syũa waendete kũvika ndũanĩ sya Kalimeli na Sioli-livinathi. 27Mũvaka ũsu nĩwavĩndũkĩte ũkathi ngalĩko ya wumĩlonĩ wa syũa nginya ndũanĩ ya Mbethi-ndakoni na ũkathi kũtina kĩsio kya andũ ma mbaĩ ya Nzevuluni, na Mwanda wa Ivita-eli welekele ngalĩko ya ĩũlũ nginya ndũanĩ ya Mbethi-emeki, na ya Neieli. Nĩwaendee na kwambata ngalĩko ya ĩũlũ nginya ndũanĩ ya Kavuli, 28Eviloni, Leovu, Amumoni, Kana, o na kũvika ndũanĩ ya Sitoni ĩla Nene. 29Mũvaka ũsu nĩwavĩndũkĩte ũkelekela ndũanĩ ya Lama, na ũkathi kũvika ĩla ndũa mbiĩĩe yĩtawa Tile. Mũvaka ũsu nĩwavĩndũkĩte ũkesĩla ndũanĩ ya Osa na ũkathi kũtina Ũkanga wa Menditelenia. Kĩsio kĩu kyaĩ vamwe na ndũa sya Maalavu, Akisivu, 30Uma, Aveki, na Leovu. Ndũa isu syonthe syaĩ mĩongo ĩlĩ na ilĩ na syaĩ vamwe na motũi ala maithyũlũlũkĩte. 31Ndũa isu vamwe na motũi masyo syaĩ kĩsionĩ kya nthĩ kĩla andũ ma mĩsyĩ ya mbaĩ ya Aseli manengiwe kĩthĩwe ng'ũndũ yoo.
Kĩsio Kya Nthĩ kĩla Kyanengiwe Mbaĩ ya Navutalĩ
32Kĩsio kya nthĩ kĩla kyanengiwe andũ ma mĩsyĩ ya mbaĩ ya Navutalĩ nĩkyo kyaĩ kya thanthatũ kũnenganwe. 33Mũvaka wakyo waendete kuma ndũanĩ ya Elevi ũkathi kũvika mũtĩnĩ wa Mwalonĩ ũla waĩ Nza-ananimu. Mũvaka ũsu nĩwaendee nginya ndũanĩ ya Atami-nekevu, na ya Yavineeli. O ta ũu nĩwaendee nginya ndũanĩ ya Lakumu ũkathi kũvika ũsĩnĩ wa Yolotani. 34Kuma vau mũvaka ũsu nĩwavĩndũkĩte ũkelekela ngalĩko ya ũthũĩlonĩ wa syũa nginya ndũanĩ ya Asinothi-tavoli, na kuma vau ũkathi ndũanĩ ya Ukoki na ũkatina mũvaka wa ngalĩko ya ĩtheo wa nthĩ ya mbaĩ ya Nzevuluni. Ngalĩko ya ũthũĩlonĩ wa syũa mũvaka ũsu watinĩte kĩsio kya nthĩ kya mbaĩ ya Aseli, na ngalĩko ya wumĩlonĩ wa syũa ũkatina Ũsĩ wa Yolotani. 35Ndũa sya kĩsio kĩu ila syaĩ mbiĩĩe syaĩ: Nzitimu, Seli, Amimathi, Lakathi, Kineleti, 36Atama, Lama, Asoli, 37Ketesi, Etilei, Eni-asoli, 38Iloni, Mikitali-eli, Olemu, Mbethi-anathi, na Mbethi-semesi. Ndũa isu syonthe syaĩ ĩkũmi na kenda na syaĩ vamwe na motũi ala maithyũlũlũkĩte. 39Ndũa isu na motũi masyo syaĩ kĩsionĩ kya nthĩ kĩla andũ ma mĩsyĩ ya mbaĩ ya Navutalĩ manengiwe kĩthĩwe ng'ũndũ yoo.
Kĩsio kya Nthĩ kĩla Kyanengiwe Mbaĩ ya Ndani
40Kĩsio kya nthĩ kĩla kyanengiwe andũ ma mĩsyĩ ya mbaĩ ya Ndani nĩkyo kyaĩ kya mũonza kũnenganwe. 41Kĩsio kĩu kyaĩ vamwe na ndũa sya Nzola, Esitaoli, Ilisemesi, 42Saalavini, Aiyaloni, Ithila, 43Eloni, Timina, Ekeloni, 44Eliteke, Ngivethoni, Mbaalathi, 45Yeuti, Mbene-mbelaki, Ngathi-limoni, 46Me-yalikoni, na Lakoni vamwe na kĩsio kĩla kyathyũlũlũkĩte ndũa ya Yova. 47#Asi 18.27-29 Yĩla andũ ma mbaĩ ya Ndani maveniwe kĩtheka kyoo, nĩmaendie ndũanĩ ya Lesemu na mokita andũ ma ndũa ĩsu. Nĩmamĩkwatie mooaa andũ mayo, na mamyosa mamĩmesya. Nĩmatũie ndũanĩ ĩsu na maalyũla ĩsyĩtwa ya yo kuma Lesemu na mamĩta Ndani. Mamĩtie ĩsyĩtwa yĩu kumana na ĩsyĩtwa ya ũmae woo. 48Ndũa isu na motũi masyo syaĩ kĩsionĩ kya nthĩ kĩla andũ ma mĩsyĩ ya mbaĩ ya Ndani manengiwe kĩthĩwe ng'ũndũ yoo.
Kĩsio kya Nthĩ kĩla Kyanengiwe Yosua
49Andũ ma mbaĩ ya Ĩsilaeli mamina kũaana nthĩ ya Kanaani, nĩmanengie Yosua mwana wa Nuni kĩsio kĩmwe kya nthĩ amesye. 50Kwĩanana na ũndũ Mwĩai Ngai weeaĩte, nĩmanengie Yosua ndũa ĩla weetisye, nayo nĩ Timinanthi-selaa. Ndũa ĩsu yakĩtwe nthĩ yĩ iĩma ya Evalaimu. Yosua nĩwaakie ndũa ĩsu ĩngĩ na atũa vo.
51Isu nĩsyo isio sya ng'ũndũ ila Mũthembi Eleasali, Yosua mwana wa Nuni vamwe na atongoi ma mĩsyĩ ya andũ ma mbaĩ sya Ĩsilaeli maanisye kwa kũkũna kula. Meekie ũu me mbee wa Mwĩai Ngai mũomonĩ wa Ĩeema ĩtheu ya kũkomanĩa na Mwĩai Ngai vandũ vetawa Silo. Ũu nĩw'o maminie kũaany'a nthĩ ĩsu.
BIBLE SOCIETY OF KENYA © 2011