Osea 11
11
Wendo wa Ngai kwa Andũ ma Ĩsilaeli
1 #
Kuma 4.22; Mat 2.15 Mwĩai Ngai easya atĩĩ,
“Yĩla Ĩsilaeli waĩ kana, nĩnamwendete,
nĩneetie mwana wakwa aume Misili.
2Ĩndĩ o ũndũ naendeeie kũmeta,
now'o namo maendeeie kũndia.
Maendeeie kũthembea ngai syĩtawa Mbaali,
na kũvĩvĩsya mĩvw'anano ũvani.
3Ĩndĩ ũu wĩ o vo, ninyie namanyĩisye Evalaimu kũthi,
nĩnamakuie na moko makwa,
ĩndĩ mayaamanya kana nĩnamavoisye.
4Nĩnamakusisye na ndii sya tei,
na ndii sya wendo.
Nĩnathaisye ĩsoki kuma ngingonĩ syoo,
na nakumana namanenga lĩu.
5“Makasyoka nthĩ ya Misili,
na kũsumbĩkwa nĩ Asuli,
nũndũ nĩmaleete kũnzyokea.
6Kũkeethĩwa kaũ ndũanĩ syoo,
ũla wĩananga ivingi sya mĩvĩa ya ndũa syoo,
na kũmaminĩa myakonĩ yoo mĩlũmu.
7Andũ makwa nĩmethyũũĩte kuma vala nĩĩ;
o na mamwĩta Ũla wĩ Ĩũlũ Mũno,
ndakamakathĩĩa o na ĩndĩĩ.
8 #
Kũt 29.23
“Evalaimu, ndonya ũkũeka ata?
Ĩsilaeli, ndonya ũkũnengane ata?
Ndonya ata ũkwananga ta ndũa ya Atima?
Ndonya ata ũkwĩka ũndũ neekie ndũa ya Nzevoiimu?
Ngoo yakwa ndĩtĩkĩla nĩke ũu!
Tei wakwa kwaku nũendee kwingĩva mũno.
9Ndikamũkany'a kwĩanana na ũthatu wakwa mwingĩ,
ndikananga Evalaimu ĩngĩ,
nũndũ nyie nĩ Ngai, ndi mũndũ.
Ũla Mũtheu e katĩ wenyu,
na ndikoka kũmũmina.
10“Makangatĩĩa nyie Mwĩai Ngai,
nyie ũla nĩlulumaa ta mũnyambũ.
Ĩĩ, yĩla nĩluluma,
ana makwa makooka kuma ũthũĩlonĩ wa syũa matetemete.”
11Makooka kuma Misili matetemete ta nyũnyi,
na kuma Asuli makooka ta mavũĩ,
nakwa ngamatũnga mĩsyĩnĩ yoo.
Nĩasya ũu nyie Mwĩai Ngai.
12Evalaimu anthyũlũlũkĩte na ũvũngũ,
na nyũmba ya Ĩsilaeli ĩkanthyũlũlũka na ũkengani,
Ĩndĩ Yuta nũlũmanĩtye na Ngai kũvika yu,
na nĩ mũĩkĩĩku kwa Ũla Mũtheu.
BIBLE SOCIETY OF KENYA © 2011