Yak 5
5
Ũkany'o kwa ala Athwii
1Mbĩthukĩĩsyei inyw'ĩ andũ athwii! Ĩai na kua mbu nũndũ wa mathĩna ala mokĩte kwenyu! 2#Mat 6.19 Mothwii menyu nĩmaĩte vata na ngũa syenyu nilĩkĩte nĩ tũsamũ. 3Thaavu wenyu na silĩva nikwatĩtwe nĩ nganga, na nganga ĩkeethĩwa ũkũsĩ wa kũmũsilĩla na ĩkaya mĩĩ yenyu ta mwaki. Mũendee na kwĩyũmbĩĩa ũthwii mĩthenyanĩ ĩno ya mũminũkĩlyo. 4#Kũt 24.14-15 Nĩmũleete kũĩva mĩsaala ya andũ ala mathũkũmaa mĩũndanĩ yenyu; ĩthukĩĩsyei yu, mĩsaala ĩsu nĩkũmũandũa. Kĩĩo kya andũ asu nĩkĩmũvikĩĩte Ngai Mwene Ũtonyi W'onthe. 5Mwĩkalĩte kũũ nthĩ mwĩanĩwe na mwĩ na motanu ma kĩla mũthemba. Nĩmwĩyĩĩthĩtye mũkaneneva mũno kwondũ wa mũthenya wa kũthĩnzwa kwenyu. 6Nĩmũsilĩlĩte na kũaa andũ matena ĩvĩtyo, namo maimũsiĩĩaa.
Kũmĩĩsya Ĩvinda ya Mathĩna
7Mbaitũ ĩndĩ, ĩthĩwai na wũmĩĩsyo kũvika yĩla Mwĩai wĩũka. Kwa sisyai ũndũ mũĩmi weteelaa mũũnda wake ũsyae. Eteelaa na wũmĩĩsyo mbua ĩkainga, ĩkaua nginya ĩla ya mũthya. 8O nenyu o ta ũu ĩthĩwai na wũmĩĩsyo. Mũikakw'e ngoo nũndũ kũka ĩngĩ kwa Mwĩai kwĩ vakuvĩ.
9Mũikanyungunyĩanĩsye mbaitũ ũmwe kwa ũla ũngĩ, nĩ kana mũikasilĩlwe nĩ Ngai; kwa sisyai, mũsili e o vaa mũomonĩ. 10Mbaitũ osai athani ala maneenaa ĩsyĩtwanĩ ya Ngai methĩwe ngelekany'o ya wũmĩĩsyo ĩvindanĩ ya mathĩna. 11#Yovu 1.21-22; 2.10; Sav 103.8 Kwa w'o twaasya asu moomĩĩisye nĩ aathime. Nĩmweewie ũvoo wa wũmĩĩsyo wa Yovu, na ũndũ Mwĩai wamwĩkie nesa mũthyanĩ, nĩkwĩthĩwa Mwĩai e tei na ĩnee.
12 #
Mat 5.34-37
Ĩndĩ mbee wa maũndũ asu onthe mbaitũ, mũikevĩtae yĩla mũũtianĩa ũndũ na mũndũ. Mũikevĩte na ĩtu kana nthĩ kana na kĩndũ o na kĩva. Aasyai o, “Ĩĩ,” vala ve vata wa, ĩĩ, na, “Aiee,” vala ve vata wa aiee, na mũikasilĩlwa nĩ Ngai.
13Ve ũmwe katĩ wenyu wĩ mathĩnanĩ? Nĩavoye. Ve ũmwe ũkũtana? Nĩaine mbathi sya kũmũtaĩa Ngai. 14#Mk 6.13 Ve ũmwe katĩ wenyu mũwau? Nĩamete atumĩa ma ĩkanisa mamũvoyee na kũmũvaka mauta ĩsyĩtwanĩ ya Mwĩai. 15Mboya ĩsu ĩvoyetwe na mũĩkĩĩo ĩkavosya mũndũ ũsu, na Ngai akamũnenga ũima wa mwĩĩ ĩngĩ, na ethĩwa ve naĩ wĩkĩte akaekewa. 16Kwoou umbũlanĩlaai naĩ syenyu ũmwe kwa ũla ũngĩ, na mũivoyanĩaa nĩ kana mũtonye kũvow'a. Mboya ya mũndũ mũlũngalu yĩ ũtonyi wa kwĩka maũndũ. 17#1Asu 17.1; 18.1 Eliya aĩ o mũndũ taitũ, na nĩwavoyie na kĩthito kũikaue, na vandũ va myaka ĩtatũ na nyusu kũyaaua. 18Nĩwasyokie avoya ĩngĩ, na kwaua nthĩ yamesya ũsyao.
19Mbaitũ, ethĩwa ũmwe wenyu akauma nzĩanĩ ĩla ya w'o, na mũĩkĩĩi ũngĩ aimũtũnga ĩngĩ nzĩanĩ, 20#Nth 10.12; 1Vet 4.8 manyai atĩĩ: Mũndũ ũla ũkatetheesya mũvĩtany'a kuma naĩnĩ, akatangĩĩa thayũ wa mũndũ ũsu kuma kĩkw'ũnĩ, na akatuma naĩ mbingĩ iekewa.
BIBLE SOCIETY OF KENYA © 2011