Nda 7
7
Ndanieli Ayĩelesya Mawoni Make
7.1—12.13
Woni wa Ndanieli wa Nyamũ Inya Mbai
1Mwakanĩ wa mbee wa kũsumbĩka kwa Mbelisasa mũsumbĩ wa Mbavilonĩ, Ndanieli akomete nĩwaotie ndoto na oona mawoni. Nĩwaandĩkie ũndũ ndoto ĩsu yailyĩ.
2“Ndanieli nĩwaisye atĩĩ, Woninĩ wakwa ũtukũ nĩnoonie iseve iuutanĩte kuma ngalĩko inya sya nthĩ na syookĩlya itulumo ũkanganĩ mũnene. 3#Ũvu 13.1; 17.8 Nĩvo ĩndĩ nyamũ inya nene syaumie ũkanganĩ ũsu. Kĩla ĩmwe ya nyamũ isu yaĩ kĩvathũkany'o na ĩla ĩngĩ. 4#Ũvu 13.2 Nyamũ ya mbee yailyĩ mũnyambũ, na yaĩ na nthwau sya ndiũ. Nĩendee na kũsyaĩĩsya, nthwau syayo nĩsyakũangiwe, na yookĩlw'a kuma nthĩ yaũngamw'a na maũũ elĩ ta mũndũ. O ta ũu nĩyanengiwe kĩlĩko kya mũndũ.
5“Nyamũ ya kelĩ yailyĩ nyamũ mbai yĩtawa nduva ĩũngamĩte na ngalĩko ĩmwe. Kanyw'anĩ wayo yaũmĩte mbau itatũ na maeo, na yeewa, ‘Ũkĩla ũye nyama mbingĩ ũndũ ũtonya!’
6“Ĩtina wa ũu nĩsyaĩĩsye nĩnoonie nyamũ ĩngĩ ĩilyĩ kĩkoyo. Nyamũ ĩsu yaĩ na nthwau inya mũongo iilyĩ ta sya nyũnyi. O ta ũu yaĩ na mĩtwe ĩna, na nĩyanengiwe ũtonyi wa kũsumbĩka.
7 #
Ũvu 12.3; 13.1 “Nĩendee kũsyaĩĩsya nĩvaumĩlile nyamũ ĩngĩ ya kana. Nyamũ ĩsu yaĩ ya kũtelemya, ya kũkĩwa, na yaĩ na vinya mwingĩ mũno. Yaĩ na maeo ma kyũma manene mũno. Nĩyaĩsaa, ĩkatilanga ilungu, na kũkinyanga kĩla kyatiala. Yaĩ kĩvathũkany'o na nyamũ ila ingĩ itatũ, na yaĩ na mbya ĩkũmi. 8#Ũvu 13.5-6 Yĩla nasyaisye mbya syayo nesa, nĩnoonie kalũvya kangĩ kaumĩla katĩ wa mbya isu. Mbya itatũ katĩ wa ila syaĩ vo mbee nĩsyakũkie inenge kalũvya kau mwanya wa kwĩana. Kalũvyanĩ kau vaĩ metho mailyĩ ta ma mũndũ, na kanyw'a waneenaa ndeto sya kwĩkathĩĩa.
Ũsilĩlo wa Ngai
9 #
Ũvu 20.4; 1.14 “Nĩsyaĩĩsye nĩnoonie ivĩla sya kĩ-ũsumbĩ syaiwa, na Ũmwe ũla Wĩkalaa Thayũ tene na tene ekalĩla kĩla kyake. Ngũa syake syaĩ nzaũ ta ĩa, na nzw'ĩĩ yake yaĩ nzaũ ta vamba. Kĩvĩla kyake kya kĩ-ũsumbĩ kyakanĩte mwaki, na kyaĩ na ndĩa syakanĩte mwaki. 10#Ũvu 5.11; 20.12 Ũsĩ wa mwaki nĩwaumĩlile vau mbee wake na wavĩta. Andũ ngili mbingĩ nĩmamũthũkũmie. Andũ ngili ĩkũmi kũndũ ngili ĩkũmi nĩmaũngamie mbee wake. Ũsilĩlo nĩwambĩĩie na mavuku mavuanw'a.
11“Nĩnaendeeie na kũsyaĩĩsya nũndũ wa ndeto sya kwĩkathĩĩa ila kala kalũvya kaneenaa. Nĩnasyaĩĩisye noona nyamũ ĩsu yooawa, na mwĩĩ wayo waanangwa na wanenganwe ũvĩvw'e na mwaki. 12O na kau nyamũ ila ingĩ nĩsyaveniwe ũsumbĩ, nĩsyanengiwe mwanya wa kwĩkala thayũ nginya ĩvinda na saa ila syavangĩtwe.
13 #
Mat 24.30; 26.64; Mk 13.26; 14.62; Lk 21.27; Ũvu 1.7,13; 14.14 “Mawoninĩ asu makwa ma ũtukũ, nĩnoonie mbee wakwa ũmwe wailyĩ ta mwana wa mũndũ, okanĩtye na mathweo kuma ĩtunĩ. Nĩwatongoeiw'e athi vala ve Ũla Wĩkalaa tene na tene. 14#Ũvu 11.15 Mũndũ ũsu nĩwanengiwe ũtonyi, ũkumyo na vinya wa kũsumbĩka. Andũ onthe ma nthĩ syonthe, na andũ ma kĩla kĩthyomo nĩmamũthaithie. Kũsumbĩka kwake nĩ kwa tene na tene na kũikathela, na ũsumbĩ wake ndũkanangwa.
Ũalyũlo wa Woni ũsu
15“Nyie Ndanieli nĩnathĩnĩkie mũno thayũnĩ, na mawoni ala maĩ mosũanĩonĩ makwa nĩmandelemilye. 16Kwoou nĩnathengeeie ũmwe wa ala maũngyĩ vau, na namũkũlya ũalyũlo wa woni ũsu. Nĩwandavisye na angelesya ũalyũlo wa woni ũsu ambĩa atĩĩ, 17‘Nyamũ isu inya nene nĩ mosumbĩ ana ala makethĩwa ĩũlũ wa nthĩ. 18#Ũvu 22.5 Ĩndĩ atheu ma Ũla wĩ Ĩũlũ Mũno makanengwa ũsumbĩ, na ũkeethĩawa woo ĩvinda yonthe kũvika tene na tene.’
19“Nĩvo ĩndĩ nendie kũmanya ũw'o ĩũlũ wa nyamũ ya kana, ĩla yaĩ kĩvathũkany'o na ila ingĩ. Yaĩ ya kũtelemya mũno, yaĩ na maeo ma kyũma na mbwaa sya mbulonzi. Nĩyaĩsaa, ĩkatilanga ilungu na kũkinyanga kĩla kyatiala. 20O ta ũu nĩnendie kũmanya ĩũlũ wa mbya ĩkũmi ila syaĩ mũtwenĩ wayo, na ĩũlũ wa kala kalũvya kameie, na kaimea mbya itatũ syakũkanga. Kalũvya kau nĩ kala kaĩ na metho, na kanyw'a waneenaa ndeto sya kwĩkathĩĩa, na kala kwa kũsiw'a kaĩ na ũkũmbaũ mbee wa mbya ila ingĩ.
21 #
Ũvu 13.7
“Nĩendee kũsyaĩĩsya nĩnoonie kalũvya kau kayũkita na atheu na kũmasinda. 22#Ũvu 20.4 Nĩvo ĩndĩ Ũla Wĩkalaa tene na tene wookie na aumya ũtw'ĩo mũseo kwondũ wa atheu ma Ũla wĩ Ĩũlũ Mũno, na ĩvinda yavika na manengwa ũsumbĩ mamesye.
23“Mũndũ ũsu nĩwanengie ũelesyo ũũ: ‘Nyamũ ĩsu ya kana nĩ ũsumbĩ wa kana ũla ũkoka ĩũlũ wa nthĩ. Ũsumbĩ ũsu ũkeethĩwa wĩ kĩvathũkany'o na mosumbĩ ala angĩ, na ũkamina nthĩ yonthe kwa kũmĩkinyanga na kũmĩtilanga ilungu. 24#Ũvu 17.12 Ila mbya ĩkũmi nĩ asumbĩ ĩkũmi ala makasumbĩka ũsumbĩ ũsu. Nĩvo ĩndĩ mũsumbĩ ũngĩ ũkaumĩla; akeethĩwa e kĩvathũkany'o na ala angĩ ma mbee, na akasinda asumbĩ atatũ. 25#Ũvu 12.14; 13.5-6 Akaneena ndeto sya kũleana na Ũla wĩ Ĩũlũ Mũno, na kũthĩny'a atheu make. O ta ũu akatata kũvĩndũa mĩao yoo ya ũthaithi, na mavinda ala mavangĩtwe ma ũthaithi. 26Ĩndĩ yĩla asili meambĩĩa kũsilĩla, akavenwa ũsumbĩ wake, nĩ kana ũsumbĩ ũsu wanangwe na kũminwa tene na tene. 27#Ũvu 20.4; 22.5 Ũtonyi na ũnene wa mosumbĩ onthe ma nthĩ ũkanengwa andũ ma Ũla wĩ Ĩũlũ Mũno. Ũtonyi woo wa kĩ-ũsumbĩ ndũkathela o na ĩndĩĩ, na asumbĩ ĩũlũ wa nthĩ makamathũkũmaa na kũmew'aa.’
28“Ũsu nĩw'o mũminũkĩlyo wa ũelesyo ũsu. Nyie Ndanieli nĩnathĩnĩkie mũno thayũnĩ, na natukya ũthyũ. Ĩndĩ ndyaatavya mũndũ maũndũ asu.
BIBLE SOCIETY OF KENYA © 2011