Aka 3
3
Mũĩkĩĩo eka Mĩao nĩw'o Nzĩa ya Andũ Kũtw'ĩkĩthw'a Alũngalu
1Inyw'ĩ Akalatia mwĩ andũ atumanu! Mũoetwe nũũ? Nyie nĩnamwonisye nesa vyũ ũndũ Yesũ Klĩsto wakwie ngelany'onĩ. 2Nĩenda kũmanya ũndũ ũmwe kuma vala mũĩ: Mwakwatie Veva wa Ngai nũndũ wa kwĩka ũndũ mĩao ĩkwasya, kana nũndũ wa kwĩw'a Ũvoo Mũseo na kũwũĩkĩĩa? 3Ko mũtumanĩte ata? Mwĩenda yu kũminũkĩlĩĩlya kwa vinya wenyu kĩla mwambĩlĩĩlye kwa ũtethyo wa Veva wa Ngai? 4Kũthĩna kw'onthe kũla mwathĩnie kwaĩ o kwa mana, ethĩwa nĩw'o kwaĩ kwa mana? 5Nĩmũkũlya, Ngai amũnengete Veva wake na kwĩkaa syama katĩ wenyu, nũndũ wa kwĩthĩwa nĩmwĩkaa ũndũ Mĩao ĩkwasya, kana nũndũ wa kwĩthĩwa nĩmwĩw'ĩte Ũvoo Mũseo na mũkawũĩkĩĩa?
6 #
Mwa 15.6; Alo 4.3 Kwa lilikanai Avalaamu; Maandĩko Matheu maĩtye, “Nĩwamũĩkĩĩie Ngai na kwa kĩtumi kĩu Ngai amũtw'ĩĩa kwĩthĩwa mũlũngalu.” 7#Alo 4.16 Kwoou manyai kana andũ ala me na mũĩkĩĩo nĩmo nzyawa sya w'o sya Avalaamu. 8#Mwa 12.3 Maandĩko Matheu nĩmoonanisye kwĩ o tene kana Ngai akatw'ĩkĩthya Andũ-ma-mbaĩ-ingĩ alũngalu kwondũ wa mũĩkĩĩo. Na kwoou nĩmatavisye Avalaamu Ũvoo Mũseo, o na ĩvinda yaw'o yĩte ĩviku masya, “Kwĩsĩla kwaku, Ngai akaathima andũ ma mbaĩ syonthe.” 9Kwoou andũ ala me na mũĩkĩĩo nĩmaathimĩtwe vamwe na Avalaamu, ũla nĩ mũndũ wa mũĩkĩĩo.
10 #
Kũt 27.26
Andũ onthe ala mamanthaa kũmwendeesya Ngai kwa kwĩka ũndũ mĩao ĩkwasya nĩ aumanĩe. Nĩkwĩthĩwa Maandĩko Matheu maĩtye, “Nĩ mũumanĩe mũndũ o na wĩva ũla ũtekaa na kwĩanĩsya maũndũ onthe ala maandĩkĩtwe ĩvukunĩ ya Mĩao.” 11#Ava 2.4 Kwoou nĩtũkwona nesa kana vai mũndũ ũtw'ĩkĩthaw'a mũlũngalu methonĩ ma Ngai kwondũ wa kwĩka ũndũ mĩao ĩkwasya, nũndũ Maandĩko Matheu maĩtye, “Mũndũ ũla mũlũngalu kwĩsĩla mũĩkĩĩonĩ akekala thayũ.” 12#Ali 18.5 Mĩao ndĩendanasya na mũĩkĩĩo, nĩkwĩthĩwa Maandĩko Matheu maĩtye, “Mũndũ ũla wĩanĩasya maũndũ onthe ala mĩao ĩkũweta akekala thayũ.” 13#Kũt 21.23 Ĩndĩ Klĩsto nĩwatwovoisye kuma kĩumonĩ kya mĩao yĩla watw'ĩkie kĩumo vandũ vaitũ, nĩkwĩthĩwa Maandĩko Matheu maĩtye, “Mũndũ ũla ũsũaw'a mũtĩnĩ ethĩawa e mũumanĩe.” 14Atwovoisye nĩ kana ũathimo ũla Ngai wathie Avalaamu, ũtonye kũmavikĩa Andũ-ma-mbaĩ-ingĩ kwĩsĩla kwa Klĩsto Yesũ. Ũu weekĩkie nĩ kana kwondũ wa mũĩkĩĩo tũtonye kũkwata Veva ũla Ngai wathanie.
Mĩao Ndĩalyũla Ũtianĩo
15Mbaitũ, ekai nĩtũmĩe ngelekany'o ya maũndũ aa mekawa kĩla ĩvinda: Yĩla andũ meew'ana ũndũ na maandĩkana, vai mũndũ ũtonya kũũveta kana akawongela ũndũ ũngĩ. 16#Mwa 12.7 Yuĩ, Ngai nĩwaseũvisye ũtianĩo na Avalaamu na nzyawa yake. Maandĩko Matheu maitũmĩĩte, “Nzyawa,” maiweta mbingĩ, matũmĩĩte, “Nzyawa,” maiweta ĩmwe tũ, nayo nĩ Klĩsto. 17#Kuma 12.40 Kĩla ngũweta nĩ kana Ngai nĩwaseũvisye ũtianĩo na Avalaamu, na athana kũwĩanĩĩsya. Mĩao ĩla yesie kũnenganwe ĩtina wa myaka maana ana na mĩongo ĩtatũ, ndĩtonya kũveta ũtianĩo ũsu, kana kũtw'ĩkĩthya watho wa Ngai kwĩthĩwa wa mana. 18#Alo 4.14 Nũndũ kethĩwa ũtiĩwa nĩ kwondũ wa kwĩka ũndũ mĩao ĩkwasya, ndwĩthĩwa wĩ kwondũ wa watho ĩngĩ. Ĩndĩ Ngai amũnengie Avalaamu ũtiĩwa ũsu nũndũ nĩwamwathĩte kũmũnenga.
19Kwoou ĩndĩ mĩao nĩ ya kĩ? Yongeleeilwe nĩ kana yonany'e nĩtwĩkaa naĩ, na yaĩ ĩendee na kwĩthĩwa, mũvaka yĩla nzyawa ya Avalaamu ĩkoka, ĩla Ngai wamĩnengie ũla watho. Mĩao ĩsu yanenganiwe nĩ alaĩka kwĩsĩla kwa mwĩw'anĩthya ũmwe. 20Kwa w'o vai vata wa mwĩw'anĩthya ũndũnĩ wa mũndũ ũmwe; Ngai nĩ ũmwe.
Vata wa Mĩao
21Mĩao ĩndĩ ko ĩkananĩasya motianĩo ma Ngai? Aiee! Ũu ndũtonyeka, nũndũ kethĩwa andũ maanengwa mwĩao ũtonya kũnengane thayũ, andũ methĩwa matw'ĩkĩthaw'a alũngalu kwa kwĩka ũndũ mĩao ĩkwasya. 22Ĩndĩ Maandĩko Matheu maĩtye kana andũ onthe me ungu wa ũkũmũ wa naĩ, na kwoou kĩla Ngai wathanie kũnengane kwondũ wa mũĩkĩĩo nthĩnĩ wa Yesũ Klĩsto, kĩnenganawe kwa ala maĩkĩĩaa. 23Mbee wa ĩvinda yĩu ya mũĩkĩĩo kũvika nĩtwoovetwe ungu wa mĩao, na tũkavingĩwa kũvika yĩla kũĩkĩĩa kũu kũkonanw'a. 24Kwoou mĩao nĩyo yatũũngamĩie kũvika yĩla Klĩsto wookie, nĩ kana tũtw'ĩkĩthw'e alũngalu kwondũ wa mũĩkĩĩo. 25Na yu nũndũ twĩ ĩvindanĩ yĩu ya mũĩkĩĩo, tũiũngamĩwe nĩ mĩao.
26Kwondũ wa kũmũĩkĩĩa Klĩsto Yesũ, inyw'onthe nĩmũtw'ĩkĩte syana sya Ngai. 27Nĩkwĩthĩwa inyw'onthe ala mwavatisiwe mwĩthĩwe mwĩ mũamba na Klĩsto, nĩmwĩvw'ĩkĩte Klĩsto. 28Kwoou vai kĩvathũkany'o katĩ wa Mũyuti na Mũndũ-wa-mbaĩ-ingĩ, ngombo na mũndũ ũte ngombo, mũndũ-ũme na mũndũ mũka; inyw'onthe mwĩ kĩndũ kĩmwe nthĩnĩ wa Klĩsto Yesũ. 29#Alo 4.13 Ethĩwa ĩndĩ mwĩ ma Klĩsto, mwĩ nzyawa sya Avalaamu, na mwĩ atiĩwa ma kĩla Ngai wathanie.
BIBLE SOCIETY OF KENYA © 2011