Yos 15
15
Kĩsio kya Nthĩ kĩla Kyanengiwe Mbaĩ ya Yuta
1Andũ ma mĩsyĩ ya mbaĩ ya Yuta nĩmanengiwe kĩlungu kya nthĩ kwĩanana na ũelesyo ũu:
Kĩsio kĩu kyatheete kĩkathi kũvika mũthya wa ngalĩko ya ĩtheo ya weũ wa Nzini ũla wĩ mũvakanĩ wa Etomu. 2Mũvaka ũsu wa ngalĩko ya ĩtheo waumĩte mũthyanĩ wa ngalĩko ya ĩtheo ya Ũkanga Mũkw'ũ, 3na ũkatheea ĩngĩ kuma kyambatonĩ kya Akilavimu kũthi kũvika Nzini. Mũvaka ũsu wesĩlĩte ngalĩko ya ĩtheo ya Katesi-mbalinea, na ũkavĩtĩla Esiloi ũkathi nginya Atali. Weelingĩlĩte ũkavĩtĩla Kalika, 4na ũkaendeea kũvika Asimoni, ũkaatĩĩa ũsĩ ũla wĩ mũvakanĩ wa nthĩ ya Misili ũendete kũlika Ũkanganĩ wa Menditelenia vala mũvaka ũsu ũthelele. Ũsu nĩw'o mũvaka wa ngalĩko ya ĩtheo ya kĩsio kya nthĩ kĩla kyanengiwe Yuta.
5Mũvaka wa kĩsio kĩu wa ngalĩko ya wumĩlonĩ wa syũa waĩ Ũkanga Mũkw'ũ, kwambata kũthi kũvika vala Ũsĩ wa Yolotani ũlikĩle ũkanganĩ ũsu.
Mũvaka wa kĩsio kĩu wa ngalĩko ya ĩũlũ waumĩte mũthyanĩ wa Ũkanga Mũkw'ũ vala Ũsĩ wa Yolotani ũlikĩle ũkanganĩ. 6Mũvaka ũsu wesĩlĩte Mbethi-okila na ũkesĩla ngalĩko ya ĩũlũ ya Mbethi-alava na ũkambata ũkavika Ĩvianĩ ya Mboani mwana wa Lũveni. 7Kuma Mwandanĩ wa Mathĩna, mũvaka ũsu waendete ũkavika ndũanĩ ya Ndevili, na ĩndĩ ũkavindũka wambatĩte ũkelekela ndũanĩ ya Ngilikali ĩla ĩthimanĩte na kyambato kya Atumimu, kĩla kĩ ngalĩko ya ĩtheo ya mwanda ũsu. Mũvaka ũsu nĩwaendee kũvika ithimanĩ sya Eni-semesi, na ũkaumaala ũkathi Eni-longoli. 8Kuma vau nĩwambatĩte ũkesĩla Mwandanĩ wa Mbeni-inomu ũla wĩ ngalĩko ya ĩtheo wa kĩĩma vala mũsyĩ wa Ayevusi wa Yelũsalemu wakĩtwe. Mũvaka ũsu nĩwaendee wambatĩte nginya kĩĩmanĩ ĩũlũ, ngalĩko ya ũthũĩlonĩ wa syũa ya Mwanda wa Inomu, na ngalĩko ya mũthya ya Mwanda wa Alevai. 9Kuma vau mũvaka ũsu nĩwaendete kũvika ithimanĩ sya Nevitoa na kuma vau ũkesĩla ndũanĩ ila syĩ vakuvĩ na Kĩĩma kya Eviloni. Wavika vau nĩwavĩndũkĩte ũkelekela Mbaala ĩla kwa ĩsyĩtwa yĩngĩ yĩtawa Kiliathi-yealimu, 10vala weelingĩlĩte ngalĩko ya ũthũĩlonĩ wa syũa ya ndũa ya Mbaala ũkelekela nthĩ yĩ iĩma ya Etomu. Mũvaka ũsu nĩwaendee ngalĩko ya ĩũlũ ya Kĩĩma kya Yealimu kĩla kĩtawa kwa ĩsyĩtwa yĩngĩ Kesaloni, na ũkatheea ũkathi kũvika ndũanĩ ya Mbethi-semesi, na ũkavĩta ũkesĩla ndũanĩ ya Timina, 11ũkathi kumĩlĩĩla kĩĩmanĩ kĩla kĩ ngalĩko ya ĩũlũ ya ndũa ya Ekeloni. Nĩwavĩndũkĩte ũkelekela Sikeloni, ũkesĩla Kĩĩmanĩ kya Mbaala, na ũkaendeea kũvika Yavineeli. Mũvaka ũsu wavikĩte Ũkanganĩ wa Menditelenia, 12ũla nĩw'o waĩ mũvaka wa kĩsio kĩu ngalĩko ya ũthũĩlonĩ wa syũa.
Andũ ma mĩsyĩ ya mbaĩ ya Yuta matũaa kĩsionĩ kya nthĩ kĩla kyaĩ nthĩnĩ wa mĩvaka ĩsu.
Kalevu Ayũkita na Kũsinda Ndũa sya Eviloni na Ndevili
(Asi 1.11-15)
13 #
Asi 1.20
Kwĩanana na ũndũ Mwĩai weeaĩĩte Yosua, Yosua nĩwanengie Kalevu mwana wa Yevune kĩsio kya nthĩ ya andũ ma mbaĩ ya Yuta. Kalevu nĩwanengiwe Eviloni ndũa ya Aliva ĩthe wa Anaki. 14Kalevu nĩwalũngilye ana atatũ ma Anaki kuma kĩsionĩ kĩu, namo nĩ Sesai, Aimani na Talimai. 15Kuma vau nĩwaendie kũkita andũ ala matwĩe ndũanĩ ya Ndevili, ĩla vau mbeenĩ yeetawa Kiliathi-seveli. 16Nĩvo Kalevu waisye atĩĩ, “Mũndũ ũla wĩũkita na kũsinda andũ ma ndũa ya Kiliathi-seveli ngamũnenga mwĩĩtu wakwa ũla wĩtawa Akisa amũtwae.”
17Othinieli mwana wa Kenasi, mwana-a-inyia wa Kalevu nĩwokitie ndũa ĩsu amĩsinda, na kwoou Kalevu amũnenga mwĩĩtu wake Akisa amũtwaa. 18Mũthenyanĩ wa kũtwaana Akisa nĩwakũlilye Othinieli etye Kalevu kĩtheka. Akisa akuĩtwe nĩ ĩng'oi, na ayuma ĩng'oinĩ yĩu ĩthe wake Kalevu amũkũlya atĩĩ, “Wĩenda ngũnenge kyaũ mwĩĩtu wakwa?” 19Akisa nĩwasũngĩie ĩthe amwĩa atĩĩ, “Mbĩke nesa kwa kũnenga ithima sya kĩw'ũ, nũndũ kĩsio kya nthĩ kĩla ũnengete nĩ kĩnyiau mũno, kĩi kĩw'ũ.” Kwoou Kalevu nĩwanengie mwĩĩtu wake ithima syaĩ ngalĩko ya ĩũlũ na ya ĩtheo.
Ndũa sya Andũ ma Mbaĩ ya Yuta
20Ii nĩsyo isio sya nthĩ ila andũ ma mĩsyĩ ya mbaĩ ya Yuta manengiwe syĩthĩwe ng'ũndũ yoo. 21Ndũa syoo ila syaĩ vaasa ngalĩko ya ĩtheo, na syaĩ vakuvĩ na mũvaka wa ndũa ya Etomu syaĩ: Kaviseeli, Eteli, Yakuli, 22Kĩna, Ndimona, Atata, 23Ketesi, Asoli, Ithinani, 24Nzivu, Telemu, Mbealothi, 25Asoli-atata, Keliothi-esiloni ĩla kwa ĩsyĩtwa yĩngĩ yĩtawa Asoli, 26Amamu, Sema, Molata, 27Asali-ngata, Esimoni, Mbethi-veleti, 28Asali-suali, Mbeeli-sieva, Mbisiothia, 29Mbaala, Iimu, Esemu, 30Elitolati, Kesili, Olima, 31Nzikilaki, Matimana, Sanisana 32Levaothi, Siliimu, Aini na Limoni. Ndũa isu syonthe syaĩ mĩongo ĩlĩ na kenda na syaĩ vamwe na motũi ala maithyũlũlũkĩte.
33Ndũa ila syaĩ nguumo wa iĩma syaĩ Esitaoli, Nzola, Asina, 34Nzanoa, Eni-nganimu, Tavua, Enamu, 35Yalimuthi, Atulamu, Soko, Aseka, 36Saalaimu, Atithaimu, Ngetela, na Ngetelothaimu. Ndũa isu syonthe syaĩ ĩkũmi na inya na syaĩ vamwe na motũi ala maithyũlũlũkĩte.
37Ndũa ingĩ nĩ Nzenani, Atasa, Mikitali-ngati, 38Ndileani, Misiva, Yokitheeli, 39Lakisi, Mbosikathi, Ekeloni, 40Kavoni, Lamasi, Kithilisi, 41Ngetelothi, Mbethi-ndakoni, Naama na Maketa. Ndũa isu syonthe syaĩ ndũa ĩkũmi na thanthatũ na syaĩ vamwe na motũi ala maithyũlũlũkĩte.
42Ndũa ingĩ nĩ Livina, Etheli, Asani, 43Ivita, Asina, Nesivu, 44Keila, Akisivu, na Malesa. Ndũa isu syonthe syaĩ kenda na syaĩ vamwe na motũi ala maithyũlũlũkĩte.
45O ta ũu vaĩ ndũa ya Ekeloni ĩla yaĩ na motũi na mĩsyĩ ya yo; 46ndũa syonthe na motũi ala me vakuvĩ na ndũa ya Asitoti kuma Eviloni kũthi kũvika Ũkanganĩ wa Menditelenia.
47Vaĩ ndũa ya Asitoti na ya Ngasa vamwe na motũi na mĩsyĩ yasyo ĩla yaendete kũvika kalũsĩnĩ ke mũvakanĩ wa Misili na ke ũtee wa Ũkanga wa Menditelenia.
48Nthĩ ĩla yĩ iĩma yaĩ na ndũa sya Samili, Yatili, Soko, 49Ndana, Kiliathi-sana ĩla kwa ĩsyĩtwa yĩngĩ yĩtawa Ndevili, 50Anavu, Esitemo, Animu, 51Ngoseni, Oloni, na Ngilo. Ndũa isu syonthe syaĩ ĩkũmi na ĩmwe na syaĩ vamwe na motũi ala maithyũlũlũkĩte.
52Ndũa ingĩ nĩ Aalavu, Nduma, Esani, 53Yanumu, Mbethi-tavua, Aveka, 54Umuta, Kiliathi-aliva ĩla kwa ĩsyĩtwa yĩngĩ yĩtawa Eviloni, na Nzioli. Ndũa isu syonthe syaĩ kenda na syaĩ vamwe na motũi ala maithyũlũlũkĩte.
55Ndũa ingĩ nĩ Maoni, Kalimeli, Nzivu, Yuta, 56Yesileeli, Yokiteamu, Nzanoa, 57Kaini, Ngivea, na Timina. Ndũa isu syonthe syaĩ ĩkũmi na syaĩ vamwe na motũi ala maithyũlũlũkĩte.
58Ndũa ingĩ nĩ Aliuli, Mbethi-suli, Ngetoli, 59Maalathi, Mbethi-anothi, na Elitekoni. Ndũa isu syonthe syaĩ thanthatũ na syaĩ vamwe na motũi ala maithyũlũlũkĩte. 60Ndũa ingĩ nĩ Kiliathi-mbaali ĩla kwa ĩsyĩtwa yĩngĩ yĩtawa Kiliathi-yealimu, na Lava. Ndũa isu syaĩ ilĩ na syaĩ vamwe na motũi ala maithyũlũlũkĩte.
61Ndũa ila syaĩ weũnĩ syaĩ Mbethi-alava, Mitini, Sakeka, 62Nivisani, Ndũa ya Mũnyũ, na Eni-ngeti. Ndũa isu syonthe syaĩ thanthatũ na syaĩ vamwe na motũi ala maithyũlũlũkĩte.
63 #
Asi 1.21; 2Sam 5.6; 1Mav 11.4 Ĩndĩ andũ ma mbaĩ ya Yuta mayaatonya kũlũngya Ayevusi ala matũaa mũsyĩnĩ wa Yelũsalemu. Kũvika ũmũnthĩ Ayevusi mekalanasya na andũ ma mbaĩ ya Yuta.
BIBLE SOCIETY OF KENYA © 2011